نه‌وعه‌ قۆڕه‌كه‌

بۆچوون / بیروڕا :: 18/10/2016

-  وه‌ڵڵاهی‌ پێم خۆشه‌ ئاوا خۆت گۆڕیوه‌ ئه‌چی‌ بۆ شه‌ڕی‌ موسڵ ئافه‌رم. به‌س ئه‌وه‌نده‌ی‌ من بزانم ئه‌و نه‌وعه‌ شه‌ڕانه‌ داری‌ سێڵفی‌ ناوێ‌.
 + ئه‌یه‌وێ‌ ئوستاز. ئه‌ی‌ چۆن له‌گه‌ڵ جه‌ماعه‌تا ره‌سم بگرین؟!.
-  یه‌عنی‌ به‌خێرێ‌ بۆ ره‌سمگرتن ئه‌چیت بۆ شه‌ڕه‌كه‌؟.
 + ئه‌ی‌ ته‌بعه‌ن. موهیمترین شت له‌شه‌ڕا ره‌سمه‌كانێتی‌. ئه‌ها جاران زه‌مانی‌ قادسییه‌ پێیان ئه‌وت صوه‌ر مینه‌لمه‌عره‌كه‌.
-  جا تۆ به‌ته‌مای‌ عه‌یب نه‌بێ‌ له‌و نه‌وعه‌ ره‌سمانه‌ بگریت؟.
 + نا .. ئێمه‌ عایدی‌ ره‌سمه‌كانی‌ دواوه‌ین..
-  كوڕی‌ باوكم ئه‌و شه‌ڕه‌ وه‌كو جه‌نگی‌ مه‌غڵوبه‌ وایه‌. دواوه‌ و پێشه‌وه‌ی‌ نییه‌. دنیاكه‌ یه‌ك پارچه‌ ئه‌كات به‌ئاگر.
+  ئه‌وه‌ به‌س له‌ئیعلاما وایه‌. به‌سه‌ری‌ خۆم پێش ئه‌وه‌ی‌ ده‌ستپێبكات ته‌واوبووه‌.
-  هانام كرده‌ ده‌مت رۆڵه‌.. خوا ئه‌كا داعش ته‌واو ئه‌بێ‌ ئیتر ئێمه‌ چیمان ئه‌وێ‌؟!.
 + ته‌واو نابێ‌ ئوستاز.. كشه‌یان لێ‌ ئه‌كه‌ن بۆ ئه‌ودیو..
-  ئه‌ی‌ ئه‌م هه‌موو قوات‌ و په‌یامنێر و موحه‌لیله‌یان بۆچی‌ كۆكردۆته‌وه‌؟.
+  چیت عه‌رز بكه‌م نازانم.. ئه‌ڵێن سیناریۆیه‌
-  ئه‌رێ‌ ئێوه‌ چین بۆ خاتری‌ خوا؟ به‌ده‌وڵه‌تی‌ كوردی‌ ئه‌ڵێن سیناریۆ؟! به‌ نه‌وته‌كه‌ ئه‌ڵێن سیناریۆ؟ به‌ شه‌ڕ ئه‌ڵێن سیناریۆ.. عه‌یب نییه‌؟.
 + ئێ‌ وایه‌ قوربان ئێره‌ هینه‌. هۆلیووده‌. 
-  هۆلیووده‌؟.
+  به‌ڵێ‌ هۆلیووده‌.
-  چۆن هۆلیووده‌ هه‌تیو؟! من بیستومه‌ خه‌ڵكه‌كه‌ی‌ هۆلیوود موعه‌زه‌ز موكه‌ڕه‌م ئه‌ژین. ئێمه‌ی‌ داماو له‌برسا لاكه‌ی‌ سه‌رمان دێت. ئیتر هۆلیوودی‌ چی‌؟!.
 + ئاخر به‌گم ئێمه‌ نه‌وعه‌كه‌ی‌ تری‌ هۆلیوودین.
-  كام نه‌وعه‌یان.
 + نه‌وعه‌ قۆڕه‌كه‌.

created by Avesta Group and powered by Microsoft Azure