لە نیوەدوورگەی كۆریا تەپڵی جەنگ لێدەدرێت

بۆچوون / بیروڕا :: 16/04/2017

سەرچاوە: ئەلنەهار
وەرگێڕان: لوقمان محەمەد رەشید

 
تەپڵی جەنگ لە نیوەدوورگەی كۆریا لێدەدرێت. چەندین دەیەیە مەترسیەكە نەگەیشتووەتە ئەم هەڵكشانەی ئێستای و خەریكە دۆخەكە لە دەستی یاریچییەكان، كە بریتین لە دۆناڵد ترەمپ سەرۆكی ئەمریكا و كیم یۆنگ ئۆن سەركردەی كۆریای باكور و شی جینپینگ سەرۆكی چین، دەترازێت.
 هەر یەكێك لەوانە قورسایی خۆی دەخاتە ئەو رووبەڕووبوونەوەیەوە كە لە ئاسۆوە بەدەركەوتووە یان كە خەریكە رووبدات. ترەمپ فڕۆكەهەڵگریی (یو ئێس ئێس كارڵ ڤنسن)ی ناردووەتە نیوەدوورگەی كۆریا و (دایكی بۆمبەكان)ی لە لێدانی داعش لە ئەفغانستان بەكارهێنا كە بەدڵنیاییەوە لە پیۆنگ یانگ دەنگدانەوەی بووە. كیم یۆنگ-یش خۆی ئامادە دەكات بۆ ئەنجامدانی شەشەم تاقیكردنەوەی ئەتۆمیی یان بەلای كەمەوە تاقیكردنەوەیەك لەسەر مووشەكی بالیستیی دەكات وەك پەیامێكی مانادار بۆ ویلایەتە یەكگرتووەكان و ئامۆژگاریی ترەمپی پێدەكات بەوەی ئیرادەی پیۆنگ یانگ تاقینەكاتەوە دوای ئەو مووشەكانەی لە شەشی ئەم مانگەدا لە دوو كەشتیی ئەمریكایی و لە دەریای سپییەوە ئاراستەی فڕۆكەخانەی شوعێرات-ی سوریای كرد لە حمس. هەرچی (كۆشكی شین- بارەگای سەرۆكایەتیی لە كۆریای باشور)یشە، ئەوا كیم یۆنگ ئۆن دەڵێت لە ماوەی چەند خولەكێكدا وێران دەبێت ئەگەر رووبەڕووبوونەوەكە رووبدات. هەموو جیهانیش چاوەڕێی ئەوە بوون كە ئاخۆ سەركردەكەی كۆریای باكور لە رۆژی شەممە 15ی نیساندا، چۆن یادی جەژنی لەدایكبوونی كیم ئێڵ سۆنگ-ی باپیری و دامەزرێنەی وڵاتەكەی دەكاتەوە.
لە نێوان ترەمپ و كیم یۆنگ ئۆن-دا، چین-ی گەورەترین هێزی ئیقلیمی ناوچەكە وەستاوە كە تاقە رایەڵی پەیوەندیی نێوان جیهان و پیۆنگ یانگ-ە. پەكین هەوڵدەدات بە زمانێكی ئاشتەوایی بدوێت بۆ دوورخستنەوەی رووبەڕووبوونەوەیەك كە هیچ كەسێك ناتوانێت پێشبینیی مەوداكانی و ئەنجامەكانی بكات. شی جینپینگ هەوڵدەدات دارەكە لە ناوەڕاستیەوە بگرێت و زەمینەی لێكگەیشتن بدۆزێتەوە و لەهەمانكاتیشدا هەوڵ بۆ ئەوە دەدات نفوزی خۆی بەسەر پیۆنگ یانگ-ەوە بەكاربێنێت بۆئەوەی نەكەوێت و تەنانەت چووەپاڵ سزا نێودەوڵەتیەكانی سەر كۆریای باكورەوە و وەك پەیامێكی هۆشداریی هاوردەی خەڵووزی بەردینی لەو دەوڵەتە دراوسێیەی راگرت. بەڵام دیارە كیم یۆنگ ئۆن تا ئێستایش ناگۆڕێت و ناگونجێت. شی جینپینگ هەوڵی زۆری لەگەڵ ترەمپ-دا دا كاتێك لە 6 ی نیساندا لە هەوارگەی ماراولاگۆ لە ویلایەتی فلۆریدا یەكتریان بینی، بەڵام ترەمپ وەك كیم یۆنگ ئۆن بەئاسانی جڵەو ناكرێت.  
هەموو خەمێكی چین بۆ ئەوەیە رووبەڕووبوونەوە روونەدات كە دەبێتە هۆی پتەوبوونی مانەوە و بوونی ئەمریكا لە نزیك سنووری وڵاتەكەیەوە و نیگەرانیی خۆیشی ناشارێتەوە لە جێگیركردنی سیستمی (THAAD)ی دژە مووشەك لە كۆریای باشور لەلایەن ویلایەتەیەكگرتووەكانەوە وەك كاردانەوەیەك بەرامبەر تاقیكردنەوەی مووشەكە بالیستیەكانی ئەم دواییەی كۆریای باكور.
بەمجۆرە هەموان هەناسەیان لەخۆان بڕیوە لە چاوەڕوانیی ئەگەری رووبەڕووبوونەوە یاخود لە چاوەڕوانیی دەستپێشخەرییەكی دوا چركەدا كە شاپڵیتەی ئاڵۆزیەكە لابەرێت و ئامۆژگاریی لایەنەكان بكات تا بە ژیری و عەقڵ رەفتار بكەن.   


created by Avesta Group and powered by Microsoft Azure