بۆچی پیۆنگ یانگ وەك بەغدا و دیمەشق و تەرابلوس نییە؟

بۆچوون / بیروڕا :: 18/04/2017

سەرچاوە: رەئی ئەلیەوم
وەرگێڕان: لوقمان محەمەد رەشید
وەك عەرەب و موسڵمان هەستمان بە سووكایەتی و لەهەمانكاتدا ئازارێكی زۆركرد كاتێك بینیمان رۆژنامە ئیسرائیلیەكان هۆشدارییان دایە ویلایەتە یەكگرتووەكان كە هێز و كەشتیگەلەكانی خۆی كۆدەكاتەوە بۆ هێرشكردنە سەر كۆریای باكور، هۆشداریی ئەوەیان دایە كە كۆریای باكور وەك سوریا نییە و خاوەنی ئامرازگەلی وەڵامدانەوەیە و كاردانەوەیەكی توندی دەبێت لەبەرامبەر هەر دوژمنكارییەك كە بكرێتە سەری، چونكە مووشەك و كڵاوەی ئەتۆمیی ئۆقیانوسبڕی هەیە.
سووكایەتیەكە لەوەوەیە كە  ئێمە وەك عەرەب بووینەتە (گاڵتەجاڕ) و كێڵگەی تاقیكردنەوەكان، خاكمان رەوایە و هەروەها خوێن و گیانی هاووڵاتیانیشمان، نەتەوەكان دەمیان ژەنیوەتە مەنجەڵمانەوە هەروەها لێكترازان و دادڕنی تائیفیشمان، كەسێتیەكانمان بوونەتە هێمای فیتنە و هاندان دژی ئەویدیی عەرەب و موسڵمان، هەموو ئەمانەیش لە چوارچێوەی پلانێكی پتەودایە بۆ بیانووی دوژمنایەتی لە ژێر پاساوی جۆراوجۆردا.  
 ئەو پلانە زیرەكە بە هەڵمەتی رێكخراو و بەرنامە بۆ داڕێژراو دەستپێدەكات لەسەر چەكی عەرەبیی كۆكوژ و پێویستیی لەناوبردنی، هەر هەوڵێكیش بۆ رەتكردنەوەی، زەمینەیەكی یاسایی و ئەخلاقیی بۆ دەڕەخسێنرێت بۆ دوژمنایەتی و لەناوبردن و گۆڕینی رژێمەكە بە هێزی سەربازی.
ئەوە بەرێكەوت نەبووە كە خاڵی هاوبەشی نێوان هەموو ئەو دەوڵەتە عەرەبییانەی رووبەڕووی دوژمنكاریی ئەمریكا بوونەتەوە، لەسەر داوای ئەمریكا و بە پشتیوانیی نەتەوە یەكگرتووەكان بووە بۆ داماڵیینی چەكە (كۆمەڵكوژەكەی) و بەتایبەت كیمیاویی و بە دەستبەرداربوونی ویستەكانی لە بەرپەرچدانەوەی ئەتۆمی-دا، بەڵام ئەم هەنگاوە پارێزبەندیی بۆ نەكراوە و بەدوایدا هەنگاوی دووەم هاتووە كە دوژمنكاریی یان داگیركاریی و یاخود هەردووكیان بووە پێكەوە. 
كاتێكیش ویلایەتە یەكگرتووەكان دڵنیادەبێت لەوەی كە ئەم دەوڵەتانە چەكی بەهێزیان بۆ بەرگریی لەخۆكردن نەماوە و ناتوانن زۆرترین زیان بە هێزی داگیركەر بگەیەنن، ئیتر دوژمنكاری و بۆردوومانە ئاسمانییەكان دەستپێدەكات.
لەم بارەیەوە سێ‌ دەوڵەتی عەرەبی رەنگدانەوەی نموونەیەكی روونن، ئەوانیش بریتین لە عێراق و لیبیا و سوریا كە چەكە كیمیاویەكانیان رادەستكرد، ئیتر بە زۆر و لەژێر گوشاری دوژمنكاریانە و بە هاوكاریكردن لەگەڵ تیمە پشكنێرە نێودەوڵەوتیەكاندا بووبێت یاخود دەرەنجامی لێدانی سەربازییانەی وێرانكەر و گەمارۆی برسیكردنێكی خنكێنەری زاڵمانە بووبێت.
ئیدارەكەی جۆرج بوش-ی كوڕ، سەرۆكی ئەمریكا، باش دەیزانی كە سەدام حسێن سەرۆكی عێراق راستگۆبوو لە هاوكاریكردنی تیمەكانی پشكنێرە نێودەوڵەتیەكاندا و ئاشكراكردنی هەرچی لە جبەخانە كیمیاوی و ئەتۆمیەكانیدا هەیە لە كەرەستە و چەك و تفاق و خۆڕاگریش بوو بەرامبەر هەموو ئەو سوكایەتپێكردنانەی پشكێنەرەكان كردیان كە زۆربەیان سیخوڕیش بوون، بە پشكنینی كۆشكەكانی و ژوورەكانی نووستنیشیەوە. كاتێكیش دڵنیابوو لەوەی كە ددانە كیمیاوی و نیمچە ئەتۆمیەكانی عێراقی كێشاوە، یەكسەر هێرشی كردە سەر و پەلاماری دا.
