رەمەزان لەسەر ساجێكی گەرم!

بۆچوون / بیروڕا :: 03/06/2017

سەرچاوە: ئەلسەباح ئەلجەدید
وەرگێڕان: لوقمان محەمەد رەشید


(رەجەب لەسەر ساجێكی گەرم)، یەكێك بوو لەو فیلمە كۆمیدییە سینەماییانەی كە هونەرمەند عادل ئیمام پێشكەشی جەماوەری شاشەی زیوینی كرد لە میانەی كاروانی هونەریی خۆیدا كە پڕە لە فیلمی نایاب و ناوبانگێكی زۆریان داوەتێ‌. ئەم فیلمە لە ساڵی 1979 دا بەرهەمهێنراوە و زۆرترین داهاتی هەبووە. ناوەرۆكی فیلمەكە باس لە لاوێك دەكات بە ناوی (رەجەب)، لە لادێوە دەچێت بۆ شار. رەجەب لەلایەن خەڵك و پیاوماقووڵانی  گوندەكەیەوە رادەسپێردرێت بۆ كڕینی گاسن-ی (خەون) كە بەلایانەوە هۆكاری رزگاربوونیانە لە نەهامەتی و دواكەوتوویی. پارەی گاسنەكە، بەهەزارحاڵ لەوەی لە تەمەنیاندا گردیانكردووەتەوە، كۆدەكەنەوە و دەیخەنە دەستی رەجەب-ەوە. بەڵام هەر هێندەی رەجەب لە گوندەكەیەوە دەگاتە وێستگەی شەمەندەفەری شارەكە، (خەونەكە) دەبێت بە هەڵم، چونكە رەجەب تووشی دەبێت بە تووشی (بولبولێكی دز)ی زۆرزانەوە كە تایبەتمەندە لە راوكردنی ئەوانەی لە گوندەكانەوە روودەكەنە شارەكان بۆ دەستبڕین و خەڵەتاندنی. بۆیە پارەكەی لێ‌ دەدزێت و خەونی خەڵكی دێ‌ و ئەو پاشەڕۆژەی كە چاوەڕێیان دەكرد، بەفیڕۆ دەچێت. دوای ئەم رووداوە (رەجەب) لە ناو قەرەباڵغیی شارەكەدا ون دەبێت!.
 
ئەگەر بەراوردێكی (رەجەب) بكەین لەگەڵ ئەم واقیعەی بینیمان و دەیبینین، ئەوا دەگەینە ئەنجامێك كە پێمان دەڵێت گەشتەكەمان لە سەردەمی دیكتاتۆریەت و سەركوتكردن و چەوساندنەوە و بێبەشبوون و داخستنی دەمەكان و گەمارۆ و جەنگەكانەوە بۆ قۆناغی دیموكراسی و ئازادی و فرەیی و رێزی ئەویدی و فیدراڵی و كۆنفیدراڵی و دابەشبوون و وێنەكردنەوەی سنوور و پارچەپارچەبوون و گەمەی كورسی و هەڵوێستەكان و هەرێمەكان و دەستتێوەردانە دەرەكییەكان....بێ‌ هیچ گومانێك لەگەڵ ئەو واقیعەدا دێتەوە كە (رەجەب)ی تێدا ژیاوە، بێگومان لەگەڵ جیاوازیی چواندنەكەدا...چونكە لایەنگەلێك هەبوون كە كاریانكرد بۆ دزینی خەونی عێراقییەكان لەو گۆڕانكارییەی هاتەدی لە دوای چاوەڕوانییەكی زۆر و هەوڵدانی (دەمكوتكردنی) ئەو ئازادییەی كە بەدەستیانهێنابوو، هەروەها بەردەوامیی هەوڵی دوژمنان بۆ تاڵكردنی ژیانمان... هەرهێندەی لە پیلانگێڕییەك یان سیخوڕییەك یان هەڵوێستی نامەردانە هەڵدەستینەوە، ئیتر  ناوخۆیی یان دەرەكی بن، دەكەوینەوە بارێكی توندتر و خراپترەوە!.

