كۆنگرەكەی میونخ دژی ئێران بوو

بۆچوون / بیروڕا :: 22/02/2017

سەرچاوە: رەئیولیەوم
وەرگێڕان: لوقمان محەمەد رەشید
دوای هەرەسی یەكیەتی سۆڤیەت لە هەشتاكانی سەدەی رابردوودا، جۆزێف لۆند ئەمینداری گشتیی پەیمانی ناتۆ، لە كاتی خۆیدا، قسەیەكی كرد كە زەحمەتە لەبیرمان بچێتەوە، چونكە مایەی سەرسامی بوو، ناوەرۆكەكەی دەڵێت، دەبێت ئێستا نامۆ بە دوای (دوژمنێكی تازە)دا بگەڕێت و لەو باوەڕەیشدابوو كە گروپە ئیسلامییە توندڕەوەكان، لەوانەیە، لەم بوارەدا جێگەی یەكێتی سۆڤیەت بگرنەوە. 
نازانم بۆچی مستەر لۆند-م بیركەوتەوە لەم كاتەدا كە بە وردی چاودێریی رووداوەكانی كۆنگرەی ئەم دوایەی ئاسایشی میونخ دەكەم. ئەو كۆنگرەیەی كە تێیدا هەموو وڵاتانی بەشداربوو، ناكۆكیەكانیان خستەلاوە و هەموویان یەكگرتوو و هاوڕا بوون لەسەر (دوژمنێك) كە بەلایانەوە مەترسیدارترینی سەر ئاسایشی جیهان و ئارامییەتی، ئەویش ئێران-ە، نەك چین یان روسیا یاخود تەنانەت كۆریای باكوریش. 
قسەی یەكلاكەرەوە كە ئەم جووڵە كتوپڕ و لەناكاو هەڵكشاوە شیدەكاتەوە (ئیسرائیل)ە. ئیڤیگدۆر لێبرمان-ی وەزیری دەرەوە ئازایەتیەكی جوانی نواندووە و ستایش و پشتیوانێكی هێندەی بەدەستهێناوە كە تەنانەت لە تەلئەبیب-یش نایهێنێت، بەتایبەت لەلایەن عەرەبەكان و توركەكانەوە، بێگومان ئەمریكی و ئەوروپیەكانیش. ئەوەبوو وتەكەی، كە هەموو بڕگەكانی تەركیزی خستبووە سەر ئێران و مەترسیەكانی ئێران، چەپڵەی گەرم و توندی بۆ لێدرا.  
لیندسی گراهام سیناتۆری كۆماری و ئەندامی لیژنەی هێزە چەكدارەكان لە ئەنجومەنی پیرانی ئەمریكا، لە وتەكەیدا لەهەمان كۆنگرە، وتی كۆنگرێس تاووتوێی سەپاندنی سزای تازە دەكات بەسەر ئێراندا بەهۆی بەرنامە مووشەكیەكانیەوە كە هەڕەشەیە بۆ سەر ئارامیی خۆرهەڵاتی ناوەڕاست و پێشێلی بڕیارەكانی نەتەوە یەكگرتووەكان دەكات. هەروەها داوایكرد رەفتاری بگۆڕێت. 
پرسیار لە گراهام-ی سیناتۆر دەكەین دەربارەی ئەو گۆڕانەی كە پێشنیاری دەكات لە رەفتاری ئێراندا، وەڵامەكە لە ناوەرۆكی وتەكەیدایە كە رادیۆی فەرمیی (دەنگی ئەمریكا) چەند بڕگەیەكی لێ‌ بڵاوكردەوە و پوختەكەی دەڵێت"با ئێران وازبێنێت لە نووسینی دروشمی -مەرگ بۆ ئیسرائیل- لەسەر مووشەكەكانی".
