پرسیار لە گەورەم

بۆچوون / بیروڕا :: 24/10/2016

گەورەم قەت لێتان قەوماوە؟
یەعنی لە ئێوەش رووی داوە؟
لە گەرمەی چۆنی و چاكیدا
لەپڕ وەحدەت پێ‌ نەمێنێ‌؟
یان كارەبای موەلیدە
عەیب نەبێ‌
سپلیتەكەت هەڵنەسێنێ‌؟
قەت ناچاربووی
بە پیجامەی خەتخەتەوە
ریزی سەمونخانە بگری؟
لەگەڵ هەموو شەققەیەكی لە ناكاوی
دەرگای دانەخراوی حەوشە
سەد جار بمری؟
یان ئەزانی كام پیكابە
كاڵەكەكەی مزرو خۆشە؟
كام پاص دائیم لەسەر بۆشە؟
قەت بوتڵی غازتان دزراوە؟
لەسەر فەرعی ماڵی ئێوە نێرگەلەخانە دانراوە؟
قەت مناڵت
سەیارەی جامڕەش لێی داوە؟
لە تەزبیحا
كامیان موروی عادی حەجەو
كامیان ئەبڵەقی قەزوانە؟
عەرەبانەی چ گەڕەكێ‌
تەماتەكەی زۆر هەرزانە؟
قۆڕەی سك ئەناسیتەوە؟
ئەزانی كامیان نیشانەی برسێتییەو
كامیان نیشانەی غازاتە؟
پێیانوتوی 
میللەت برسی و 
ئیعلامیش 
موهاتەراتە؟ 

created by Avesta Group and powered by Microsoft Azure