پێدەچێت قەدەرمان وا نووسرابێت كە بە درێژایی گرێكانی رابردوو و تا ئێستایش تووشی هەموو ئەم شتانە ببین، بەڵام ئەوەی رایگرتم و هەڵوەستەیەكی پێكردم دوای گەڕانێكی خێرا بە ئینسایكلۆپیدیای مێژوودا، گەیشتمە ئەوەی كە زۆربەی شەڕە خوێناوی و توند و بە ئازارەكان، لە ماوەی مانگی پیرۆزدا روویانداوە كە یەزدان كوشتاری لەسەر موسڵمانەكانی تێدا حەرام كردووە و كردوویەتی بە مانگی حەرام. لە مانگی رەمەزاندا چەندین غەزەوات و شەڕ ئەنجامدراون كە بە زۆر بۆیان پەلكێشكراوین نەك بە ویستی خۆمان.. رەنگە بەناوبانگترینیان ئەمانە بن:
ـ غەزوی بەدر لە 17 ی رەمەزانی ساڵی دووی كۆچی.
ـ فەتحی مەككە لە 10 ی مانگی رەمەزانی ساڵی هەشتی كۆچی.
ـ شەڕی قادسیە لە رەمەزانی ساڵی 15 ی كۆچی.
ـ فەتحی وڵاتی ئەندەلوس لە رەمەزانی ساڵی 92 ی كۆچی.
ـ شەڕی زلاقە لە باشوری ئیسپانیا ساڵی 479 ی كۆچی.
ـ شەڕی عێن جالوت لە رەمەزانی ساڵی 685 ی كۆچی.
ـ شەڕی حەتین لە رەمەزانی ساڵی 584 ی كۆچی.
ـ شەڕی رەمەزانی 1973 یان شەڕی ئۆكتۆبەر.
ـ شەڕی (قادسیە)ی دووەم 1980-1988.
ـ شەڕی چەتە تیرۆریستەكانی داعش 2014.
ـ تەقینەوە تیرۆریستیەكان لە بەغدا و پارێزگاكانی تر لە 2003-2017. 

نازانم ئەمە چ دووفاقییەكە موسڵمانان لە دەركەوتنی ئیسلامەوە تا بە ئەمڕۆمان دەگات تێیدا دەژین.. دوژمنانی مرۆڤایەتی و پەیامە لێبووردەییەكانی ئاسمان، بە ئەنقەست ئەم مانگەیان هەڵبژاردووە بۆ كوشتنی بێتاوانان و خوێنڕشتن و پێشێلكردنی پیرۆزیەكان و شكاندنی بەڵێننامەكان و غەدركردن لە موسڵمانان و ناموسڵمانانیش، لە سەرپێچیكردنێكی ئاشكرای ئەوەی كە لە قورئانی پیرۆزدا هاتووە، بەڵام وادیارە ئێمە لەم مانگە چاكەدا بەدبەختین بۆیە پەستی و بێزاریەكان و پیلانگێڕیەكان زیاتر دەبن..ئیتر لە دوژمنانەوە بن یان لە دەرودراوسێ‌ و یاخود ئەوانەی لەسەر رۆڵەی هاونیشتمانی حسابن، لەوەیش دەچێت كە نزیكەكان یەكەمینەكان بن لە پیلان و سیخوڕی و فیتنە و پەرتكردن و دووڕوویی و چاوچنۆكیدا.

وەك پەندەكە دەڵێت (ئەوەی جێگرەوەیەكی هەبێت نامرێت) ئەوەتا تیرۆر و ئەو پیلانگێڕیانەی كە باووباپیران ناویانەتەوە نامرن، ئەمڕۆ نەوەكان بە شێوە و جۆر و شێوازی دیكە و بە ئامرازگەلی پێشكەوتوو، بەڵام بەهەمان (عەقڵیەتی) وشكی توندی بەردینەوە، زیندووی دەكەنەوە. وەك ئەوەی ئەم مانگە پیرۆزە ئەو (دیواری نزم)ە بێت كە لە پەندە میللییەكەدا هەیە.. بەڵام ئەوە كێیە كە دەیەوێت ئازار بە نیشتمان و هاونیشتیمانیی بەڕۆژووبوو بگەیەنێت!.  

لە كۆتاییدا، شیرینیەكانی وەك زلوبیا و پاقلاوە و زنودلست و دۆڵمە و ماسیی برژاو و شۆربای نیسك ئامادەی سەر سفرەی رەمەزانن، بە كوێرایی چاوی دوژمنان.. یاریی (محێبس)یش لە هەموو یاریەكانی دوژمنانی ئەم نیشتمانە، باڵاتر و بەرزتر دەمێنێتەوە!. 




created by Avesta Group and powered by Microsoft Azure