بزمارەكەی باڵیۆزی ژاپۆن

بۆچوون / بیروڕا :: 20/11/2017

نووسینی: عەدنان حسێن
سەرچاوە: ئەلمەدا
وەرگێڕان: لوقمان محەمەد رەشید

لەوە دەچێت هێشتا لە وەزارەتی گواستنەوە و دامەزراوەی هێڵی ئاسمانی-دا، شەرم بكەین لەبەرامبەر هەر خەوش و كەموكورتیەكی ئەو خزمەتگوزاریانەی كە پێشكەشی دەكەن. ئەمە كارێكی باشە، بەڵام دەمانەوێت گشتی و گشتگیر و هەمیشەیی بێت و پەیوەست نەبێت بە پێگەی كەسەكانەوە بێ‌ خەڵكانی تر و هەرەوەها پەیوەست نەبێت بەكات و كاتێكی ترەوە. 


وەزارەتی گواستنەوە و دامەزراوەی هێڵی ئاسمانی، شەرمیان بەخۆیان هاتووە و تەریقبوونەتەوە چونكە نەفەرێكی گەشتی ناوخۆیی ناو فڕۆكە سەوزەكان تێبینیی ئاشكرای نووسیوە دەربارەی ئەو خواردن و خواردنەوانەی لە فڕۆكەكاندا پێشكەش دەكرێن كە زۆربەیان دروستكراوی بیانین و ئەم شەرمەزاربوونەی خۆیشیان بە گوشارخستنە سەر نەفەرەكە دەربڕیوە بەوەی كە لە تێبینیەكەی پاشگەزبێتەوە و لە پێگەی تۆڕی كۆمەڵایەتی (فەیسبووك) بیسڕێتەوە. 

رۆژانە سەدان نەفەری گەشتی فڕۆكە سەوزەكان، تێبینی لەمجۆرە دەدەن و بەردەوامیش لە ئامرازەكانی راگەیاندنەوە تێبینیی لەسەر جۆری خراپی خزمەتگوزاریەكانی هێڵە ئاسمانیە ناوخۆییەكان و فڕۆكەخانەكان بڵاودەكرێنەوە، بەتایببەت خزمەتگوزاریی (میوانداریی)، ئەمە جگە لەوەی ئەو پارەیەی نەفەرێكی عێراقی دەیدات، زۆرجار دوو هێندەی ئەوەیە كە نەفەرێكی بیانی دەیدات لە گەشتی ناوخۆیی و دەرەكیی وڵاتەكانی تردا. كەسە پەیوەندیدارەكان لە وەزارەتی گواستنەوە و  هێڵی ئاسمانی و دەسەڵاتی فڕۆكەوانی و هەموو دەوڵەتیش، عادەتەن گوێنادەن بەوەی دەوترێت یان بڵاودەكرێتەوە. 

ئەو نەفەرەی كە وەزارەتی گواستنەوە و دامەزراوەی هێڵی ئاسمانیی بە تێبینیەكەی شەرمەزار كرد و هێوورنەبوونەوە هەتا تێبینیەكەی سڕییەوە، فۆمیۆ ئیوای-ی باڵیۆزی ژاپۆن لە بەغدا، بوو. كە لە لاپەڕەی فەیسبووكەكەیدا وێنەی ژەمە خۆراكێكی بڵاوكردەوە لە گەشتێكیی سەر فڕۆكەیەكی هێڵی ئاسمانیی عێراقدا لە بەسرەوە بۆ بەغدا. ژەمە خۆراكەكە حەوت پێكهاتە بووە و تەنیا دوانیان عێراقی بوون كە ئەوانیش نان و ئاو بوون، ئیتر پێنجەكەی تر لە پێنج (رەگەزنامە) یان كارخانەی تر بوون: پەنیری ئێرانی، مورەبای توركی، شیری كوەیتی، شۆكۆلاتەی میسری و مۆزی ئیكوادۆری.  

بێگومان ئەمە ژەمێكی بەیانیانی تایبەت بووە بە نەفەری پلە بزنسمانەكانی گەشتێكی ناوخۆیی، بەڵام ژەمەكانی هەموو كاتێكی نەفەرە پلە ئابورییەكان زۆر خراپترن و لەراستیدا بۆ مرۆڤ دەستنادەن.

باڵیۆز فۆمیۆ ئیوای، كە بە كەسێكی كارا و چالاك و خاكی ناسراوە، پۆستەكەی فەیسبووكی دوای ئەوە نووسیوە كە پێكهاتەكانی ژەمە خۆراكە پێشكەشكراوەكەی ژماردووە.نووسیویەتی:"هیوادارم لە داهاتوویەكی نزیكدا رۆژێك بێت چێژ لە ژەمە خۆراكێكی عێراقی لە ناو فڕۆكەیكیعێراقیدا وەربگرم"... بێگومان ئەم (بزمارە) درێژ و بەهێز و تیژە ئاراستەی هێڵی ئاسمانی و وەزارەتی گواستنەوە و حكومەت و دەوڵەت، هەموویان، كراوە. 

پێش هاتنی باڵیۆزەكە لەوپەڕی خۆرهەڵاتەوە، هیچ وەزیر یان جێگر وەزیر یان گەورە بەرپرسانی دەوڵەت، بیریان لەوە نەكردووەتەوە كە باڵیۆزەكەی ژاپۆن بیری لێ‌ كردووەتەوە، ئەمەیش بە بەڵگەی ئەوەی رۆژێك تێبینییەكی لەمجۆرەمان نەبیست لەلایەن كاربەدەستێكی وەك ئەمەوە لە پێگەكانی تۆڕی پەیوەندییەكۆمەڵایەتیەكان یاخود لە كۆبوونەوەكانی ئەنجومەنی نوێنەران یان ئەنجومەنی وەزیراندا...هیچكامیان غیرەتی نیشتمانیی نەبزوا بەرامبەر ئەوەی لە فڕۆكەی گواستنەوە نیشتمانیەكاندا پێشكەش دەكرێت كە زۆربەیان بەرهەمی بیانیین. 

فۆمیۆ ئیوای باڵیۆز، دوای ماوەیەكی كەم لە بڵاوكردنەوەی پۆستەكەی، پۆستەكەی لابرد و لەبری ئەو پۆستە پۆستێكی تری نووسی كە تێدا دەڵێت پۆستەكەی پێشووی لابردووە چونكە چەندین پەیوەندیی پێوەكراوە و پێیان راگەیاندووە كە رەنگە ببێتەهۆی شەرمەندەیی بۆ هێڵی ئاسمانی و عێراق و وەزارەتی گواستنەوە. 

دامەزراوەكە و وەزارەتەكە، بە تێبینیەكەی باڵیۆز تەریقبوونەتەوە، بەڵام لەوە تەریق نابنەوەكە خەڵكی ئەیڵێن و لە ئامرازەكانی راگەیاندندا دەینووسین دەربارەی خراپیی خزمەتگوزاریەكانی هێڵی ئاسمانی و دەسەڵاتی فڕۆكەوانی!!





created by Avesta Group and powered by Microsoft Azure

بەپەلە