وەچەی مەڕی (دۆلی)

بۆچوون / بیروڕا :: 02/02/2017

سەرچاوە: ئەلمەدا
وەرگێڕان: لوقمان محەمەد رەشید


ماوەی مانگێكە تیمێكی لێكۆڵەرە نێودەوڵەتییەكان بۆ ئاشكراكردنی دۆسیەكانی گەندەڵی، سەرقاڵی كارەكەكەیانن لە بەغدا، ئەمەیش بەپێی رێككەوتنێك لەگەڵ رێكخراوی نەتەوە یەكگرتووەكاندا. بەگوێرەی ئەنجامە نێودەوڵەتییەكان و بە قسەی بەرپرسانی حكومییش، بەدواداچوون بۆ ملیارەها دۆلار كراوە كە لەماوەی ساڵانی رابردوودا بەتاڵانی براونەتە دەرەوە. هەروەها ئەو بەرپرسە جێبەجێكار و كەسێتیە سیاسیانەیش كە لەپشت ئەو تاڵانكاریەوەن و بەردەوام دروشمی بەرگریی لە ستەملێكراوە عێراقییەكانیان بەرزكردووەتەوە. كەچی لە سەعاتی بڕاندنەوە و یەكلاكەرەوەدا (الحسم)، حەسمی پارەی میلـلەتیان كردووە.
زاراوەی (الحواسم)، عێراقییەكان لە دوای داگیركردنەكەی ئەمریكاوە دایانهێنا و بەو كەسانەیان دەگوت كە خۆی دەكردە كەسێتی عەلی بابا، ئەو دزە زۆرزانەی كە هێندە لێهاتوو بوو كلی لەچاوان دەدزی. پاشان زاراوەكە گوازرایەوە بۆ فەرمانگە حكومییەكان و بووە هێمای جیاكاریی كەموكورتیی زۆربەی بەرپرسەكان لە حكومەتە یەك لەدوای یەكەكاندا. ئەوانەی ئاڵای (الحواسم)یان بەرزكردبووەوە، هەر لەسایەی ئەو دروشمەدا پارەی میلـلەتیان دزی و خستیانە حساباتە تایبەتەكانی خۆیانەوە لە بانقە بیانییەكاندا و دەزگا چاودێرییەكانیش نەیانتوانی شوێنیانهەڵگرن، بۆیە حكومەتی ئێستا ناچاربوو پەنا بباتەبەر تیمێكی لێكۆڵیاری نێودەوڵەتی بۆ دۆزینەوەی ئەوانەی كە رێگە و شێوازی تازەیان داهێناوە لە زیادكردنی باڵانسی دراوی بیانی-یاندا.
  هێزە سیاسیە عێراقییەكان بەهەر دە پەنجەكە واژۆیان كرد و  پشتیوانیی خۆیان بۆ رێكار و رێوشوێنەكانی حكومەتی ئێستا راگەیاند لە بەرەنگاربوونەوەی گەندەڵیدا و داوای راپێچكردنی تۆمەتبارانی دۆسیەی گەندەڵییان دەكرد لە بەرپرسەكانی پێشوو و ئەوانەی ئێستایش بە جیاوازیی پلە جیهادیەكانیانەوە، بۆ بەردەمی دادگا و  پێش ئەوەیش دەستبگیرێت بەسەر موڵك و ماڵی گوازراوە و نەگوازراوەیاندا. قسەی هێزە سیاسیەكان لەم بوارەدا، ئەوسا و ئێستایش لەوپەڕی شەفافیەت و روونی و راشكاویدایە، بەڵام هەڵوێستی راگەیەنراوی پەیوەست بەم بارەیەوە كۆتاییهات وەك باقی دروشمە سواوەكان كە بەمەرامی بانگەشە و ئاراستەكردنی پەیام بۆ رایگشتی دەریاندەكرد بەوەی كە فڵانە حزب سەرسەخترین دوژمنی گەندەڵییە و لەهەمانكاتیشدا لیژنە ئابورییەكەی دەهێڵێتەوە بۆ پاشەكەوتكردنی ماڵی سپی لە رۆژی رەشدا. ئەم جۆرە بانگەشە و هاوشێوەكانیان، دەچنە چوارچێوەی هەڵمەتی بازاڕگەرمیی درۆوە. ئەمانە كە لە لایەنە سیاسیەكانەوە دەردەچن خەڵكی باوەڕیان پێدەكەن، ئەویش بە پشتبەستن بەو راستیەی كە سیاسەتمەداری راستگۆ لە هەڵوێست و قسەكانیدا ئەوەیە تێدەكۆشێت و خەبات دەكات لە پێناو بەدیهێنانی بەرژەوەندیەكانی گەلەكەیدا. رەنگە ئەم قسەیە راست بێ بۆ ئەو رێكخراو و كەسێتیە سیاسیانەی كە بۆ دەیان ساڵ دەبێت گۆڕەپانەكەیان جێهێشتووە و نەوەیەكی نوێ‌ جێگەی گرتوونەتەوە كە خوری دەچێنێت بۆ بەرهەمهێنانی مەڕ.
ئەوانەی بڕوایان بە تیۆری چاندنی خوری هەیە، درۆ بە ڕیشی خەڵك دەكەن و بە ڕدێنیان پێدەكەنن (پێیانڕادەبوێرن)، كێشەكەیش لەوەدایە هەندێك هەن بڕوایان پێدەكەن و وادەزانن بە چاندنی خوری، سامانی ئاژەڵی لە عێراقدا دەبێتە دوو هێندە و ئیتر عێراق لە جیهاندا دەبێتە سەرچاوەی ژمارە یەك لە مەڕدا و كەس ركابەریی ناكات مەگەر ئوسترالیا ئەویش لە هەناردەكردنی كەنغەردا.  چیرۆكی رواندنی خوری بۆ بەرهەمهێنانی مەڕ، رەگێكی مێژوویی هەیە و لە حیكایەتە میلـلییەكاندا هاتووە. پاڵەوانەكەی كەسێك بووە كە بانگەشەی دانایی و مەعریفەی كردووە، توانیویەتی بە فڕوفێڵ و تەڵەكەبازیی خۆی، خۆی بگەیەنێتە پۆستی راوێكاری یەكێك لە پاشاكانی زەمانی زوو. ئامۆژگاریی خاوەن شكۆی كردووە تا فەرمانێك دەربكات و بە رەعیەتەكەی بڵێت خوری بڕوێنن بۆ رووبەڕووبوونەوەی كێشەی بێبارانی و وشكەساڵی. بەڵام مەرجی ئەوەیشی بۆ هەموان داناوە، لەپێش هەموویشیانەوە خاوەن شكۆ و دەستوپێوەندەكەی، كە دەبێت وەك مەڕ بباڕێنێت بۆ ئەوەی ژینگەیەكی گونجاو و لەبار بۆ زیادبوونی بەرهەم فەراهەم ببێت. نامەعقوڵیەتیی چیرۆكەكە لەوەدایە كە یەكێك لە رەعیتەكان وتوویەتی دەیان سەر مەڕی دووریوەتەوە و وەك دیاری پێشكەشیكردووە بە خاوەن شكۆ، چونكە بە پیرۆزی و دروودی ئەو، خوریەكە گۆڕاوە بۆ مەڕ. ئیتر بۆخۆیان بەخۆشی ژیاون هەتا پێش كۆپیكردنەكەی مەڕە (دۆلی).


created by Avesta Group and powered by Microsoft Azure