بۆ ئەوەی موسڵمانانی خۆرئاوا لەژێر تایەی ئۆتۆمبێلەكاندا نەبینین

بۆچوون / بیروڕا :: 12/09/2017

سەرچاوە: ئەلحەیات
وەرگێڕان: لوقمان محەمەد رەشید

ئەو ئایندەیەی بە تووڕەییەوە دەڕوانێتە چاوی موسڵمانانی دانیشتووی وڵاتانی خۆرئاوا، بێگومان تاریكتر دەبێت لەگەڵ زیادبوونی ئەو هێرشانەی كە (بیانەوێ‌ و نەیانەوێ‌) بەناوی ئەوانەوە دەكرێن، چونكە ئێستا گلەیی و سەرزەنشتەكە لەسەر ئەوانە و ئەم سەرزەنشت و گلەییەیش دەگۆڕێت بۆ كردەوە، لەسەر ئەو بنەمایەی كە توندوتیژی توندوتیژیی لێدەكەوێتەوە و كاردانەوە لە خودی هەمان كارەوە دروست دەبێت! ئەو بەرپرسیارێتیەی موسڵمانانی وڵاتە خۆرئاواییەكان لە ئەستۆیان گرتووە، كە تاریكپەرستەكان لە ئەدەبیاتی خۆیاندا بە (وڵاتی كوفر) ناوی دەبەن، هەر لەوەدایە كە لە پەراوێزی رووداوەكاندا وەستاون، خۆبێلایەنكردنیان كاریگەریی لەسەر بناغە (كەینونەیان) دەبێت و هەڕەشەیە بۆ ئارامییان و وەسفێكی وایان دەداتێ‌ لە مرۆڤایەتیان وەدەردەنێت، ئەمەیش كارێكە كەس حەزی پێناكات. 

گوتاری زوڵملێكردن و لەناوبردن و پەراوێزخستن، پاساوی ئەوە نادات، كەسێكی تەمەن بیست ساڵ خەڵكانێكی سڤیل و منداڵ لە گۆڕەپانێكی گشتیی تایبەت بە پیاسە و بەسەربردنی كاتدا بشێلێت و بیانكات بەژێرەوە، ئەمە گۆڕەپانی شەڕ یاخود مەشقكردن لەسەر ئەو رمهەڵدانە نییە كە موسڵمانەكانی تێدا بەئامانجبگیرێت و لەناوببرێن. چی بە زیهن و لۆژیكدا دێت كاتێك كەسێك مافێكی بەناو خوایی بەخۆی بدات كە كۆتایی بەم خۆشی و خۆشحاڵییەی مرۆڤی بێتاوان بهێنێت و خۆشییەكان بگۆڕێت بۆ ماتەم و مەرگ و خوێن؟

موسڵمانەكان لە خۆرئاوادا هەندێك لە بەرپرسیارێتیی ئەمەیان لەسەرە، چونكە كاری پێویست ناكەن بۆ بەرهەمهێنانی ئەدەبیاتێك تا ئیسلامیەتیەكەی خۆیان لەگەڵ ئەو ژینگە نوێیەدا بگونجێنن كە بۆی چوون، چونكە ئیسلامییەكی ئەفغانی بەكەڵكی ژینگەیەكی ئەوروپی نایەت لەبەرئەوەی توندڕەوە و گێرەشێوێن و ئاژاوەگێڕە و كات و شوێن تێناگات. ئەم ئیسلامیە ئەفغانییە و ئەوانەیشی كە وەك ئەو لە گروپە تیرۆریستیەكاندان، ئەوە تێناگەن كە دەقی دینیی نەگۆڕە بەڵام ماناكەی دەگۆڕێت و لەوە ناگەن كە پێغەمبەری ئازیز دەڵێت ئەی مەعشەری موسڵمانان كاروباری دنیاییتان بەڕێوەبەرن. 
 
ئەوەی دڵی ئەو گەنجە فریودراو و مێشكشۆردراوەنە پڕ دەكات، بەها بەرزەكانی ناو ئایین نیین، بەڵكو ئەو وتارە رقاویانەن كە ئەبوبەكر بەغدادی و پێش ئەویش بن لادن بڵاویان كردوونەتەوە. ئەوەی یەكەمیان پێش سێ‌ ساڵ لە وتارێكیدا وتی ئەوانەی تۆڵەیان لێدەسێنرێتەوە تاوانبارە گەوج و گەمژەكانن "موسڵمانانی ئەمڕۆ بەپێ‌ بتی نەتەوەیی دەكوتنەوە و بتی دیموكراسیەت دەڕووخێنن". جگە لەمەیش  جیهان لە چاوی بەغدادی-دا هەمان ئەوەیە كە لەدیدی بن لادن-دایە: دوو خێمە و دوو سەنگەر. خێمەی ئیسلام و ئیمان و خێمەی كوفر و نیفاق. خێمەی دووەمیش هەموو "ئوممەتە كافرەكانی تێدایە كە ئەمریكا و روسیا رابەرایەتیان دەكەن و یەهودیش دەیانجوڵێنێت".  

