هەندێك ویلایەت تیادەچن

بۆچوون / بیروڕا :: 27/08/2017

سەرچاوە: ئەلشەرق ئەلئەوسەت
وەرگێڕان: لوقمان محەمەد رەشید

چیدی بەختگرەوەكانی لوبنان مامەڵە لەگەڵ تاكە كەسەكاندا ناكەن، بەڵكو مامەڵە لەگەڵ دەوڵەتەكان و هەرێمەكاندا دەكەن. بۆ نموونە، ئەگەر داوای كاتێكی تایبەتیان لێ‌ بكەیت بۆ ئەوەی بزانیت كە ئاخۆ كوڕەكەت لە تاقیكردنەوەی فیزیا دەردەچێت، كاتیان نییە. یەكێكیان لەگەڵ ساڵی تازەدا خەریكە بۆ خوێندنەوەی جووڵەی زەوی لە چینەكانی ژێرەوەیدا، هەروەها فەزایش لە چینەكانی سەرەوەیدا. هەربۆیە بە تەواوی سەری خۆی تاشی و تاڵێكی بە گەردنیەوە هێشتەوە. هەروەها پاڵتۆیەكی زێڕینی لەبەركردووە، ئاڵتوون تایبەتمەندیەكی فیزیایی هەیە لە چاودێریكردنی جووڵەی ئەستێرەكاندا. ئینجا دوای خوێندنەوەیەكی قووڵ و سەیر بۆ زەوی و فەزا و ئەستێرەكان، رایگەیاند كە هەندێك دەوڵەت و ویلایەت لەسەر رووی زەمین نامێنن و ون دەبن، رەنگە هەندێك كیشوەریش نەمێنن.. رەنگە.  

تیمی (پێشبینی) بە رووداوەكان لە لوبنان، بەوە جیادەكرێنەوە كە هەموویان بزە-یان دێت (زەردەخەنەیان لەسەر لێوە)، بەبێ‌ رەچاوكردنی ناخۆشیی پێشبینیەكە: "تایەفەیەكی بەڕێز لەم ساڵدا خەم دایاندەگرێت چونكە كەسێتیەكی دیاریان دەمرێت". ساڵی رابردوو رۆیی و تێپەڕی و كەسێتیە باسكراوەكەیش، ئێستایشی پێوەبێت، بە هەموو بایەخێكەوە هێشتا هەر تەماشای پێشبینیە تەلەفزیۆنیەكان دەكات. 

بۆ هەر خوێنەرێك، نێر بێت یان مێ‌، چەند چارەنووسێك هەیە، كەناڵێكی تایبەتی تەلەفزیۆن: "رووداوێكی سەر زەوی دەبێتە كێشەیەكی گەورە و وڵاتان دەستوەردانی تێدا دەكەن". "شەپۆلێكی برسێتی لە ئەفریقا دەدات". "خێزانی پاشایەتی بریتانیا لە چاوەڕوانیدان" و ئیتر لەم جۆرە هەواڵە رۆژنامەییانە.

"بوومەلەرزەیەكی دارایی پشكەكان لە هەندێك وڵاتدا دێنێتەخوارەوە". "سەرۆكی دەوڵەتێكی گەورە لەگەڵ ژنەكەیدا ناگونجێت، بەڵام وەك رێزێك بۆ هەڵوێستەكە تەڵاقدانی دوادەخات". "بوومەلەرزەیەك لە ئاسیای ناوەند". "چەند دادگاییكردنێك لە بەرزترین ئاستەكاندا لە بەرازیل و چەند دەوڵەتێكی دیكەی ئەمریكا". "هەواڵی خۆش دەربارەی دۆزینەوەی چارەسەرێكی تازەی نەخۆشیە گرانەكان". 

لەو پەڕی جیهانەوە بۆ ئەوپەڕی، ئەستێرەكانمان بارودۆخی هەسارەكە و دانیشتوانەكەی دەدەن بە خوێنەرەكان. هەرچی لەسەریەتی و هەرچی لەژێریەتی. هیچ بەلایانەوە گرنگ نییە و گوێی پێنادەن كە چ كاریگەرییەك لە دەروونی خەڵكدا جێدێڵن. (خوێنەر)ێكی بەناوبانگی میسری ناوی ئەو كەسانەی هێناوە كە لەم ساڵدا دەمرن، بێ‌ ئەوەی بۆ ساتێكیش پرسیاری ئەوە بكات كە ئاخۆ هەستی ئەو كەسانە چی و چۆن دەبێت كە ئەمە دەبیستن. خنكاندوونی و ئومێدێكی بەرزگاربوون بۆ نەهێشتوونەتەوە، یان ئومێدێك بە شانس و بەخت، یان تەنانەت بە رەحمەتی خوایش. 

پاشان هەندێك هەن ئەم (پێشبینیانە)ی بڵاوكردووەتەوە و هەندێك جار بە ناونیشانێكی پان و دیاریش نووسیویانە. زۆربەی رۆژنامەكانی لوبنان دژی ئەم رەفتارەی تەلەفزیۆنن، كەچی دواییش خۆیان هەمان ئەم پێشبینیانە بڵاودەنەوە بە بیانووی نابەرپرسیارێتی. هەندێك جار لایخۆمەوە ئەم (پێشبینیانە) دەخوێنمەوە، یان هەندێكیان لێ‌ تەماشا دەكەم، نازانم ئێمە وەك گەل گەیشتووینەتە كوێ‌. نازانم. ئێمە پێویستمان بە (خوێنەرێكە) پێمان بڵێت. من هیچ هەڵوێستێكم بەرامبەر هەموو ئەمانە نییە، تەنیا ئەوە نەبێت كە پەیوەستە بەو تۆقاندن و خەمباری و راڕاییەوە كە پێشبینیكەرەكان لە دڵی خەڵكەكان و كەسوكارەكانیاندا جێیدێڵن. 

ئومێدەوارم لەبری ئەوەی پشت ببەستن بە پێشبینیەكان لە ژیان و گوزەرانیاندا-كە سادەترین مافەكانیانە- بۆ تەنیا جارێكیش بێت پێشبینیی جووڵەی پشكەكان یان ئاڵتوون بكەن و سەروەت و سامانێك كۆبكەنەوە.

created by Avesta Group and powered by Microsoft Azure

بەپەلە