بریندارانی حەڵەب...و...ئیسرائیل و عەرەب

بۆچوون / بیروڕا :: 22/12/2016

سەرچاوە: رەئیولیەوم
وەرگێڕان: لوقمان محەمەد رەشید
چەندین وێستگەی ئازارابەخش لە كارەساتەكەی سوریادا هەن، بەڵام بە ئازارترینیان لەلای ئێمە ئەوەیە كە بنیامین نەتانیاهۆ لێمان دەرپەڕێت و وەك ئەوەی لە دیداری ساڵانەی لەگەڵ پەیامنێرانی بیانی كە لە تەلئەبیب كاردەكەن، بڵێت حكومەتەكەی داوای لە وەزارەتی دەرەوەی كردووە رێگەیەك بدۆزێتەوە بۆ گواستنەوەی هاووڵاتییە بریندارەكانی سوریای ناو شاری حەڵەب بۆ ئەوەی لە نەخۆشخانەكانی ئیسرائیلدا چارەسەر بكرێن. جەختیش لەوە بكاتەوە كە، دەوڵەتی ئیسرائیلی داگیركەر، هەزاران برینداری سوریی چارەسەركردووە.
نەتانیاهۆیەك كە سەرۆكایەتی حكومەتی دەوڵەتێكی داگیركەری خاكی عەرەبی و لە ناویشیدا بەرزاییەكانی جۆلان دەكات و كوشتوبڕی زۆری كردووە و ئێستایش بە دەیان و بە سەدان عەرەب و موسڵمان دەكوژێت و سەردەبڕێت، بێتوو بەسەر بریندارانی سوریادا بگری و بیەوێت لە نەخۆشخانەكانیدا چارەسەریان بكات، ئەمە ئەوپەڕی كارەسات و لوتكەی سوكێتیی عەرەبە.
بەدڵنیاییەوە سەرەك وەزیرانی ئیسرائیل كە فڕۆكەكانی بەردەوام سوریا و پێش ئەویش كەرتی غەزە-یان بۆردوومانكردووە، هەروەها هێزە ئەمنیەكانی ئیعدامی بە كۆمەڵی راپەڕیوە فەلەستینیەكانی دژی داگیركاریەكەی لە كەناری خۆرئاوا و كەتی غەزە ئەنجامداوە، دەیەوێت ئەم كاتە قورس و زەحمەتەی سوریا و ئەو دابەشبوونەی نێوان رۆڵەكانی بقۆزێتەوە، بۆ ئەوەی بازرگانی بە نەهامەتیەكانی حەڵەب و هەروەها بە كوشتن و ماڵوێرانیی خەڵكەكەیەوە بكات و كڕیار بۆ ئەو كاڵایانەی بدۆزێتەوە كە سوورە بەخوێنی سوری و میسری و لوبنانی و فەلەستینی و ئەوانی دیكەیش. 
بەڵێ‌، بەهەزاران سوریی لە هەردوو بەری سنووری حەڵەب-دان كە پێویستیان بە چاودێریی تەندروستی و پزیشكیی هەیە بۆ رزگاركردنی ژیانیان لەو بەركەوتە جەستەیی و دەروونیانەی كە بەریانكەوتووە، بەڵام لەلایەن نەتانیاهۆ و نەخۆشخانەكانی و پزیشكەكانی ئەوەوە نا، بەڵكو لەلایەن كەسوكارە عەرەب و موسڵمانەكانی خۆیانەوە. چونكە زیاتر لە 56 دەوڵەتی عەرەبی و ئیسلامی هەن و هەندێكیان خاوەنی سەدان ملیار دۆلارن و پێشكەوتووترین نەخۆشخانەی جیهانیان هەیە.
جێی داخە دەوڵەتە عەرەبییەكان كە بە پارە و بە چەكیش پشتگیریی جەنگەكەی سوریایان كردووە، لە سەختترین كاتدا دەستیان لە خەڵكی حەڵەب بەردا و بەهیچ جۆرێك شتێكی وامان لێ‌ نەبیستن كە تیمێكی پزیشكی یان نەخۆشخانەیەكی گەڕۆك بنێرن تا بەبێ‌ جیاوازیی تائیفی و ئیتنی و سیاسی چاودێریی تەندروستییان پێشكەش بكەن. چونكە بەهاناوەچوون و رزگاركردنی ئەو بریندارانە بووەتە مەسەلەیەكی تەواو مرۆیی و ئەركێكی نیشتمانی و ئەخلاقی.
دەزانین بەڵام تێناگەین لەو بیانووەی كە ئەم دەوڵەتانە دەیهێننەوە بۆ داخستنی سنورەكانیان و فڕوكەخانەكانیان بە ڕووی كۆچبەرە سورییەكاندا، كەچی وڵاتە دراوسێ‌ عەرەبییە هەژارەكان لەڕووی مادی و دەوڵەمەند لەڕووی كەرامەت و شەرەفەوە، وەك ئوردن و لوبنان، سنوورەكانیان بۆ دەكەنەوە. بەڵام لەوانە تێناگەین كە هیچ خۆبەخشییەكی چارەسەری بریندارە سورییەكانیان نییە كەچی شەو و رۆژ باسی ئەوەدەكەن كە ئەوان خەمی گەلی سوریا-یان هەیە و دیموكراسی و مافەكانی مرۆڤ و رووخانی رژێمە دیكتاتۆرەكەیانیان دەوێت.
كاتێك هەندێك عەرەب پێیانوایە كە دەوڵەتی داگیركەر دوژمنمان نییە بەڵكو هاوپەیمانێكە و دەكرێت پشتی پێببەستین و هەوڵی ئاسایبوونەوە دەدەن لەگەڵیدا، هیچ سەرسامنابین بە كارێكی سووكایەتی و شەرمەزاریی وەك ئەمەی نەتانیاهۆ. سەردەمی كوفر و شكستە.

created by Avesta Group and powered by Microsoft Azure

بەپەلە