بەڕووداوەستانەوەی ئەم گوتارە و لێكدانەوەی دەقە ئایینییەكان بە پێی بنەمای (خێمە)ی تازە، ئازایەتیەكی زۆری دەوێت لەلایەن فوقەها و زانایانی ئایینی و ئەكادیمیە سەرقاڵەكان لە بوارە گشتیەكەدا، لە پێناو هێنانەدیی بنەمای نوێی مامەڵەی ئایین بە رەچاوكردنی ئامانج و مەبەستەكانی شەریعەت و كار بكات بۆ گونجاندن و هاتنەوەی لەگەڵ ژینگە تازەكەدا. 


دەكرێت، بەبێ‌ وردبوونەوە لە را و بۆچوونەكان، ئەوە بزانین، زۆربەی موسڵمانان لە خۆرئاوادا، ئەو شێوە ئیسلامیە دەژین كە لە دەقەكان و شرۆڤە یەكەمینەكاندا هەن، ئەوانەی پێش كۆچكردنیان بۆ (وڵاتی كوفر) باوەڕیان پێیهێناوە. ئەو (وڵاتی كوفر)ەی كە ئامێزی بۆ كردوونەتەوە بۆ ئەوەی رێوڕەسم و سرووتە ئایینیەكانیان بە ئازادیی ئەنجام بدەن و پەیڕەوی بكەن. چونكە خۆرئاوای (كافر) لەو باوەڕەدایە كە ئایین، ئیتر هەر دینێك بێت، ئامانجی ئاسوودەكردنی ئادەمیزاد و بڵاوكردنەوەی خێر و خۆشەویستی و هێنانەدیی ئاشتی و جوانكردنی ژیانە!. ئەو كۆمەڵگە خۆرئاواییانە وا فێرنەكراون كە ئەو دینەی ئەوان، خەڵكان و شوێنكەوتوانێكیان هەیە مۆڵەتی كوشتنی مناڵان و هاتوچۆكاران و گوێگرانی بێدار و جوانی-یان، دەداتێ‌، ئیتر بە پشتوێنەی مینڕێژكراو بێت یان ئۆتۆمبێلی بۆمبڕێژ و یان شێلان و بەژێرەوەكردنێكی بێ‌ بەزەییانەی هەر كەسێك بێت كە بێتە رێیان بە لۆری و خستنە ژێر تایەكانیەوە. 

ئەم هەموو توندوتیژییە لە كوێوە هات! ئەم هەموو دڵڕەقییە لە كوێوە هەڵدەقوڵێت و لەكام بیر-ەوە ئەم شێتبووی كوشتنە بیانووەكانیان دێننەوە؟. لێرەدا شتێك تێگەیشتنی خۆرئاواییەكانی تووشی رامان و حەپەساوی كردووە: ئەمە چ دینێكە؟ هەر بەڕاست ئەمە ئایین نییە بەڵكو ئایدیۆلۆژیایەكی ئاینیی میلیشیاویی وێرانكەرە كە رقی لە ژیانە و یاوەری دیمەنی كوشتنە وەك خوێنڕێژێكی نەخۆش كە چێژ لە خوێنی قوربانیەكانی دەبینێت!

پێویستە لەسەر موسڵمانان لە خۆرئاوا، ئەگەر دەیانەوێت رزگاریان ببێت، دوور بڕۆن لە دەربازكردنی تێگەیشتنی ئایینی بۆ دەق لەو لێكدانەوە و شیكردنەوانەی كە فوقەهاكانی تاریكی كردوویانە. خۆ ئەگەر وا نەكەن ئەوا هیچ دوور نییە لە ئاییندەدا خۆیان لە ژێر تایەی ئۆتۆمبێلە بارهەڵگرەكاندا پارچەپارچە نەبن، بۆ ئەوكاتەیش كەسانێك هەن چێژ لەو دیمەنە وەربگرن. چونكە لە جیهانێكی شێتانەی وەك ئەمەی تێیدا دەژیین، خەیاڵی فەنتازیی تاقە شتێكە كە دەكرێت!.  

created by Avesta Group and powered by Microsoft Azure

بەپەلە