دواپیاوی نەوەی مەزنەكان كۆچی دوایی كرد

بۆچوون / بیروڕا :: 28/11/2016

نووسینی: عەبدولباری عەتوان
سەرچاوە: رەئیولیەوم
وەرگێڕان: لوقمان محەمەد رەشید

فیدڵ كاسترۆ، دواكەسی پیاوە مەزنەكان و سەركردە شۆڕشگێڕەكان و دوژمنی سەرسەختی ئەمریكای دڕندە و سیمبولی خۆڕاگریی و ئاڵنگاریی لە رووبەڕووبوونەوەی هەموو كارێكی ریسوایی گەمارۆ ستەمكارە برسیكەرەكانەوە، كۆچی دوایی كرد.
ئەو پیاوەی كە بە درێژایی پەنجا ساڵەی فەرمانڕەوایی، دووورگەی كۆریای ونبووی ناو دەریای كاریبی-ی خستە دڵی نەخشەی جیهانەوە و كردیە سەرچاوەیەكی ئیلهامبەخش بۆ شۆڕشەكانی ئەمریكای لاتین و هەموو جیهانی سێیەم.
ئاڵنگاریی 11 سەرۆكی ئەمریكای كرد و زیاتر لە 638 هەوڵی كوشتنی خۆیی پووچەڵكردەوە كە ئاژانسی ناوەندی هەواڵگریی ئەمریكا بۆی داڕشتبوو. هەروەها نەخوێندەواریی لە وڵاتەكەیدا قەلاچۆكرد. سیستمێكی تەندروستیی وای دانا لە هەموو جیهاندا وێنەی نییە و بناغەی سیستمێكی فێركردنی وای هێنایەبوون كە پزیشكانێكی هێنایە بوارەكەوە بەجۆرێك ناو ناوبانگیان دەركرد كە هاوشانی دەرچوان و مامۆستایانی بەناوبانگترین زانكۆ و ئەكادیمیە پزیشكییەكانی جیهان بوون.
كاسترۆ كوڕی یەكێك لە گەورەترین خێزانە دەرەبەگەكانی كوبا بوو، كەچی چووە پاڵ جوتیاران و كرێكارانی هەژارەوە و دەرەبەگایەتیی لە ریشەوە هەڵكێشا و لە رێی پەیڕەوكردنی گەشەیەكی ئابوریی سەربەخۆوە خۆبژێوی و بەشی پێویستی خۆراكی بۆ گەلەكەی دابینكرد.
هەرەسی یەكێتیی سۆڤیەت، هاوپەیمانە سەرەكییەكەی، لە ساڵی 1991 دا نسكۆیەكی گەورەبوو بۆ ئەو، هەم لەڕووی سیاسی و هەم ئابوری و هەم كەسییەوە، وڵاتەكەی لە ناو گەمارۆیەكی خنكێنەری ئەمریكادا تووشی قەیرانێكی توند بووەوە، بەڵام سەركەوتووانە تێیپەڕاند یاخود لە كاریگەرییەكانی كەمكردەوە، بە هۆی دوو وڵاتە هاوپەیمانەكەیەوە كە بریتی بوون لە چین و ڤەنزوێلا. هۆگۆ شاڤێز سەرۆكی كۆچكردووی ڤەنزوێلا رۆڵی بەرچاوی گێڕا لە دابینكردنی پارە و وەبەرهێنان و نەوتدا بۆ دەربازكردنی كاسترۆی باوكە رۆحیەكەی و كوبای وڵاتی لەو قەیرانە. 
ئەو هەمیشە هاوپەیمانێكی پشتیوان و بە ئەمەكی گەلی فەلەستین و شۆڕشە رەواكەی بوو بۆ وەرگرتنەوەی مافی رەوای، هەزاران خوێندكاری فەلەستینیی لە زانكۆكانی كوبادا وەرگرت. جارێك یاسر عەرەفات-ی سەرۆكی كۆچكردوو بۆی گێڕامەوە كە هەركاتێك هەستی بە دڵتەنگی و ناڕەحەتی بكردایە، بەتایبەت بەهۆی ستەمی كەسەكانی دەورووبەریەوە، دەچوو بۆ كوبا.. بۆلای كاسترۆ.. لەوێ‌ هەستی بە ئارامیی دەروون و دەمەزەردكردنەوەی شۆڕشگێڕی و بەرزبوونەوەی ورە دەكرد و بە باوەڕ و متمانەی بەهێزەوە دەگەڕایەوە. 
خاكی بوون و بەرگە سەوزە سەربازیەكەی و جگەرە كوبییە بەناوبانگەكەی، لە نیشانە جیاكەرەوەكانی ژیانی ئەم كۆچكردووە مەزنەبوون، ئەو سەرۆكەی كە رێگەی نەدەدا بە هەڵواسینی وێنەی خۆی لە شەقامەكانی وڵاتەكەیدا و نەیدەهێشت پەیكەری گەورەی لە گۆڕەپانەكاندا بۆ دابنرێت. ئەم ژیانەی جێهێشت بێ‌ ئەوەی خاوەی كۆشك و تەلار یان یەختی ناوازە یاخود پارەی دانراوی بانك بێت بە بڕی ملیۆنان یان ملیارەها دۆلار. بەڵام میراتێكی شۆڕشگێڕیی جێهێشت كە ناونیشانەكەی شكۆ و نەفسبەرزی و مەردایەتی و سوژدەنەبردن بۆ ئیستیعماری ئەمریكی و لایەنگریی بۆ هەژار و نەدارانە.
ئێمە لەبەر ئەم میراتییە شەرەفمەندانەیە خوشمانویست. خۆشمانویست چونكە لەكاتێكدا هەزاران كیلۆمەتر لێمانەوە دوور بوو بەڵام لە نزیكەوە ئاگای لە كۆژان و نەهامەتی گەلەكانی ئێمە بوو. خۆشمانویست چونكە ئەو وەك رابەرێكی نەوەی ئێمە و سەرچاوەی ئیلهام و نموونەی خۆڕاگری و ئاڵنگاری و سەربەرزی و سوژدەنەبردن، تەنیا بۆ خودا نەبێت، لامان دەمێنێتەوە. 
باوەڕناكەین سەرانی عەرەب لەم رۆژانەدا بەشداریی مەراسیمی بەخاكسپاردنەكەی بكەن، بەتەواوەتی وەك چۆن بەشداریی بەخاكسپاردنی شەرەفمەندەكانی دیكەی لە نموونەی نێلسۆن ماندێلا و هۆگۆ شافێز-یان نەكرد، چونكە دژ و پێچەوانەیانە و بیریاندێنێتەوە، یان بیری هەندێكیان دێنێتەوە، كە وازیان هێناوە و دەستبەرداری بەهای دادوەری و خەبات بوون و چوونەتە خەندەقی ستەمی ئەمریكییەوە.
لە دڵەوە ماڵئاوا فیدڵ كاسترۆ، ئەوە ئێمە بووین كە خۆشمانویستیت و مێژووەكەت و میراتییە نیشتمانی و مرۆڤایەتییە شەرەفمەندانەكەت دەزانین.

created by Avesta Group and powered by Microsoft Azure