مێژوو... درۆیەكی بەلەزەت

بۆچوون / بیروڕا :: 06/05/2017

سەرچاوە: ئەلعەرەبی ئەلجەدید
وەرگێڕان: لوقمان محەمەد رەشید


ئەوەی هێشتا باوەڕی بە مێژووە.. بڕوای بە كتێبەكانی و بە كەسێتیەكانی و بە وتەكانی و رووداوەكانی و رۆژانەكانی هەیە و حوكمگەلێكی لەسەر بنیاتدەنێت كە پەیوەستن بە ئێستا و بە داهاتووەوە، زۆر سەری سوڕماوە. 

مێژوو وەڵامی خازربەدەستی ئەو پرسیارە قورسانە ناداتەوە كە مرۆڤ دەربارەی ئێستای ئاراستەی دەكات، تەنانەت ئەگەر زۆرجار خۆیشی دووبارە بكاتەوە، بەڵام خوێندنەوەی مێژوو پێویستیەكی حاشاهەڵنەگرە، نەك بۆ گەڕان بە دوای وەڵامی كێشە و گرفتە هەنووكەییەكاندا، بەڵكو بەلایكەمەوە بۆ قەناعەتهێنان بەوەی كە چارەسەرەكان وەك پێویستیی هەن و پێویستیان بە هەوڵدانی زیاترە بۆ بەشوێنداگەڕان بە رێگە ناباوەكان، هەروەها چێژێكی دێرینیشە لە شاراوەكانی رابردوودا. 

خانەی كتێبەكانی مێژوو لە كتێبخانەكەمدا گەورەترین و پڕترینە، سەردانی هەر پێشەنگەی كتێبەیش بكەم زۆرترینی كاتەكەم لەبەردەم رەفەكانی كتێبە مێژوویەكاندا بەسەردەبەم. رادەوەستم و هەندێك جار لە ناویاندا دادەنیشم بۆ خوێندنەوەی ناونیشانەكان و جارجاریش پێشەكی و فەهرستەكانیان، پێش ئەوەی كۆمەڵێكیان لێ‌ هەڵبژێرم و دواتر شوێنێكیان لە كتێبخانەكەمدا بۆ بدۆزمەوە.

رەنگە كتێبەكانی مێژوو و سەرگوزشتەی ژیان، كە جۆرێكە لە مێژووی كەسەكان و خۆیان دەینووسنەوە، لەو كتێبانە بن كە لەخوێندنەوەیاندا هەست بە بێزاری نەكەم و زیاد لە جارێك دەیانخوێنمەوە، ئیتر بە هەر هۆیەك بێت، وەك ئەوەی لەگەڵ جۆرەكانی دیكەی كتێبیشدا هەر وام، ئەگەرچی دەیشزانم كە عادەتەن راستیی لەدووتوێی لاپەڕەكانی ئەم كتێبانەدا نین و ئەو درۆیانەی كە تێیاندان چەند هێندەی ئەوانەیە كە دەكرێت بەڕاستیان بزانین.  

بەڵام كێ‌ وتوویەتی من بەدوای راستیدا دەگەڕێم لە كتێبانێكدا كە نووسەرەكانیان بیریان لە راستی نەكردووەتەوە كە نووسیویانە؟ ئەی كێ‌ وتوویەتی من خۆم بەدوای راستیدا دەگەڕێم، هەر راستیەك بێت، لەخوێندنەوەی هەر كتێبێكدا؟ راستیەكان لە كتێبەكانی مێژوودا نین و لە هیچ كتێبێكی دیكەیشدا نین. بەڵكو تەنیا لە كتێبەكانی داهێنان و ئەفراندندان، لە شیعر و لە چیرۆك و لە رۆمان و لە شانۆ-دان... خەیاڵ لە كوێدا بوو راستی لەوێدایە!.

بەڵام ئەو كتێبانەی كە نووسەرەكانیان بانگەشەی ئەوە دەكەن بۆ بەنەمریی هێشتنەوەی راستیی نووسیویانە، بەبێ‌ سەرزەنشتیی ویژدان خەریكە دڵنیادەبم كە درۆدەكەن... لانیكەم هەندێكیان، بڕواناكەم مێژوونووسێك خەمی نووسینی راستیی هەبووبێت كاتێك بیری كردووەتەوە لە نووسینی كتێبەكەی لە بواری مێژوودا، ئەمەیش لەبەر هۆكارێكی سادە، ئەویش ئەوەیە كە ئەو راستییەی لانەبووە تەنانەت ئەگەر هەوڵیشی دابێت بۆ ئەوەی بیدۆزێتەوە.

رەنگە لەم حوكمدانەمدا كەمێك زیادەڕۆییم كردبێت و لەوانەیە توندڕەوانە دەركەوتبم و هەموو پۆلێنكارانی مێژوو و نووسەرانی مێژووم خستبنە یەك سەبەتەوە، بێگومان هەندێك هەن كە هەوڵێكی داوە بۆ گەڕان بەدوای ئەو راستیانەدا و سەركەوتوویش بووە، دەستپێشخەریی كردووە لە تۆماركردنیدا، بەڵام ئەمە زۆر دەگمەنە، پاشان ناكرێت بە ئاسانی بیدۆزینەوە، بۆیە زیانێك لەوەدا نییە ئەگەر ئەو مێژوونووسە بابەتییە راستگۆیە دەستپاكە وردبینەیش بخەینە سەبەتە تاقانەكەمانەوە، لەگەڵ هاوڕێ‌ نابابەتی و درۆزنە ناپاكە هەڕەمەكیەكانیەوە، بەتایبەت كە ئەمە هیچ زیانێكی پێناگەیەنێت و زیان بەوانیش و هەروەها بە ئێمەیش ناگەیەنێت. 

ئایا ئەمە مانای ئەوەیە واز لە هەموو كتێبەكانی مێژوو و سەرگوزشتە تایبەتەكان بێنین تەنیا لەبەر ئەوەی كە هیچ راستییەكیان تێدا نادۆزینەوە؟ ئایا واز بێنین لە نووسینەوەی دیكەی ئەو كتێبانە؟ بە دڵنیاییەوە نەخێر، چونكە خوێندنەوەی مێژوو، جگەلەوەی چێژ بە خوێنەر دەبەخشێت، بەتایبەت ئەگەر نووسەرەكەی بەهرەی جۆرە نووسینێكی وای هەبێت كە بتوانێت تۆی خوێنەر بخەڵەتێنێت لە رێی وێناكردن و پێچانەوەی درۆكە بەو راستییانەوە كە گومانیان لەسەر نییە، جگە لە هەموو ئەمانە بڕوای خوێنەریش ئومێدبەخش و بە هیوا دەكات لە دۆزینەوەی چارەسەرە راستەقینەكان بۆ كێشە تایبەتەكانی خۆی و كێشەكانی جیهانی دەورووبەریشی. وای لێدەكات هەوڵبدات بۆ دۆزینەوەیان بە هەموو باوەڕێكیەوە... چونكە مێژوو، بە حیكایەتە راست و ناڕاستەكانیەوە، خۆی دووبارە دەكاتەوە... هیچیشمان لەبەردەمدا نییە جگە لە خەیاڵی داهێنەرانە كە بەهۆیەوە راستیی مێژوو لە درۆ خۆش و بەلەزەتەكانی جیا بكەینەوە. 



created by Avesta Group and powered by Microsoft Azure