بەمانایەكی تر، ئەگەر نووسینەكانی سەر مووشەكەكان، (مەرگ بۆ چین) یان (مەرگ بۆ روسیا) بێت، قەیناكات و رێگە بە ئێران دەدرێت كە مووشەكەكانی پێشبخات و پەرەیانپێبدات و هەر مانۆڕێك بكات كە خۆی دەیەوێت و هەموو تەكنۆلۆژیای مووشەكیی ئەمریكایش لەخزمەتیدایە و هیچ گرفتێك لە پیتاندنی یۆرانیۆمیدا نابێت، ئیتر بە هەر پلە و لە هەر ئاستێكدا كە خۆی بیەوێت و پێویستی بێت، بەڵام ئەگەر دروشم بنووسێت، تەنیا دروشم و هیچی تر، بڵێت (مەرگ بۆ ئیسرائیل) ئیتر ئەمە هێڵی سوورە و شایانی سزادانە و رەنگە لە داهاتوودا شایانی شەڕیش بێت. 
دیارە قەدەغەیە بۆ ئێمەی عەرەب و موسڵمان كە هەتا تەنانەت ئەو دروشمانەیش بنووسین كە دەمانەوێت مردنی ئیسرائیلی تێدابێت، تەنانەت ئەگەر هەر بۆ دڵدانەوە و بە زارەكییش بێت، ئەگەرنا سزادەدرێین و رەنگە مردنی راستەقینەیش ببینین و لە سوچێكەوە چاوەڕێمان بكات. هاوار و سەد هاوار بۆ ئەوەی ئازایەتی بنوێنێت و ئەم دەوڵەتە تووڕە بكات یان باسی تاوانەكانی جەنگی و ئۆردوگا جوونشینەكانی و ئیعدامە ئاشكراكانی بكات.
پێشبینی ئەوە دەكەین لە كۆنگرەی داهاتووی ئەمنیی میونخ-دا، سیناتۆر گراهام و وەزیرانی دەرەوەی توركیا و ئیسرائیل و شانشینی عەرەبستانی سعودیە، لیستێكی دروشمی تازەمان بۆ دیاری بكەن و پێویستی بكەن كە دەبێت منداڵەكانمان و نەوەكانمان لە ریزی بەیانیانی قوتابخانەدا بیڵێنەوە، ئەگەرنا دەكەونە بەر بۆردوومانی هاوپەیمانێتییە چوارقۆڵی و پێنجقۆڵیە تازەكانەوە كە ئیدارەی ترەمپ دەیەوێت لە چوار دەوڵەتی عەرەبی و ئیسرائیل پێكیبێنێت و ئامادەیە بۆ بۆردوومانێكی چڕی وێراكەر بۆ ئەوەی هەموومان لەناوبەرێت.   
ئێران دروشمی (مەرگ بۆ ئەمریكا)ی بۆ ماوەی زیاتر لە سی ساڵ وتەوە، ئەگەر زیاتریش نەبێت، ئاڵای ئەمریكای كردە بەرپێی ئێرانیەكان لە دەرگای ئوتێلەكانیدا، بەڵام ئەم رەفتارە رێگەپێدراوە و رەنگە بخرێتە لیستی (ئازادیی رادەربڕین)ەوە، كەچی دروشمی (مەرگ بۆ ئیسرائیل) هەر كەسێك بیڵێتەوە شایانی مردنە.
بەڕێز چاویش ئۆغڵو-ی وەزیری دەرەوەی توركیا، كە پێش شەش مانگێك لەمەوبەر فڕییە تاران بەدوای چارەسەری دەربازكردنی ئابوریی وڵاتەكەی لە هەرەس و داڕمانی دوای سەپاندنی سزای توندی ئابوری روسیا وەك كاردانەوەیەك بەرامبەر خستنەخوارەوەی فڕۆكەكەی لەسەر سنووری سوریا بە مووشەكێكی توركی، هەروەها وەك بەرایی و ئامادەكارییەك بۆ سەردانی رەجەب تەیب ئەردۆغان-ی سەرۆكی، كە ئێرانیەكان پێشوازییان لێكرد و لەگەڵیدا رێككەوتننامەی زیادكردنی ئاڵووێری بازرگانیی نێوان هەردوو وڵاتەكەیان لە 10 ملیار دۆلاری ساڵانەوە بۆ 30 ملیار دۆلار واژۆكرد، ئەو بەڕێز ئۆغڵو-وە لەسەر سەكۆی هەمان ئەو كۆنگرەیەوە وتی"رۆڵی ئێران تێكدانی ئارامیی ناوچەكەیە، بەتایبەت كە هەوڵی بڵاوكردنەوەی بیری شیعەگەرایی دەدات لە عێراق و سوریادا".
