عەزیز محەمەد

بۆچوون / بیروڕا :: 04/06/2017

سەرچاوە: ئەلمەدا
وەرگێڕان: لوقمان محەمەد رەشید

ئەگەر رۆژی پێنج شەممەی رابردوو لە كاتی بەڕێكردنی تەرمەكەیدا بۆ گۆڕستان لە هەولێر، بە قودرەتی قادر، عەزیز محەمەد سەركردەی كۆچكردووی شیوعیی عێراق زیندوو ببوایەتەوە و لە تابووتەكەی هەستایەتەوە، ئەگەر بۆ تەنیا پێنج خولەكیش بوایە.. چی دەكرد؟  

دەڵێم من دەزانم چی دەكرد...كاروانی بەخاكسپاردنە شكۆدارە رەسمییەكەی خۆیی رادەگرت و داوای دەكرد وانەكەن، بۆ خۆیشی دەچووە ریزی هاوڕێ‌ و خۆشەویستانیەوە كە لە قەراغ رێگاكە وەستابوون بۆ ماڵئاوایی لێكردنی.

عەزیز محەمەد شایانی ئەو رێز و شكۆدارییە كە تەرمەكەیی پێ‌ برایە گۆڕستان، بەڵام هیچ شێوەیەك لە شێوەكانی گەورەكردن و پیرۆزكردنی حەز لێنەبوو.. بە شێوەیەكی خاكییانە رەفتاری دەكرد و حەزی دەكرد كەسانی دیكە وەك مرۆڤێكی ئاسایی مامەڵەی لەگەڵدا بكەن، وەك هاوڕێیەكی نزیكیان یاخود وەك ئەندامێكی خێزانەكەیان.. خاكێتی (تەوازوع) دیارترین خەسڵەتەكانی ئەو پیاوە بوو كە سێ‌ دەیەی لە لووتكەی سەركردایەتی حزبی شیوعیدا بەڕێكرد، یان بابڵێن ناچاركرا كە بەسەریبەرێت، لە یەكێك لە زۆرترین سەردەمە مێژووییە ململانێی سیاسی و ئاڵۆزی و خوێناوی و پەشێویەكانی عێراقدا.

چەندین جار من و كەسانی دیكەیش هەوڵمانداوە، قەناعەتی ئەوە بە عەزیز محەمەد بكەین، دوای ئەوەی كە ساڵانێك بوو وازی لە سكرتێریی حزب هێنابوو، بیرەوەریەكانی خۆی بنووسێتەوە. بە هەموو جۆرێك بیرۆكەكەی رەتدەكردەوە... پێمانوت ئەگەر نووسینەوەی بیرەوەرییەكانی بارێكی قورس دەبێت لەسەر شانی، ئەوا ئێمە دەتوانین هاوكاریی بكەین و دانیشتنی دوورودرێژی لەگەڵ ئەنجام بدەین لەهەر شوێنێك بێت، پرسیاری ژیان و ئەزموونی و بیرەوەرییەكانی لێ‌ بكەین و تۆماریان بكەین و دوایی بە سەرپەرشتیی خۆی بینووسینەوە.... كەچی ئەو بە شێوەیەكی زۆر سەیر هەڵوێستی رەتكردنەوەی لێوەرگرتبوو.

