بای بای.. شادیبەخشەكە

بۆچوون / بیروڕا :: 15/08/2017

سەرچاوە: ئەلشەرق ئەلئەوسەت
وەرگێڕان: لوقمان محەمەد رەشید


كوەیت لە پێش دەوڵەتەكانی تری كەنداودا سەربەخۆ بووە. هەر لەگەڵ سەربەخۆبوونیشیدا رابوون و هەستانەوەیەكی هەمەجۆری لە بوارەكانی رۆژنامەگەری و شانۆ و هونەرە جیاوازەكاندا دەست پێكرد. 
ئیتر كوەیت بۆ كەنداو، لە چەندین رووەوە، بووە میسر بۆ جیهانی عەرەبی. كوەیتیەكان بە پەرۆشەوە بزاڤی هونەرییان پێشخست و ئازادییەكی فراوان و ریتمێكی هاوسەنگیان هەبوو. لەناكاودا ئەستێرەیەكی تێدا هەڵهات كە بەردەوام لە سەركەوتن و دەركەوتن و گەشانەوەدابوو تا ئەو كاتەی لە لەندەن ئاوا بوو.  

قەدەر وابوو، عەبدولحسێن عەبدولڕەزا شانۆی كەنداو تێپەڕێنێت بۆ شانۆی عەرەبی كاتێك شانۆگەرییە كۆمیدیەكەی (بای بای لەندەن)ی دانا، كە گاڵتە و شۆخییەك بوو لەگەڵ ئەو كەنداوییانەی دوای جەنگی لوبنان، شارەكەیان بەیەكجاری تەنی و خوو و نەریتەكانی خۆیان و شێوازەكانی ئاخاوتنیان و برنجی بەسمەكی-یان بۆ برد.

لەدەستدانی ئەبو عەدنان خەمباری كردین، بەڵام لەوباوەڕەدام كە خەڵكی بە بزە و زەردەخەنەوە هەواڵەكەیان وەرگرتووە، چونكە پێكەنینێكی وای لەناو جەماوەری خۆیدا چاندووە كە زەحمەتە بسڕرێتەوە و بگۆڕدرێت بە شتێكی دیكە. بوونی ئەو لە ژیانیشدا وەك سیحرە شانۆییەكانی وا بوو، ساتێك تاڵ و ساتێك شیرین و هەمیشەیش زیرەك.  

وەك گەورە داهێنەرەكان بەبێ‌ ماندووبوون، بەهرەمەندیەكەیی زاخاو داوە و بە لێوەشاوەیی خۆی سوودی وەرگرتووە لە قوتابخانە كۆمیدیەكانی میسر و لوبنان و هەروەها لە فیلیمۆن وەهبی-ی ئاوازدانەر كە هێندە بەسبووە پێبكەنێت تا خەڵك لە ویقار و مەندیێتیی خۆیدا نەهێڵێت. عەبدولحسێن لەو جۆرە كەسانە بوو كە هیچ بژاردەیەكی بۆ نەدەهێشتیتەوە: كەسێتیەكەی ئاوێتە و پێكهاتەیەك بوو لە هەموو ئامرازەكانی كۆت و سیحر. ئیتر لە راوەستانی سەر شانۆیدا بووبێت بە تەنیا، یان لەگەڵ كەسانی دیكەدا، رەنگی ئەو هەر دیار و بەرچاو بووە.   

نازناوی پێشەنگایەتی دەدرێت بە یەكەمینەكان و عەبدولحسێن-یش دەركەوتووترین كەسەكانی ناو نەوە لێهاتووەكەی خۆی بوو كە بریتی بوون لە محەمەد ئەلسەنعوسی لە دەرهێنان و شادی ئەلخەلیج لە گۆرانی و خالد ئەلسدیق لە سینەما و ئەوانی یكەیشیان. تێبینی ئەوەیش دەكرێت، لە كوەیت، دەوڵەت و كۆمەڵگەیش پێكەوە بە پەرۆشییەكی زۆرەوە لە خەمی بزووتنەوەی هونەرییدان. شێخ سەباح ئەلئەحمەد وەك وەزیری راگەیاندن، یەكەم گۆڤاری (فەرمی)ی دامەزراند و لە هەموو لایەكی جیهانی عەرەبیدا بڵاوبووەوە، ئەویش گۆڤاری (ئەلعەرەبی) بوو، ئەو گۆڤارەی كە هێندە سەركەوتوو بوو دەوڵەت چاپخانەیەكی تایبەتی بۆ كڕیی كە توانای چاپكردنی هەزاران تیراژی هەبێت.   

شۆكی داگیركارییە ئابڕووبەرەكە، كاروانێكی هەستانەوەی گەورەی بڕی. یەكێك لەو كەسانەی دژی بێزراوی و قیزەونیی داگیركاریەكە بوون، عەبدولحسێن عەبدولڕەزا بوو، كە بە ئازایەتی و بە تواناوە و هەندێجار بە گاڵتەپێكردنێكی پێكەنیناویەوە دژی داگیركەر شەڕی دەكرد. لە دەرەوەی شانۆیش روناكبیر و سیاسەتزان و خوێنەرێكی ئالوودە بوو. كۆڕی مەجلیسەكانی پڕ لە یار  و بێ‌ دوژمن و نەیار و ناحەز بوو.  هەموان هۆگری بوون. وەك پێشەنگەكان شوێنی خاڵی و كورسیەكەی بە بەتاڵی دەمێنێتەوە. 

created by Avesta Group and powered by Microsoft Azure