ئەم لێدوانانەی بەڕێز ئۆغڵو سەیرن! چۆن ئێستا لەناكاو ئێران بووە هۆی پەشێوی و تێكدانی ئارامیی ناوچەكە و بڵاوكردنەوەی شیعەگەرایی، كەچی پێش شەش مانگ لەمەوبەر كاتێك سەردانی كرد و داوای پشتگیری و پشتیوانی لێكرد و قسەیانكرد دەربارەی هاوكاریی نێوان دەوڵەتانی ئیسلامیی برای دراوسێ‌؟ ئایا ئێران لەگەڵ گەیشتنی ترەمپ بۆ كۆشكی سپی، واتا لە پێش تەنیا سێ‌ هەفتە لەمەوبەرەوە، كەوتووەتە بڵاوكردنەوەی بیری شیعەگەرایی؟ 
لە كۆتاییدا دەڵێین، ئەگەر نووسینی دروشمی مەرگ بۆ ئیسرائیل ببێتە هۆی سەپاندنی سزا و جووڵاندنی كەشتیە جەنگیەكان، ئەی ئەبێت كاردانەوەی ئیسرائیل و ئیدارەی ترەمپ چی بێت بەرامبەر شەشەمین كۆنگرەی نێودەوڵەتی كە ئەمڕۆ ئێران، بە بەشداریی 80 دەوڵەت، میوانداریی دەكات و هەموو (تیرۆریستەكان)ی جیهانی ئیسلامی، بەپێی وەسفەكانی ئیسرائیل و ئەمریكا و هەروەها عەرەبیش، هەموویان لەسەر سەكۆی كۆنگرەكەوە داوای ئازادكردنی هەموو خاكە داگیركراوەكانی عەرەب و خاپووركردنی دەوڵەتی ئیسرائیل دەكەن؟
 ئەوەی سەركردایەتی ئەم هەڵمەتەی دژی ئێران دەكات، لە عەرەب و ئیسرائیلی و ئەمریكیەكان، خزمەتێك پێشكەش بە ئێران دەكەن كە خەونیشی پێوە نەبینیوە، ئەویش هاوسۆزیی رێژەیەكی زۆری عەرەب و موسڵمانانە، هەروەها دژی ئەو رژێمانەیش كە دوژمنایەتیی دەكەن و پیلانی لە دژ دەگێڕن، بەڵام فەلەستین، سەرەڕای ریسواكردنی عەرەب لەلایەن هەندێك لە ئامرازەكانی ئەمریكا لە ناوچەكەوە، هەر بە توخم و رەگەزی یەكێتیی عەرەب و موسڵمانان، یاخود زۆربەی هەرەزۆریان، دەمێنێتەوە.
ئەمریكا زیانی پێنج تریلیۆن دۆلار و پێنج هەزار سەرباز و سی هەزار برینداری لێكەوتووە، ئاخۆ خۆی و ئیسرائیل چەند زیانی تریان بەردەكەوێت ئەگەر بگلێنە شەڕێكی ئێرانەوە؟ ئەو ئێرانەی كە رووبەرەكەی دوو هێندە و زیاتریشە لە رووبەری عێراق، ئەگەر زیاتریش نەبێت. ئەی ئایا پارەكانی كەنداو بەسن بۆ پڕكردنەوە و قەرەبووكردنەوەی ئەو زیانە داراییە؟ 
بڕوا بەمەناكەین تەنانەت ئەگەر سعودیە هەموو كۆمپانیاكانیشی، هەر لە (سابك)ەوە هەتا دەگاتە (ئارامكۆ) و بە هەموو كێڵگەكانی نەوت و كانە كانزاییەكانی نێوانیشیانەوە، بفرۆشێت.



created by Avesta Group and powered by Microsoft Azure

بەپەلە