ئەی تۆ؟

بۆچوون / بیروڕا :: 19/03/2017

+ چی یە ئەڵێ‌ ی ئەمشەو نەنوستویت؟
ـ نەبەخوا عەزیز... میوانێكم هاتبوو ماڵی بەقوڕنەگیرێ‌ ئەتگو تراكتۆرە و ناچێتە گێڕ. تا بەیانی نەیهێشتووە خەو بچێتە چاوم... تۆش بێتاقەت دیاری، خێر؟
+ نازانم لە خۆمەوە چاوم ئەفڕێ‌. زۆر ئەترسم.
ـ ئەی دەستی شكاوم هەی.. جاران بە ماركست ئەگو كۆنەپەرستە، ئێستا بڕوات بە چاوفڕین هەیە؟!.. ئەمەیە ئەڵێن ئینسان لە ئەخیری عومریا ئەبێ‌ بە میزی حوشتر.
+ هەتیو قەپۆز.. ئینسان ئەگەر بڕوای بە چاوفڕین هەبێ‌ میزی حوشترە؟!
ـ بێ‌ ئەدەبی نەبێ‌ بەڵێ‌..ئینسان مەفروزە عیلمی بێ‌. شتێك كە عیلم نەیسەلمێنێ‌ فشەیە.
+ عیلم عیلمی ئەمە ناكەی!.. رۆڵە گیان عیلم ئەگەر راست بوایە جوابی سوئالەكانی ئینسانی ئەدایەوە.
ـ سوئالی چی مەسەلەن؟
+ ئەڵێ‌ سوئالی چی؟!.. ملیۆنێ‌ سوئال هەیە.. مەسەلەن شتی وا رووئەدات ناچێ‌ بە ئەقڵی هیچ كەسێكا.
ـ ئاخر وەكو چی؟
+ وەكو بەعزێك لەم مەسئولانەی ئێستا.. كێ‌ باوەڕ ئەكا ئەمانە وەختی خۆی تێكۆشەر و پیاوی باش بوون؟
ـ ئەم مەسئولانەی خۆمان ئەفەرمووی؟
+ بەڵێ‌ بەڵێ‌.. ئەمانە كە ژیانیان لێ‌ كردووین بە قوزەڵقورت. كێ‌ باوەڕ ئەكا وەختی خۆی  ئینسانی چاك و خەباتگێڕ و گیانفیدا بووبن؟
ـ بە ساقەی چاوت بم جوابەكە زۆر ئاسانە...
+ ئاسانە؟
ـ بەڵێ‌.. ئەی تۆ نەتبیستووە ئەڵێ‌ شەیتانیش وەختی خۆی مەلائیكەت بووە.

created by Avesta Group and powered by Microsoft Azure