خانمە رزگاربوویەكی دەستی داعش

بۆچوون / بیروڕا :: 10/09/2016

 سەرچاوە: ئەلحەیات
وەرگێڕان: لوقمان محەمەد رەشید


حەسەن معەوەز میدیاكاری قاڵبووی رۆژنامەوانی، لە بەرنامەكەیدا (نوقتەی نیزام)ی كەناڵی(العربیە)، هیچ پرسیارێكی دەربارەی دۆخی دەستگیركردنەكەی لە نادیە موراد-ی میوانی بەرنامەكەی نەكرد كە خانمەرزگاربوویەكی چنگی داعش-ە، چونكە دەیویست زامەكانی ساڕێژ بكات بە پرسیارگەلێك لەسەر پاشەڕۆژ و هیوا و ئومێدەكان. هەروەك نەیویست قوربانییەك لە قوربانیەكانی ئەو رێكخراوە دڕندەیە لە شێوە و شێوازێكدا دەربخات كە بەلای هەموو كەسێكەوە تاوانی ئەو رێكخراوە نامۆیە، ئاشكرایە.
ئەگەرچی معەوەز، بەوریاییەوە شوێنپێی (ئەو رێگایەی كە مەسیحیان پێدابرد بۆ لەخاچدان) دەگرت كە ئەم كچە كوردە ئێزدیەی پێدا رۆیشتووە، بەڵام سیمای گریاناویی ئەو كچەی كە تەمەنی لە بیستەكاندایە زۆر چیرۆك و سەربووردەی ئایینزایەكی ئاشتیخوازی ئاشكرا دەكرد كە لەسەر خاكی باووباپیرانی لە شەنگال لە هەرێمی كوردستانی عێراق دەژیا، تا ئەوكاتەی (تەتاری سەردەم) وێرانیكرد و ئەو پێدەشت وشاخانەی كردە (گۆڕەپانی شەڕەڕم) و (مەزادی سەبایا). 
چیرۆكی نادیە كە گیرۆدەی ئەزموونی (سەبای داعش) ی تاڵ بووە، زانراوە، ئەو سێ‌ مانگی لە دۆزەخدا بەسەربردووە، هەتا توانیی بەرێگەیەكی موعجیزەئاسا و بە هاوكاریی خێزانێكی موسڵمانی موسڵ، رابكات و خۆی دەرباز بكات. پێچەوانەی كچەكانی تر كە دووچاری ئەزموونی هاوشێوە بوونەتەوە و بێدەنگییان لێكردووە، نادیە ویستی ئابڕووی ئەوانە ئاشكرا بكات كە بە ساختە دروشمی ئیسلامیان هەڵگرتووە. بێ گوێدانە نەریتی تایەفە موحافزكارەكەی و لەپێناو ئەم كارەیدا چاوی بە زۆر لە سەركردەكان و بەرپرسان كەوت و لە نەتەوە یەكگرتووەكاندا هەموو شتێكی باسكرد و كاندیدیش كرا بۆ وەرگرتنی خەڵاتی نۆبڵی ئاشتی. 
بە سیمای منداڵانەیەوە كە دڵتەنگیەكی شاراوە ماندووی كردووە، نادیە كەوتە گێڕانەوەی وردەكاریەكانی ئەو هەنگاوانەی ناویەتی بۆ دژایەتیكردنی سەبایا و سەبیگرتن. ئەو راستیانەیشی ئاشكراكرد كە لە هەندێك راپۆرتی میدیاییدا شێوێنراون. بە روونی و ئاشكرا دیاربوو كە هیچ مەبەستێكی نیە جگە لە بەرگریكردن لە (بەها مرۆییەكان) و دەنگی بڵند دەكاتەوە (لەجیاتی 6 هەزار ژن و منداڵ كە قوربانیی سەبایای دەستی داعشن و دەنگیان بە جیهان نەگەیشتووە)، ئەوەیش كە دەروونی ئازار دەدات ئەوەیە كە ژمارەیەكی زۆری ژنانی ئێزدیی وەك ئەم رزگاریان بووە بەڵام شەرم دەكەن حیكایەتەكانی خۆیان باس بكەن.
نادیە كە ئێستا لە ئەڵمانیایە و لەوێ‌ چارەسەری ئەو ئازارەی بۆ كراوە كە چەشتوویەتی، ئارەزووی ئەوە دەكات ببێتەوە بەو منداڵە بەریئەی كە لەناو خۆڵی بناری چیای شەنگال-دا یاری دەكرد و كاتەكانی بەسەردەبرد و بەخت یاوەری بێت بۆ ئەوەی لەو بەهەشتە سادەیەدا بژی كە سەدان ساڵ كەسوكارە ئێزدییەكانیی لە ئامێزگرتووە. 
نادیە موراد كە بووە سیمبولێكی چەوساندنەوەی ئێزیدیەكان، لە سكرینی ماڵێكی دیكۆر تەختەی كۆنەوە دەركەوت، لەسەر رەفەكانی هەندێك كتێب دانرابوون دەتگوت دەیەوێت بەوە قەرەبووی كتێب و دەفتەرە ونبووەكانی بكاتەوە. لە وەڵامدانەوەكانیدا كورت بوو، ئەوەی لە دیلێتیدا بینیوویەتی زمان ناتوانێت باسی بكات، بەڵام كۆششیكرد لە دەربڕینی هاوارێكی ئازاربەخشدا و ویژدانی دنیای ئاگاداركردەوە لە (شتێك دەسوتێت) لە وڵاتی دوو رووباردا. لەبری ئەوەی نادیە و هاوڕێكانی لە خوێندنگە و زانكۆ و مەیدانەكانی كاردا بن، قەدەر كردنی بە سەبایا. ئەمەیش ئەو شیعرەی بەدر شاكر سەیاب-مان بیردێنێنەوە كە ئاوا دەست پێدەكات: خەریكبوو نكۆڵی لەوە بكات كە بینیبووی......

created by Avesta Group and powered by Microsoft Azure