بە كۆمەڵ مردنی رۆژنامەنووسان بۆچی؟

بۆچوون / بیروڕا :: 10/07/2017

سەرچاوە: ئەلمەدا
وەرگێڕان: لوقمان محەمەد رەشید

لەماوەی چەند هەفتەی كەمی رابردوودا كۆمەڵێك پەیامنێران و وێنەگرانی رۆژنامەوانی عێراقی كوژران و برینداربوون، ئەمە بێجگە لە كوژرانی رۆژنامەنووسێكی فرەنسی و برینداربوونی هاوڕێكانی بە تەقەی چەكدارانی داعش لە جەنگی ئازادیی موسڵ و دەورووبەریدا.

ئەمە ژمارەیەكی زۆرە، بنچینەكە ئەوەیە كە نابێت پەیامنێر و كامێرامانی رۆژنامەوانی بگاتە نیشانەگرتنەوەی چەكەوە كاتێك جەنگەكان یاخود كارە توندوتیژەكان رووماڵ دەكات. 
كێ‌ بەرپرسیارێتیی ئەم مردنی بەكۆمەڵەی پەیامنێران و وێنەگرانی جەنگ، لە عێراقدا لە ئەستۆ دەگرێت؟

بەدڵنیاییەوە، بەرپرسیارێتیی سەرەكیی دەكەوێتە ئەستۆی بەڕێوەبەرێتیەكانی دامەزراوە راگەیاندنەكان كە زۆرجار رۆژنامەنووس و وێنەگرەكانیان دەنێرن بەبێ‌ ئەوەی كەرەستەگەلی پێویستی خۆپارێزیان بدەنێ‌، پێش ئەمەیش هیچ راهێنانێكیان نییە لەسەر رێگەی راست و گونجاوی كاركردن لە ژینگەی جەنگ و توندوتیژدا. چونكە وەك چۆن سەرباز بەرلەوەی رەوانەی بەرەكانی جەنگ بكرێت، بۆ ماوەیەكی دوور و درێژ مەشق و راهێنانی لەسەر بەكارهێنانی جۆرەها چەك و جۆرەها هونەرەكانی جەنگ پێدەكرێت، پێویستە رۆژنامەنووسانیش پێش ئەوەی پاڵبنرێن بۆ گۆڕەپانەكانی شەڕ و شێوازەكانی تری كاری توندوتیژی، پێشتر بخرێنە خولی راهێنانەوە. هەروەك پێویستە لەسەر بەڕێوەبەرێتیەكانی دەزگا میدیاییەكان دڵنیایی بدەن لەسەر ژیانی پەیامنێران و كامێرەمانەكانیان لە گرەنتیی پاراستنی مافەكانی خێزانەكانیان لە دوای خۆیان.   

سەركرداتیەكانی ئۆپراسیۆنە سەربازیەكانیش هەروەها ئۆباڵی بەشێكی بەرپرسیارێتیەكەیان دەكەوێتە ئەستۆ، چونكە دەبێت ئەوە بزانن كە رۆژنامەوان سەرباز نییە تا رێگەی بدرێت لەگەڵ ئەو هێزانەیدا كە راستەوخۆ لە شەڕدان، ئەمیش بگاتە هێڵەكانی پێشەوە. شوێنی پەیامنێری رۆژنامەوان و كامێرامان هێڵەكانی پشتەوەیە.. پەیامنێر زانیارییەكانی لە فەرماندە سەربازیەكان و ئەو ناوەندانەی راگەیاندنەوە بەدەستدێنێت كە دەبێت لە هێڵەكانی پشتەوە هەبن. كامێرامانیش بە لێنزی نزیككەرەوە وێنەكان لە دوورەوە تۆماردەكات. ئەوە ئەركی سەركردایەتی و فەرماندەكانی جەنگە كە رۆژنامەنووس تێبگەیەنێت لەوەی كە جەنگ گەڕان و پیاسەكردن نییە و هەروەها چالاكیەكی ئاسایی سەلامەتیش نییە. هەروەها ئەوەیشیان تێبگەیەنێت كە فەرماندەكان ژیان و سەلامەتیی پەیامنێرانی جەنگ-یان بەلاوە گرنگە و لەدەستدانی رۆژنامەنووس زیانی راستەوخۆیە بۆ هێزە شەڕكەرەكان، چونكە رۆژنامەوان شایەتحاڵی گۆڕەپانەكەیە و گوێزەرەوەی راستیەكانە بۆ رای گشتی، ئەمەیش بۆخۆی بەرەی ناوخۆی پشتیوانە. 

مردن و برینداربوونی ئەو ژمارە زۆرەی هاوڕێیانی رۆژنامەنووس و وێنەگران لە ماوەی چەند هەفتەیەكدا، دەبێت ببێتە زەنگی دوائاگاركردنەوە بۆ دامەزراوە میدیاییەكان و فەرماندە سەربازیەكان و هاوجۆرەكانیان، بۆ چاوخشاندنەوە بە رێكخستنەوەی بەرنامەی پەیوەست بە رووماڵی رۆژنامەوانیی شەڕە بەردەوامەكان لەگەڵ رێكخراوە تیرۆریستەكەدا كە رەچاوی حەرامیی خوێنی مرۆڤ و رۆحی ناكات و پابەند نیە بە بنەما ئەخلاقی و كۆمەڵایەتیەكانەوە. 


created by Avesta Group and powered by Microsoft Azure

بەپەلە