هەمیشە دەیوت ئەوەندە گرنگ نییە وەك ئەوەی ئێمە دەیبینین.. ئەو لە دیدی خۆیدا (كەسێكی ئاسایی) وەك هەر ئەندامێكی ئاسایی حزبی شیوعی وابووە، دەیوت قەناعەتی تەواوی بەوە نەبووە شیاوترین كەسێك بێت كە ببێتە سكرتێری یەكەمی كۆمیتەی ناوەندی.. دەیوت: لە كۆمیتەی ناوەندی و لە دەستەكانی دیكەی حزبدا، هەمیشە هاوڕێی لە من باشتر و لە ئاستی رۆشنبیریی بەرزتر لە ئاستی مندا، هەبووە. ئەمەیش ئاماژەیەك بوو بۆ ئاستی متەوازعی خوێندنەكەی، چونكە لە خێزانێكی جوتیاری نەدار لەدایكبووە و پێگەیشتووە و لە كاتێكی زووی ژیانی لە سەردەمی پاشایەتیدا دەستگیركراوە و تەنیا لە بەندیخانەدا توانیویەتی ئاستی فێربوون و خوێندنەوەی باش بكات. لەگەڵ ئەوەیشدا عەزیز محەمەد هەمیشە بە زمانێكی عەرەبیی هێندە رەوان دەدوا كە لە ئاستی زمانی زۆربەی دەرچوانی زانكۆ كەمتر نەبوو. جگە لەوەیش بە بیرۆكەی رێكوپێك و بەو زمانی دۆستایەتیەی كە پێیدەدوا، جیادەكرایەوە. هەمیشە قسەزانێكی بە توانا و قسەخۆش بوو.
 
رای ئێمە وابوو كە عەزیز محەمەد گەواهیدەری سەرەكیی هەموو رووداوە گەرمەكانی مێژووی عێراق بوو لە ناوەڕاستی شەستەكانەوە هەتا ناوەڕاستی نەوەدەكانی سەدەی رابردوو. ئەو لە ناو دڵی ململانێكان و هەڵوێستەكان و سیاسەتە جیاوازەكانی حزبدا بوو. یەكێك بوو لەو كەسانەی مێژووی عێراقی هاوچەرخیان دروستكردووە...دیدار و گفتوگۆی رەسمی و تایبەتی، نەك تەنیا لەگەڵ كەسە دیارەكانی رژێمی حزبی بەعس(لە حەفتاكاندا) و هەروەها لەگەڵ سەرانی حیزبە نیشتمانییە عێراقیەكاندا، كردووە، بەڵكو لەگەڵ ژمارەیەكی زۆری كەسێتیە سیاسیەكانی ناوچەی خۆرهەڵاتی ناوەڕاست-یشدا كردووە، لەناویاندا سەرۆكی دەوڵەتان و سەرۆكی حكومەتەكان و سەركردەی پارتەكان، ئەمە بێجگە لە سەركردەكانی بزووتنەوە كۆمۆنیستیە جیهانیەكان، لەوانەیش سەركردەكانی یەكێتی سۆڤیەت و دەوڵەتە سوسیالیستیەكانی دیكە. 

هەوڵماندا قەناعەتی ئەوەی پێبێنین كە گەواهیدانی ئەو بەهایەكی گەورەی مێژوویی هەیە و پێویستە بیانخاتەڕوو بۆ ئەوەی بگاتە دەستی مێژوونووسان، بەڵام لەو دانیشتنەی لەندەن و لە دیدارەكانی دواتریشیدا هەر رەتیدەكردنەوە، سەرەنجام هاوڕێ‌ تۆفیق ئەلتەمیمی هەندێك قسەی (لێدەرهێنا)، ئەگەرچی كەموكورتیش بوو، بۆ ئەوەی گەواهیدانی-مان لەسەر مێژوو بۆ بپارێزێت. 
عەزیز محەمەد، كە لە تێڕوانینی خۆیدا بۆ خۆی، مرۆڤێكی ئاسایی بوو و لە راستییشدا سەركردەیەكی سیاسی بوو، بێگومان هەڵەیشی هەبووە و خۆیی لێ‌ بێبەری نەكردووە، بەڵكو بەرپرسیارێتیی خۆیی لە هەموو ئەو كارانە راگەیاندووە كە لەسەردەمی ئەودا سەركردایەتی حزب كردوونی. بەڵام دەبێت بە ویژدانەوە بڵێن كە عەزیز محەمەد زۆردارێك  نەبووە هەتا هەموو بەرپرسیارێتیەكانی سیاسەتی حزبی بخرێتە ئەستۆ.. ئەو دەیان كەسەی تریش هەریەكەیان بەشێكی بەرپرسیارێتیان بەردەكەوێت كە رەنگە زۆرتربێت لە بەرپرسیارێتیەكەی ئەم. 

created by Avesta Group and powered by Microsoft Azure