پاشگەزبوونەوەی ترەمپ لە هەڕەشەكانی دژی كۆریای باكور

بۆچوون / بیروڕا :: 20/04/2017

سەرچاوە: رەئی ئەلیەوم
وەرگێڕان: لوقمان محەمەد رەشید

ئەم سێ‌ هەفتەیەی رابوورد ئەوەیان سەلماند كە هەڕەشەكانی دۆناڵد ترەمپ سەرۆكی ئەمریكا بۆ بەكارهێنانی هێزی سەربازیی، بەتاڵ و ناڕاست بوون و ئەنجامگەلێكی پێچەوانە دەداتەوە، دیارترینیان دەركەوتنیەتی بە شێوەی سەركردەیەكی هەڵەشە كە شایانی ئەوە نییە بەرپرسیارێتی و سەركردایەتیی دەوڵەتێكی گەورەی ئەتۆمیی وەك ویلایەتە یەكگرتووەكانی لەئەستۆدا بێت.
دوو نموونەی سەرەكیمان هەیە كە ئەمە دەسەلمێنن:
* یەكەم: ئەو هەڵكشانە گەورەیەی سەرۆك ترەمپ لە قەیرانی كۆریادا كردی كە بەلای هەندێكەوە گەیشتە ئەوەی خەریكە بە مووشەكە ئەتۆمیەكانی هێرش دەكاتە سەر كۆریای باكور و دواییش پاشگەزبوونەوە لە جێبەجێكردنی بە شێوەیەكی شەرمەزارانە. 
* دووەم: مووشەكە تۆماهۆكەكان كە ئاراستەی بنكەی شعێراتی سوریا كران و دواتر دەركەوت هیچ زیانێكی وایان نەبووە و فڕۆكەكانی بە شێوەیەكی ئاسایی لێوەی دەفڕین بۆ بۆردوومانكردنی شاری ئیدلب وەك جارانی پێش بۆردوومانەكە.
پاشەكشەی ترەمپ لە قەیرانەكەی كۆریادا، دەگەڕێتەوە بۆ خۆگریی كیم یۆنگ ئۆن سەرۆكی كۆریای باكور و درێژەدانی بە ئاڵنگاریی و هەڕەشەكردنی بە وەڵامدانەوەی هەر هێرشێكی ئەتۆمیی ئەمریكا بۆ سەر وڵاتەكەی بە هێرشی ئەتۆمیی، جگە لەمەیش ئەم هەڵوێستە هەڵەشییانە هیچ پشتیوانیەكی هاوپەیمانە ئەوروپاییەكانی ئەمریكای بەدەستنەهێنا، هەڵوێستی چین-یش پشتیوانیی بوو لە هەڵوێستی كۆریای باكور.
جەنگی كۆریا لە سەرەتای پەنجاكانی سەدەی رابردوودا، كوژرانی پێنج ملیۆن كۆریی لێكەوتەوە لەگەڵ دەیان ملیار دۆلار و وێرانەیەكی زۆر بەهۆی دەستوەردانی ئەمریكاوە، ئیتر ئاخۆ دەبێت دۆخەكە چۆن بێت ئەگەر جارێكی تر شەڕ دروست ببێتەوە لە سایەی بوونی چەكی كۆكوژی ئەو دەوڵەتە زلهێزانەدا كە پێدەچێت بگلێنە شەڕەكەوە؟.
 كۆریای باشور-ی هاوپەیمانی ویلایەتە یەكگرتووەكان و گەل-ەكەیشی، لایەنگریی هەڵچوونەكانی سەرۆك ترەمپ نەبوون، چونكە باش دەزانن كە ئەوان گەورەترین قوربانیەكان دەبن، لەبەرئەوەی كاردانەوەی كۆریای باكور بە چەكی تەقلیدی یاخود بە چەكی كۆكوژ، ئەوان بەئامانجدەگرێت لەگەڵ ئەو 30 هەزار سەربازەی كە لە بنكە سەربازیەكانی ئەمریكادا و لە ناویاندا جێگیركراون.
ئەوەی لە هەموو ئەمانە مەترسیدارترە ئەوەبوو كە دوایی دەركەوت فڕۆكەهەڵگری كارڵ ڤینسۆن-ی ئەمریكی، كە دۆناڵد ترەمپ فەرمانی پێدا بەپەلە بەرەو كەناراوەكانی كۆریا بڕوات، ماوەی مانگێك دەبوو لەو كەناراوانەدایە، ئەمەیش گاڵتەپێكردنێكی هەموو جیهانی ورووژاند.
نە گەلی ئەمریكا و نە گەلی كۆریای باشورییش هیچ جەنگێكیان لە دژی كۆریای باكور ناوێت، چونكە واتای وێرانەیی و زیانی مرۆیی و مادیی زۆر دەگەیەنێت، بۆیە پێدەچێت سەرۆك ترەمپ دركی بەم راستییە كردبێت و بڕیاری پاشگەزبوونەوەكەیی دابێت.
رەنگە قسەی هەندێك راست بن بەوەی كە كۆریای باكوریش پاشگەزبووەتەوە و بە ئەنقەست تاقیكردنەوەیەكی سەرنەكەوتووی مووشەكی بالیستیی بە ئاماژەی چین و لە پێناو ئاساییبوونەوەدا كردبێت و ملیدابێت بۆ سەرۆكی ئەمریكا بۆ پاشگەزبوونەوەی لە هەڕەشەكانی، ئەمە راستە، بەڵام لەداهاتوودا دەستبەرداری ئەو تاقیكردنەوانەی نابێت و دڕكێك دەبێت لە قوڕگی ملهوڕیی ئەمریكادا.
باش درك بەوە دەكەین كە راستگۆیی سەرۆك ترەمپ لە رۆچووندایە تەنانەت پێش ئەوەیش كە لە هەڵبژاردنە سەرۆكایەتەیكەدا سەركەوێت. بەدڵنیاییەوە ئەو تۆزە راستگۆییەیشی كە مابوویەوە لە كۆریای باكور و سوریادا لەدەستیدا، لانیكەم تا ئێستا.
سەرۆكی ئەمریكا درۆزنە، زمانپیسە، ئابڕووچووە، داوا لە سەرۆكی كۆریای باكور دەكات رەوشتی باش بێت و سەرۆكی سوریایش بە ئاژەڵ ناودەبات، بەمەیش ئەو ئاستە نزمە دەردەخات كە ویلایەتە یەكگرتووەكان پێیگەیشتووە.
ئەم سەرۆكە، ناشیرینترین رووی ویلایەتە یەكگرتووەكانی ئاشكراكرد، دەبێت بگۆڕدرێت چونكە تواناكانی جیهان دابین ناكات و گونجاو نییە و متمانەی ئەوەی نییە لەسەر دوگمەی ئەتۆم بێت.

created by Avesta Group and powered by Microsoft Azure