پەکەکە و شنگال و هەرێمى کوردستان

بۆچوون / بیروڕا :: 15/03/2017


  لە سەرەتاى ئەم مانگەدا، ئازارى ٢٠١٧، ڕاگەیەنرا کە ئەبێ پەکەکە ئەو شارو ناوچەیە چۆڵ بکات و ڕێگا واڵابێت بۆ هێزى پێشمەرگەى بەرەى کوردستانى سوریا.. گوایە شەڕ لە نێوان ئەوان و هێزى پێشمەرگەى هەرێمدا ڕوويداوە...هتد.


 پێموایە نووسەرێکى سیاسى پێشئەوەى بچێتە وردەکاريى ئەم کێشەیەوە، ئەبێ ئەم پرسیارانە بێنێتە کایەوە و وەڵامیانبداتەوە بۆئەوەى واقعیانە کێشەکە تاووتوێ بکات.
ــ ئایە پەکەکە دوژمن و داگیرکەرە؟
ــ ئایە ئەم شەرە شەرى پارتى و پەکەکەیە, یان حکومەتى هەرێم و پەکەکە؟
ــ لێرەدا کامەیە ڕۆلى حکومەتى کوردستان, هەڵوێستى چى یە؟ چ بریارێکى لەم بارەیەوە داوە؟ ئەى بۆچى حزبەکانى ناو حکومەت هەڵوێستى جیاوازیان هەیە؟
وەک هەموان ئەزانن پەکەکەـ بزوتنەوەیەکى نەتەوەخوازى گەلى چەوساوە و سەرکوتکراوى کوردى تورکیایە و لە ساڵى ٩٨٤ ەوە بەناچارى لەتاو سیاسەتى شؤڤێنیانە و دێکتاتۆریانەى حکومەتە یەک لە دواى یەکەکانى تورکیا ناچارکراوە دەستبداتە چەک. لەو ماوەیەدا چەند جارێک یەک لایانانە شەرى ڕاگرتووە و ئامادەى گفت و گۆى ئاشتیانە بووە. بەڵام حکومەتەکانى تورکیا ویستویانە بەبێ چەندوچون تەسلیم ببێ! تەنانەت ئامادەنەبوون کە لە دەستورى وڵاتدا ناوى کورد بهێنن!! یان هیچ کار و کردەوەیەکى ئەوتۆ بکەن کە جێگەى باوەر و متمانە بێت!! بگرە هێزى سوپاى تورکیا دوایان کەوتووە و سنوورەکانى عیراق و سوریاو ئێرانى بەزاندووە بۆ تارومارکردنیان. وەکو جارانى شۆرشى کوردى عیراق و حکومەتەکانى بەغدا.


ڕاستە پەکەکە خۆى بە نوێنەرى هەموو کورد و تاکە ڕزگارکەرى دائەنێ و لەو ڕوانگەیەوە ئەروانێتە حزب و لایەنە نەتەوەخوازەکانى تر... بةلام ئەمە هەر پیشەى پەکەکە نیە, بەڵکو پیشەى هەموو بزوتنەوەیەکى نەتەوایەتى ـ کۆن و نوێ ـ یە کە تەنها خۆى بە تاکە نوێنەر ئەزانێ. ئەوە دەمارى خۆسەپاندنە لاى هەموویان و بۆچوونێکى تاکرەوانەى هەڵە و زیانبەخشە بە گەوهەرى کێشە نەتەوایەتیەکە... دوژمنانى نەتەوەکەیش توانیویانە لەو کەلەبەرەوە پیلانە تیکدەرانەکەى خۆیان تێبپەرێنن!!... بە داخەوە لە مێژووى گەلەکەماندا نموونەى وەها زۆرە!! ئەوەتا کۆنەپەرستان و شۆڤێنیەکانى تورکیا بە پاڵپشتى ئەمریکا, پەکەکە بە تیرۆرست لەقەڵەمئەدەن!! جا ئاخۆ ئێمەیش (بزوتنەوەى نەتەوایەتى کوردستانى عیراق) بەهەمان شێوە ئەڕوانینە پەکەکە؟ هەر هەڵوێستى ئەوانمان هەیە؟! ... وەڵامى ئەم پرسیارە هەڵوێستەکە یەکلایى ئەکاتەوە. ئەگەر بە دوژمنى دائەنێین ئەوا لەگەڵیان بەشەردێین و بە زۆر دەریانئەپەڕێنین و تورکیا و ئەمریکا-یش هاوکاریمان ئەکەن!!   
ئەگەر بە پێچەوانەوەیە ئەوا ئەبێ بە گفتوگۆى هێمنانە و هاوسەنگەرانە مامەڵەیان لەگەڵدا بکرێ تا ئەگەینە مەبەست. 
ئەگەر ئەم شەرە شەرى پارتی و پەکەکەیە ئەوا ئەبێ ئەندامان و لایەنگران و هێزى چەکدارى پارتى ئەم شەرە بکەن نەک هێزى پێشمەرگەى کوردستان.
خۆ ئەگەر شەرەکەش هي حکومەتى هەرێمى کوردوستانە، ئەوا ئەبێ ئەم حکومەتە بە هەموو لایەنەکانیەوە کۆببێتەوە و بە زۆرینەى دەنگ، بگرە بە دەنگى ٢/٣ بریارى ناردنى هێزى پێشمەرگەى هەرێم بدات بۆ وەدەرنانى پەکەکە لە شنگال. نەک وەک ئێستا لایەنەکانى تر هەڵوێستى جیاوازیان هەیە. (سەرۆکى هەرێم) لەسەر ئەساسى ئەو زۆرینەیە بڕیار ئەدات.. دوا پرسیار ئەوەیە: وەکو هەموان ئەزانن هێزى پێشمەرگەى هەرێم بە شەرێکى قورسى خوێناوى و بە پشتیوانى هێزى ئاسمانى نێو دەوڵەتى (شنگال)ى لە چنگى خوێناوى داعش ڕزگار کرد. باشە پەکەکە, چۆن بوو بە هێزى داگیرکەرى (شنگال) ؟!!
بەهەر حاڵ ئەبێ زۆر وریابین. دوژمن بە چەپڵەرێزان و بە خەندەى خۆشبەختانە ئەمانگێڕنەوە بۆ شەڕى  کوردکوژى!!


 

created by Avesta Group and powered by Microsoft Azure