رووبەڕووبوونەوەی هەیكەل و سادات

بۆچوون / بیروڕا :: 24/09/2016

سەرچاوە: رەئیولیەوم
وەرگێڕان: لوقمان محەمەد رەشید


بە بۆنەی یادی لەدایكبوونی نووسەری كۆچكردوو (محەمەد حەسەنێن هەیكەل)ەوە، رۆژنامەی (الاهرام) ی میسری، دۆسیەیەكی تایبەتی لە 23 ی ئەیلولدا بڵاوكردووەتەوە و تێیدا باس لە یەكەم رووبەڕووبوونەوەی هەیكەل و سەرۆك ئەنوەر سادات دەكات.


لە راپۆرتێكی ئەو دۆسیەیەدا كە عەبدولجەواد تۆفیق نووسیوویەتی، هاتووە:"هۆكارەكانی ئەو دیدارە گەرمەی نێوان سەرۆك محەمەد ئەنوەر سادات و مامۆستا محەمەد حەسەنێن هەیكەل لە چواری نۆڤەمبەری 1974 دا،  دەگەڕێتەوە بۆ ئەو قسەیەی كە هەیكەل لە یەكێك لە دیدارەكانیدا كردبووی و دواتر گەیشتبووەوە بە سەرۆك. هەیكەل وتبووی: سیاسەتی ئێستا -مەبەستی رژێمەكەی سادات بووە- بێعەقڵانە بەڕێوەدەچێت و بایەخ و گرنگیی نادات بە چارەسەركردنی كێشەكانی خۆرهەڵاتی ناوەڕاست. هەروەها ئەو نووسینەی كە لە وتارە هەفتانەكەیدا (بەڕاشكاوی) لە رێكەوتی 27/10/1972 لە ئەهرام-دا و بەناونیشانی "مەترسیی بەسەر دەریای سوورەوەیە" بڵاویكردووەتەوە، كە تووڕەیی و نیگەرانییەكی زۆری شانشینی سعودیەی لێكەوتەوە و كارگەیشتە ئەوەی لە 2 ی نۆڤەمبەری 1972 دا و لەڕێی عومەر ئەلسەقاف-ی راوێژكاری مەلیل فەیسەڵ-ەوە، ناڕەزایی لەسەر ناوەرۆكی وتارەكە بگەیەنرێتە خالید فەوزی باڵیۆزی میسر لە جەددە و پێیڕاگەیەنرا كە هەیكەل گوزارشت لە رای رەسمیی دەوڵەتی میسر دەكات و هیچ شتێكی تری جگە لەمە قابیلی قبووڵ نییە. هەموو ئەمانەیش گەیەنرانە حافز ئیسماعیل راوێژكاری سەرۆك بۆ كاروباری ئاسایشی نەتەوەیی و ئەویش لایخۆیەوە گەیاندییە سەرۆك، ئەمەیش تووڕەیی سەرۆكی بەرامبەر بە هەیكەل تەقاندەوە". 


لە راپۆرتەكەی ئەهرام-دا هاتووە:   
"هەیكەل چووە ژووری نووسینگەكەی سەرۆك سادات-ەوە لە ماڵەكەی خۆی لە جیزە و سەلامی لێكرد و نوسخەیەكی ئینگلیزیی كتێبەكەی خۆی-عەبدولناسر و جیهان-ی دایە و وتی دیارییەكم لەمە بەباشتر نەزانی كە لە لەندەن-ەوە بۆت بهێنم. ساداتیش كتێبەكەی لێوەرگرت و بێئەوەی سەیری بكات خستیە كتێبخانەكەیەوە و وتی: سوپاس.
پاشان سادات لەپڕ وتی: محەمەد تۆ بەوە من تۆمەتبار دەكەیت كە بێ عەقڵم؟ ئەمە چییە ئێمە لەسەر دوو رێگەی زۆر لەیەكتر جیاوازین.
هەیكەل-یش یەكسەر وەڵامی دایەوە و وتی: تێناگەم لەبەرچی ئاوا راستەخۆ ئەم بابەتە دەكەیتەوە، بەهەر حاڵ من وام نەوتووە.
سادات: محەمەد تۆ بۆچی بەرامبەرم لێدەگریت؟
هەیكەل: دەمەوێت بەوردی هەڵوێستی خۆمت بۆ دیاری بكەم، من لەڕووی سیاسییەوە لەگەڵت ناكۆكم بەڵام رووبەڕووت ناوەستمەوە.
سادات: من رێگەی ئەوەت پێنادەم، من لێپرسراوم و گەل هەڵیبژاردووم.
هەیكەل: منیش رۆژنامەنووسێكی بەرپرسیار و ئازادم. 
سادات: ئەی كێ‌ ئەهرام دەردەكات؟ 
هەیكەل: ئەهرام كاری منە و خاوەندارێتیەكەیشی هی (ئیتیحادی ئیشتیراكی)یە بەپێی بەڵگەنامە سەرەكییەكان. بەهەرحاڵ با ئەم ئیحراجبوونەت لەسەر لادەم و من ئامادەم هەر كاتێك بێت بڕۆم و وازیلێبێنم.
سادات: بڕیار لەدەستی خۆتدایە.
هەیكەل: كەواتە رێككەوتین.
سادات: چۆن ئاوا قسە لەگەڵ من دەكەیت؟
هەیكەل: دەمەوێت شتێكت پێ بڵێم تا لەلات روونبێت، من سنوورێكی ئاشكرا لە نێوان سەرۆكی دەوڵەت و سەرنووسەردا دادەنێم، بەڵام ئێمە دۆستایەتیەكمان لە نێواندا هەیە ئەگەر تۆ لەو ماوەی هەفتەیەدا كە من لە لەندەن بووم، هەڵتنەوەشاندبێتەوە.
سادات: من شانازی بەو دۆستایەتیەوە دەكەم و خۆیشت ئەمە دەزانیت، بەڵام تۆ چۆن جوێنم پێدەدەیت؟
هەیكەل: من جوێنت پێ نادەم. بەهەرحاڵ با لە ئیحراجی رزگارت بكەم، من ئامادەم هەر ساتێك بێت بڕۆم و وازبێنم.
سادات: بڕیار لای خۆتە و كەیفی خۆتە.
......................
سادات: جیاوازیی لە بیروڕاكانتدا، بەم دواییە بووە هۆی تووڕەبوونی سعودیە، زۆر تووڕەبوون لەو وتارەت كە دەربارەی ستراتیجیەتی عەرەبی لە دەریای سوور، نووسیووتە. لە یاداشتەكەیاندا پێیان وتووم ئەگەر لەوەڵامیاندا بڵێین كە هەیكەل نوێنەرایەتیی رای رەسمی ناكات، ئەوان بەم رایەیش رازی نین؟
هەیكەل: ئەوانت دڵخۆشكرد بەم بڕیارەی من كە واز لە ئەهرام دێنم. دڵنیابە جەژنەكەی مەلیك فەیسەڵ دەبێتە دووجەژنە كە دەبینن میسر بەرخێكی بۆ جەژن بۆ سەربڕیون".

created by Avesta Group and powered by Microsoft Azure