مامۆستا و ئیمپراتۆر

بۆچوون / بیروڕا :: 12/11/2016

نووسینی: شەهاب ئەلقەرەلوسی
سەرچاوە: دواڕۆژی عەرەبی
وەرگێڕان: لوقمان محەمەد رەشید

پێویستە حكومەتی هەرێمی كوردستان بیر لە چارەسەرێكی راستەقینەی كێشەی مووچە بكاتەوە كە لای ئەو توێژەی گوزەرانی لەسەر مووچەیە گەیشتووەتە بنی هەمبانەكە. ئەوەی جێی سەرنجە تا ئەم ساتەیش حكومەت بە شێوەیەكی جدی و بابەتیانە بیری لە چارەسەرێكی رازیكەری كێشەی مووچە نەكردووەتەوە و جێی داخە كە كار گەیشتووەتە ئەوەی خەڵكانێك رەحمەت بۆ رژێمە دیكتاتۆرەكەی پێشوو بنێرن. ئەوەتا یەكێك لە خۆپیشاندەران دەڵێت"رووی رەشی ئەمانە رووی سەدام و رژێمە چەوسێنەرەكەیی سپی كردووەتەوە". 
ئەم جەماوەرەی ئەمڕۆ هاتنەدەرەوە داوای جێگرەوەیەكی حكومەتی هەرێمی كوردستانیان دەكرد، ئەم حكومەتەی كە بە خوێنی سەدان و بگرە هەزاران قوربانی لە رۆڵەكانی ئەم گەلە ستەمدیدەیە پێكهێنراوە.
ئەمڕۆ ئەم گەلە پێویستی بە چارەسەرێكی كاتی  و نەزۆك نییە، بەڵكو چارەسەرێكی ریشەیی كاریگەری دەوێت. فەرمانبەران و خانەنشینان و مامۆستایان توێژێكی زۆرینەی كۆمەڵی كوردستانین. لەبەرئەوەیش كە حكومەت خۆی خۆیی خستووەتە ئەم تەنگژەیەوە بۆیە هەر خۆیشی بەرپرسیاری هەمو هەڵەكانیەتی.
پرۆسەی خوێندن ئیفلیج بووە و ئەگەر هەروا بەردەوام بێت ئەم توێژە زۆرینەیەی كۆمەڵی كوردستانی ناچار دەبێت پەنا بباتە بەر چارەسەری دیكە.  جێی شەرمەزارییە بۆ هەر حكومەتێك كە توێژی فەرمانبەران و مامۆستایان بخاتە دۆخێكی لەمجۆرەوە. با پەند و وانە لە وڵاتە پێشكەوتووەكان وەربگرین. جارێكیان لە شینزۆ ئابێ‌-ی سەرەك وەزیرانی ژاپۆن-یان پرسی: چۆن توانیتان لە ماوەی چل ساڵدا بگەنە ئەم پێشكەوتووییە؟ ئەویش وەڵانی دایەوە كە چونكە رێزی مامۆستا دەگرین و مووچەی وەزیری دەدەینێ‌ و بگرە وەك چۆن رێزی ئیمپراتۆر دەگرین ئاوایش رێزی مامۆستامان لایە.
ئێمە نامانەوێت بگەینە ئاستی ژاپۆن، بەڵكو دەمانەوێت لەسایەی حكومەتەكەماندا بە ئاشتی و ئارامی بژین.

created by Avesta Group and powered by Microsoft Azure