فیرعەون ‌

بۆچوون / بیروڕا :: 10/05/2017

د. شێرکۆ عه‌بدوڵڵا
+ ناوی مەسئولێكم  پێ‌ بڵێ‌ ئەوەڵ حەرفەكەی بە (ف) دەست پێبكات.
ـ بەگم ئەوەندەی من بزانم هەموویان بە (ف) دەست پێ‌ ئەكەن.
+ چۆن شتی وا ئەبێ‌ رۆڵە؟!
ـ چاك!.. هەموویان فیرعەونن.
+ ئەرێ‌ تۆ نازانی قسەیەكی خۆش بكەی كوڕی خۆم؟!
ـ قسە نا... بەڵام خەبەری خۆشم لایە.. شوكور گەورەترین تاوانباری ئەم كوردستانەیان گرت و حوكمیان دا.
+ ئەو قوڕبەسەرە نەڵێی كە نەختێك دایبی و شیری دزیبوو؟!
ـ بۆچی قوڕبەسەرە گەورەم؟.. دزی هەر دزییە هی نەوت بێ‌ هی مەعاش بێ‌ هی دایبی مناڵ بێ‌، فەرق ناكا.
+ لای كێ‌ فەرق ناكا، عەبقەری؟
ـ لای قانون ئوستاز.. هەر بەم بۆنەیەوە با نموونەیەكی ترت لە نموونەكانی سەروەریی یاسا عەرز بكەم.
+ ئەزانم چییە منیش خوێندومەتەوە، فایلی موستەشارەكانە؟
ـ نەخێر.. كابرایەكی دڕندەی خوانەناسە ئەڵێن كەڵەشێرێكی دزیوەو شوكور قانون دوو ساڵ سجنی داوە بە تەنگەیا.
+ لەسەر كەڵەشێرێك دوو ساڵ سجن كراوە؟!
ـ بەڵێ‌ قوربان.. دوو ساڵی خشت.
+ جا باشە لە سجن چی لێ‌ ئەكەن؟
ـ هەموو رۆژێ‌ نیوەڕوان مریشكی ئەدەنێ‌.

created by Avesta Group and powered by Microsoft Azure