ئیستعلامات و سكرتێر و تەڕەماش

بۆچوون / بیروڕا :: 25/01/2017

لەژیانمدا حەزم لەموراجەعەی دەوائیری حكومەت نەبوە.. ئەوەندە ركم لە موراجەعاتە حەتا چاكەتو پانتۆڕەكانیشم بەمندارەكانم دەنێرمە ئووتی.. لۆیە ئێستا تەماشای دیوە سپیەكەی پانتۆڕەكانم بكەی ناوی هەمو كوڕەكانمی لەسەر نوسرایە، ناوی دوو كوڕم لە گیرفانەكانی پێشەوە، لەپشتەوەش ناوی دووەكەی دی..
لەو رۆژانە برادەرەكم تەلەفۆنی لۆ كردم گۆتی حەز دەكەم بتبینم، مەوعیدمان دانا بچمە لای لەمەقەرە حزبیەكەی..خۆم تاسو لووس كردو بەچاكەتو پانتۆڕەكەی بەناوی مندارەكانمەوە چومە مەوعیدەكە.. ویستم لەدەرگای رەئیسییەوە بچمە ژۆرێ، لەپشتەوە حەڕەسەكی چەكدار هاواری لێكردم دەستی لەسەر پەلاپیتكەی تفەنگەكەی بو، وامزانی داعشو قاعیدەو نوسرەو بۆكۆحەرام مەقەڕەكەیان تەوق كردیە، دەبینم رووم تێدەكاو دەپرسی" كێوە دەچی"؟. ئەمنیش گۆتم مەوعیدم لەگەر فلانە كەسە دەمەوی بچمەلای.. ئەویش پێی گۆتم" ئەوجا وا دەزانی فەوزایە، یان مەزادخانەیە بەكەیفی خۆت بێی وبچی.. نەتبیستوە میسریەكان دەرێن" دخول حەمام مش زەی خروجو"؟!. ئەمنیش پێمگۆت" كاكە خۆ من نەهاتیمە لەمەكتەب سیاسیەكەتان سەرم بشۆم، هاتیمە ئەو برادەرە ببینم.. ئەوجا گۆتی" دەبڕۆ ئەو ئیستیعلاماتەی بەرامبەرمان". تەبعەن ئیستیعلامەتەكە بەرامبەر نەبو نێزیكەی سەت مەتر دوور بو. چومە ئیستعیلامات كابرا گۆتی" هەویەكەتم بدی، ئەگەر هەویەت هەرنەگرتیە، نفووس، ئەگەر نفووسیشت پێ نیە جنسیەی عیراقیتم بدێ؟!. هەویەكەم دایەو گۆتی" ئەوە ناوی سێیانی خۆتو بابو باپیرتە، ناوی بابی باپیرتم بدێ؟؟!!. گۆتم" برادەر بابی باپیرم لەقەرنی نۆزدەدا مردیە ناوی ئەوت لۆ چییە؟. گۆتی" ئەوە تەعلیماتە. ئەوجا داوای رەقەمی مۆبایلی لێكردم. پێمگۆت" كاكە رەقەم مۆبایلت لۆ چییە، یەعنی تەسەور دەكەی بچم لەژۆرێ خۆم بتەقێنمەوە لەبەرامبەر برادەرەكەم، ئەگەر واشبكەم چ پێویست بەرەقەمەكەم دەكا، یەعنی دەتەوێ دوای خۆتەقاندنم تەلەفۆنم لۆ بكەی؟!. كابرا تووڕە بو، بەس ئەمن ساردم كردەوەو چومە ژۆرێ.
ئەوڕۆ وایلێهاتییە مام غەفوری تەسبیحفرۆشیش ئیشی بكەویتە دائیرەی مەحكەمەوە دەبی مۆبایلەكەی لەئیستعلامات دابنێ، نەوەكا مام غەفور مۆبایلەكەی لوغمرێژ كردبیو، مام صاڵحی برادەری لەبەر دەركی مزگەفتی گەورەوە بەنووكەیەك بیتەقینیتەوە.. وەكی ئەوەی مام غەفورو مام صاڵح دوو موهەندیسی ئەلیكترونی ئەوەندە گەورەبن شارەزاییان لە بۆمبی تەوقیتكراودا هەبی؟!,
لەزەمانی مەدا دەركەی هەمو دائیرەكان لەسەر پشت بون، نە ئیستیعلاماتو نەسكرتێر،نە نوسینگەی تایبەت و تەڕەماش، هەبو نەبو یەك فەراش لەبەر دەركەی مودیر رادەوەستاو داوای هەویەی لەكەسیش نەدەكرد، دەچوینە ژۆرێ و لەسەر قەنەفە پێ لەسەر پێ دادەنیشتینو چایەكی گەرمیشیان لۆ دەهیناینو ئیشەكەشیان لۆ دەكردین ئەوانیش مەمنون، ئێستا هەتا ئیشەكەت لۆ دەكەن روحت دەردەیننو سێ چار تابقت پێدەكەنو مەمنونیشت نابن، وەكی ئەوەی ئەتوو معاشەكەیانت بەناوی پاشەكەفتەوە بڕیبی.
لەزەمانی مەدا لەفەڕاشەوە بگرە حەتا دەگاتە مودیرەكە لەخزمەتی هاوراتیاندا بون، مودیرو حاكمو قایمقامو محافزیش دەمەو عەسران دەهاتنە ناو بازاڕ ولەچایخانەكان دادەنیشتنو سەریان لەقەیسەری دەدا، ئێستا هەر مەسئوولەك جەیشەك حیمایەی لەگەرەو هەندەكیان دەبابەو مودەرەعەش لەگەریان دەسورێتەوە، بێ لەوەی یەكدو لیوا عەسكەریش لەسەر ڕێیەكان دادەندرێن ئەگەر بیەوێ‌ سەفەری شارەكی دی بكا، حەتا وای لێهاتیە گۆرانیبێژە قەرەجەكانیش حیمایەو بۆدی گاردیان هەیە بە تفەنگی ئەمەریكییەوە.
ئاخر ئەو خەركە ئەوها كەپووی برند بوەو وەكی قارۆنی گۆڕبەگۆڕ مەغرور بونەو پۆز لەسەر خەركی لێدەدەن لۆیە حارمان بەو حارە گەشتیە، هەندەك لەسەری سەرەوەن زۆرتریشیان لە بنی بنەوە لەبرسا دەنارێنن، ئەوە حەموی غەزەبی خوایە لۆیە بارانیش ناباری..هەرچەندە ئەمن فەلاحیش نیم چاوەڕیی باران بكەم، بەران زۆر دەمەكە پێشنیان گۆتیتیان" باران رەحمەتە". ئێستاش كە كابرای ئیستیعلامات رەحم بە موراجیع ناكاو، مەسئولیش زەمیری ئیجازەی ئەبەدی وەرگرتیە، حارمان لەوە باشتر نابی، ئەوجا باقی وەلسەلام..

created by Avesta Group and powered by Microsoft Azure