سەرهەنگ موعەمەر قەزافی، بووە قوربانیی فێڵی كەمتیارە فێڵبازەكە، تۆنی بلێر سەرەك وەزیرانی پێشووتری بریتانیا، كە قەناعەتی پێكرد بۆ ئەوەی چەكە كیمیاویە هەڵگیراوەكانی و كەرەستە ئەتۆمیەكانی، بە ڕەزامەندیی خۆی رادەست بكات بەرامبەر دابینكردنی پارێزبەندی و پاراستنی و وەرگرتنەوەی خۆی و رژێمەكەی سەرلەنوێ‌ لە كۆمەڵی نێودەوڵەتیدا. كاتێكیش چەك و تفاقەكانی رادەستكرد (خەڵەتاندن)ی شۆڕشی لە دژی بەرپاكرد و بڕیاردەرچوو بۆ پاراستنی شۆڕشگێڕان لە ئەگەری كوشتوبڕیان. شانۆگەریی پیلانگێڕییەكەیش بە رووخانی رژێمەكە و گۆڕینی لیبیا بۆ دەوڵەتێكی شكستخواردووی پڕ ئاژاوەی خوێناویی كۆتاییهات و خرایە ژێر كۆنترۆڵی میلیشیا یەكتركوژەكانەوە كە ئێستا لە لێواری دابەشبوونی یەكجارەكیدایە. 
سوریایش هەمان سینایۆی رووبەڕووكرایەوە و رووبەڕووی دەكرێتەوە، بەڵام بە قۆناغی ناخۆش، ئەوەبوو هەڕەشەی سەربازیی بەكارهێنرا، فڕۆكەهەڵگرەكان گردكرانەوە بۆ ئەوەی ناچار بكرێت چەكە كیمیاویەكانی رادەست بكات بەپێی رێككەوتنێك كە لە ساڵی 2013 كرا، پێش دوو هەفتە لەمەوبەریش بنكە سەربازیەكەی لە شعێرات كەوتە بەر بۆردوومانێكی مووشەكیی ئەمریكا بەهۆی تۆمەتباركردنێكی نەسەلمێنراو بە بەكارهێنانی چەكی كیمیاوی لە خان شێخون-ی نزیك ئیدلب.  
زیاتر لە سەد كەس لە لایەنگرانی رژێمی سوریا، كە نیوەیان منداڵ بوون، لە تەقینەوەیەكدا مردن لەكاتێكدا هەردوو شارۆچكەی فوعا و كفریا-ن جێدەهێشت بۆ جێبەجێكردنی رێككەوتنێك كە نەتەوە یەكگرتووەكان چاودێریی دەكرد لە چوارچێوەی فێڵێكی قاییمدا و لەناو بێدەنگیی عەرەبی و جیهانیدا، بەتایبەت ئەو دەوڵەتە عەربیانەی كە سەرپەرشتیی ئەم رێككەوتنە و ئەو رێككەوتنەی دیكەیان دەكرد كە پشتگیریی ئەوانە دەكەن ئەم كوشتارەیان ئەنجامداوە.
بێگومان كیم  یۆنگ ئۆن سەرۆكی كۆریای باكور، كە بە هیچ جۆرێك هیچ پەیوەندییەكی لەگەڵ ئیسرائیلدا نەبووە، ئەم وانە سەرشۆڕیەی عەرەبی وەرگرتووە كە ئەنجامێكی قورسیان هەبووە، بۆیە ناكەوێتە داوی ئەمریكاوە و تاقیكردنەوە ئەتۆمی و مووشەكە بالیستیەكانی راناگرێت، چونكە باش دەزانێت كە پێویستی بە هێزی بەرپەرچدانەوە دەبێت. رەنگە هەڕەشە جدییەكانی بە رووبەڕووبوونەوەی دوژمنكاریی ئەمریكا، بە هەمان هێز و چۆنایەتی، پارێزگاریی بۆ پەیدا بكات واتا بیپارێزێت.
لە هەموو ئەمانەیش گرنگتر ئەوەیە كە هاوپەیمانەكانی كۆریای باكور، چین و روسیا، وەك هاویەیمانەكانی عەرەب نین، بەڵكو بەڕێزتر و بە ئەخلاقترن و دەستبەرداری دۆستەكانیان نابن، وەك ئەوەی عەرەب دەیكات، بەتایبەت لە هەندێك دەوڵەتانی كەنداودا، بەرامبەر بە عێراق و سوریا و لیبیا. ئەمەیش جیاوازییەكی گەورەیە. 
ئەمریكا لە عەرەب دەدات بۆ تەمێكردنی ئەوانی دی، بەتایبەت كۆریای باكور و ئێران، بۆیە (دایكی بۆمبەكان) كە لە ئەفغانستان بەكاریهێنا و وترا تونێل و بنكەی (دەوڵەتی ئیسلامین) و هەروەها مووشەكە (تۆماهۆك)ەكان كە دران بە شعێرات-دا، هەموویان پەیامی ئاراستەكراون بۆ هەردوو دەوڵەتی كۆریای باكور و ئێران.
گەیشتینە دۆخێكی شەرمەزاریی عەرەب، كاتێك بڕیار و سەركردایەتی عەرەب لە دەوڵەتانی سەنتەرەوە گوێزرانەوە بۆ دەوڵەتانی كەنار كە خاوەن پارە و نەوت-ن و ئەمریكا بە هاوپەیمانێكی متمانەپێكراو دەبینن. بێگومان رۆڵی داهاتوویش گۆڕینی رژێمەكانە بەپێی قاموسی ئەمریكی، كە بەچەندین رێگە دەكرێت و تازەترینیشیان مایەپووچكردنی داراییە و  بێگومان بەڕێوەیە. 



created by Avesta Group and powered by Microsoft Azure