كەوتنەناو وێرانەی ئەمریكاوە

بۆچوون / بیروڕا :: 25/05/2017

سەرچاوە: ئەلدیار
وەرگێڕان: لوقمان محەمەد رەشید


سەیرە ئاوا بگۆڕێین بۆ گورگ. گورگ لەسەر كاغەز و لەسەر شاشەكان و لەسەر دوانگە.... سەیرە بیرمەندەكانمان و نووسەرەكانمان بگۆڕێن بۆ ئۆركسترایەك (لە بزن یان لە مریشك) لە بەردەم گەورەكەی ئەمریكادا و بە خەسڵەتی ئەو قۆشمەچی و گاڵتەبازەی كە زەمەنی تێدا كوشتووین بۆ ئەوەی وەك كۆمەڵگەیەكی بێ‌ زەمەن بمێنینەوە... 

عەرەب دژی عەرەب و سوننە دژی شیعە و شیعە دژی سوننە؟ ئایا ئەمە ئەو یارییە نییە كە نەتەوەكان ماوەی سەد ساڵە و خێڵەكانیش ماوەی هەزار ساڵە پێمان دەكەن؟ ئەوانەی عەقڵیان تیاماندا كوشت. ئایا ئێمە نەوەی ئیبن روشدین یان نەوەی حەجاج بن یوسف ئەلسەقەفی؟ هەموومان سەرمان پێگەیوە و ئێستا كاتی لێكردنەوەیەتی. ئایا بەڕاست سەرمان لەسەر شانمانە؟. 
چۆن دەبێت بیرمەندی عەرەب، نووسەری عەرەب، تا ئەم ئاستە بێنرخ و لایەنگر و داخراو و پیلانگێڕ بێت و لەگەڵ دۆناڵد ترەمپ-دا بێتەوە كە ئیهانەی كردین و دوایی ئیهانەی كردین و دواییش ئیهانەی كردین بەوەی ئەو دڵسۆزەیە كە ئاسمان بۆی ناردووین (نەك شۆستەكانی لاس فیگاس) بۆ ئەوەی سەركەوتوومان بكات. سەركەوتن بەسەر كێدا؟ بەسەر غۆرێلای ئێرانی-دا؟. بەڵێ‌ هەموومان دژی ئێرانین كاتێك هەوڵدەدات پەرت و بڵاومان بكات یان تێكمانبشكێنێت لەڕووی مەزهەبی یان نەژادی-یەوە. بەڵام ئەی سەركردە مەزنەكانمان لەكوێن؟ ئەمبارەكانمان كوان؟ ئەی وەبەرهێنانەكانمان چییان لێهاتووە؟ كوان تاوەرەكان و یەختەكانمان؟.
ئایا دەكرێت سەدەكانی ناوەڕاست زیاتر لە شەهریار و لستنەوەی پێكانی شەهرەزاد بەرهەمبێنن؟. ئیڤانكا چۆن سەیری كردین؟ و میلانیا چۆن تێیڕوانین؟ پارچە ئاسەوارێكی كەنارخراوی لەناوچوو (ئەگەر كەشتیگەلەكانی ئێمە نەبوایە) وەك دۆناڵد ترەمپ وتی. 

ئەو رۆژە بەرپرسێكی ئێرانی وتی"چوار پایتەختی عەرەبی كەوتوونەتە چنگی ئێمەوە". بۆ ئەمە دەڵێین چنگێك خاكی عەرەب لە دەستی ئێوەدا نییە. نە دیمەشق و نە بەغدا و نە بەیروت و نە سەنعا.
دەزانین لە ئێراندا كەسانێك هەن رقیان لێمانە و هەیشیانە قێزمان لێدەكەنەوە. هەروەها هەیە گرێی قوروش یان كیسرا نەوشیروان بەسەریدا زاڵە، بەڵام بە هەبوونی كەسێكی وەك حەسەن رۆحانی نابێت وەك دەوڵەتێكی دوژمن تەماشای ئێران بكەین و جیهانی عەرەبی و ئەوەی پێیدەوترێت جیهانی ئیسلامی (هەتا سەڵتەنەی برۆنای) لە دژی هانبدەین... 

هەموومان ئومێدی ئەوەمان بە سەرۆكی ئێرانە، كە بۆ جاری دووەم گەل متمانەی خۆیی پێدایەوە، ئەو دەم-انە دابخات كە بە زمانێكی وا دەدوێن زیانەكانی بۆ وڵاتەكەی خۆیان زۆر زیاترە وەك لە زیانەكانی بۆ وڵاتانی دیكە...
بێزاربووین لە مەرگ، لە هاڕینی ئێسقانەكان، لە سەربڕینەكان و لە گریانی جگەرسووتاوان. لە لووتكەكەدا چیمان كرد جگە لەوەی كە والی-یەكمان بەسەرخۆمانەوە دانا، سوڵتانێكمان بەسەر خۆمانەوە دانا بۆ ئەوەی  یارمەتیمان بدات لە بەردەوامبوونی هاڕینی ئێسك و پرووسكمان لە ئاشی خوێندا؟.
چەند كاڵفامین كاتێك وابزانین بە سەمای شمشێر و سەمای ئەسپ یان بەو زێڕەی لە بەرپێیەكاندا هەڵیدەڕێژین، دەكرێت دۆناڵد ترەمپ، لە پیاوێكەوە كە هێندە رقی لێمانە، بگۆڕین بۆ پیاوێك كە هێندە هاوسۆزمان بێت...  

رۆحانی داوای (سازان لەگەڵ جیهان)دا دەكات. ئێران لە قەیرانی ململانێدایە وەك چۆن وڵاتەكانی ئێمەیش لە قەیرانی ململانێدان، ئەی بۆچی ئەو لووتكەیەی لەگەڵ سەرۆكی ئێراندا كۆماندەكاتەوە نەبێتە جێگرەوەی ئەو لووتكەیەی كە سەرۆكی ئەمریكا هەوڵی بۆ دەدات تا ئێمە و بنیامین نەتانیاهۆ لەژێر یەك چەتردا و تەنانەت لەژێر یەك دروشمیشدا كۆبكاتەوە؟. ئەوە شاراوە نییە كە ترەمپ كار بەم ئاراستەیە دەكات. نەتانیاهۆیش ئومێدی ئەوەی خواستووە كە سواری فڕۆكەیەك بێت بۆ ریاز. ئەو پیاوەی فەلەستین و فەلەستینیەكان دەكوژێت و دەستدرێژی دەكاتە سەر خاك و دەستدرێژی دەكاتە سەر مێژوو... 
كێ‌ دەزانێت واشنتۆن چۆن بەرنامەڕێژیی جەنگەكان و ململانێكان و ئازارەكان دەكات لەپێناو ئەوەدا كە كارگەكانی خۆی كار بكەن، لەملایشەوە سامانەكانی ئێمە و لاشەكانمان بەفیڕۆ دەڕۆن؟ ئەی كام عەرەب و كام موسڵمان، ناوی فەلەستین دەهێنێت، تەنانەت لە بەیاننامەیەكدا كە دەربارەی چەتەگەری یاخود تەنانەت دەربارەی قەلاچۆكردنی كۆكایین و حەشیشەیش دەری دەكات؟..
كاتی ئەم قسانە نەما و تێپەڕی. تازە كەوتینە ناو وێرانەی ئەمریكاوە و بەهۆشنایەینەوە مەگەر لە دۆزەخدا!!!.


created by Avesta Group and powered by Microsoft Azure