ترەمپ تەواو وەك خۆمان وایە

بۆچوون / بیروڕا :: 08/02/2017

سەرچاوە: ئەلنەهار
وەرگێڕان: لوقمان محەمەد رەشید
بەدەر لەوەی كە دۆناڵد ترەمپ سەرۆكی ئەمریكا لە سیاسەتی دەرەوەیدا پلانی بۆ دادەنێت و رەنگە سیاسەتەكانی رایبكێشنە ناو جەنگ و قەیرانی جیهانییەوە، بەڵام رەخنەی عەرەب و موسڵمان و هەندێك لە مەسیحیەكانیش بۆ سەرۆكە تازەكە لەجێی خۆیدا نین، چونكە ترەمپ-یش هەروەك ئەوان وایە.
 رەگەزپەرستی روو و سیمای جۆراوجۆری هەیە كە ترەمپ مومارەسەی دەكات و ئەوانەیش كە رەخنەی لێدەگرن جێبەجێی دەكەن و ئێمەیش لەوانین، هەموویشیان لەگەڵ بنەما جیهانیەكانی مافی مرۆڤدا ناكۆكن، هەروەها لەگەڵ سادەترین مافە ئاساییەكانی مرۆڤیشدا نایەنەوە كە نابێت نە یاسا و نە شەرع و نە دابونەرتەكانیش دیاریی بكەن. 
ترەمپ سیاسەتێكی رەگەزپەرستانە لە بەرامبەر هاووڵاتیانی 7 دەوڵەتی موسڵمان یان زۆرینە موسڵماندا پەیڕەو دەكات نەك لە بەرامبەر هەموو موسڵماناندا، چونكە رێگریی لە گەشتی هاووڵاتیی وڵاتانی كەنداو یاخود میسر نەكردووە و هەروەها قەدەغەی نەخستووەتە سەر موسڵمانی بریتانی و فرەنسی و جەزائیری و مەغریبی.
بەپاساوی پاراستنی نەتەوە، گەشتكردن بۆ ئەمریكا رووبەڕووی بێزاری و سەغڵەتكردن دەبێتەوە، لە بەرامبەردا رێگریی دەكرێت لە هەموو هاووڵاتیەكی عەرەب لە جیهانی عەرەبیدا و بێزاردەكرێت. هاووڵاتی عەرەب پێویستی بە ڤیزایە بۆ ئەوەی سەردانی وڵاتێكی دیكەی عەرەبی بكات، جاری وا هەیە دەبێت مانگێك چاوەڕێ‌ بكات و هەندێك جاریش ڤیزای نادرێتێ‌، بێ‌ ئەوەی مافی ئەوەی هەبێت پرسیار لە هۆكارەكەی بكات. مامەڵەی لووتبەرزانە لەگەڵ عەرەبدا دەكرێت لە وڵاتەكانی خۆیاندا، بۆ نموونە ڤیزا دەدرێت بە هاووڵاتیانی وڵاتە دەوڵەمەندەكان، كەچی دیپلۆماتكارانی وڵاتە زۆر هەژارەكان رێوشوێنی توندیان لە بەرامبەردا پەیڕەودەكرێت. خۆ ئەگەر ترەمپ زاڵمێك بێت ئەوا فەرمانڕەوایانی عەرەب زۆرینەیان زاڵمن، چونكە هاووڵاتیانی خۆیان دەكوژن لەپێناو مانەوەیان لە دەسەڵات و گۆڕانكاریی نەكردن لە حوكمیاندا. نموونەگەلی زۆری لەمجۆرەمان بینی لە لیبیا و عێراق و میسر و هیتریشدا، نموونەی سوریایش هەیە كە هێشتا بەردەوامە لە كوشتنی گەلەكەیدا. ئیتر بەڕاست كامیان بەرامبەر بە عەرەب زاڵمترن، ترەمپ یان فەرمانڕەواكانی خۆیان؟.
رەگەزپەرستیی ترەمپ دژی موسڵمانەكانە و رەگەزپەرستیی موسڵمانەكانیش دژی هاووڵاتییە مەسیحیەكانیانە، چونكە مامەڵەی (ئەهلی زممە)یان لەگەڵ دەكەن بێ‌ ئەوەی بە ئاشكرا ناویان بێنن، ئەمانە هیچ مافێكیان نییە تەنانەت لای ئەو رێكخراوە عەرەبییانەیش كە كرانەوەیەكیان بە رووی خۆرئاوادا هەیە.
مەسیحیەكانیشمان هەروەك موسڵمانان، لەبەرامبەر كرێكارە رەشپێستەكاندا رەگەزپەرستن، واتا لەگەڵ ئەو پاككەرەوانەی كە لە ماڵەكان و كارگەكان و وێستگەكانی سووتەمەنیدا كاردەكەن، بە لووتبەرزی و خۆبادانەوە مامەڵەیان لەگەڵدا دەكەن. پشوو و پیاسە و سەردانی یەكتر لە ژنە كارەكەرەكان قەدەغە دەكەن و هەندێكجار تەنانەت خواردنیشیان نادەنێ‌.
خۆ ئەگەر ئامانجی یەكەمی ترەمپ (كار)ی ئەمریكیەكان بێت، ئەوا هەمان ئەو مافە پیادە دەكات كە ئێستا هەموو وڵاتە عەرەبیەكان پەیڕەوی دەكەن، ئەوەتا لوبنان سكاڵایەتی لە كرێكارانی سوریا و دژایەتییان دەكات، وڵاتانی كەنداوی عەرەبی هەر لە سعودیەوە تا ئیمارات و ئەوانیتریشیان، پلانی كەمكردنەوەی كرێكارانی بیانی و گۆڕینیانی هەیە بە كرێكارانی ناوخۆییان.
راستە هەموو ئەوانەی لە سەرەوە وتران پاساوێك نین بۆ رەفتارەكانی ترەمپ و ئەو ئەمریكایەی كە هاووڵاتیەكانی خۆیی راهێناوە لەسەر ئازادی و دیموكراسی و خەریكە وڵاتەكە بگاتە كاروانی دواكەوتوویی ئێمە، بەڵام ئەوەیش راستە كە پێویستە رەخنەلێگرانی ترەمپ تۆزێك لەبەردەم ئاوێنەدا بوەستن پێش ئەوەی دەمهەڵێننەوە و وشەیەك بڵێن، یەكەمجار دەستپێشخەری بكەن بۆ گۆڕینی خۆیان و وڵاتەكانیان. 








created by Avesta Group and powered by Microsoft Azure