ئاخۆ نەفرۆشتنی چەكی بریتانیا لۆژیكییە؟

بۆچوون / بیروڕا :: 08/09/2016

نووسینی: عەلی ئەلهێل
سەرچاوە: رەئیولیەوم
وەرگێڕان: لوقمان محەمەد رەشید
دوای ئەمریكا، بریتانیا یەكەم وڵاتی جیهانە لە فرۆشتنی چەكدا. وڵاتانی جیهانی عەرەبیش یەكێكن لەو وڵاتانەی جیهان كە زۆرترین چەكی ئەمریكا و بریتانیا دەكڕن. داواكاریەكەی پارلەمانی بریتانیا لە حكومەتەكەیان كە چەك فرۆشتن بە سعودیە رابگرێت، هیچ نییە جگە لە ئاڵوگۆڕكردنێكی رۆڵەكان و تەنیا بۆ بەكاربردن (ئیستیهلاك)ی ناوخۆیی و دەرەكییە، بەتایبەت لەلایەن گروپە مافپەروەرە گوشارەكانی ناو بریتانیاوە. بەبێ‌ لەبەرچاوگرتنی ئەخلاقیاتی فرۆشتنی چەكی بریتانی بە سعودیە یان بە وڵاتانی دیكە، داواكاریی پارلەمانتارە بریتانیەكان ناواقیعی دەردەكەوێت و لەكاتێكی نەگونجاویشدایە.
دوای دەرچوونی لە (یەكێتی ئەوروپا) بریتانیا رووبەڕووی چەندین قەیرانی ئابوریی بووەتەوە (قەیران لێرەدا خوازراوە چونكە ئەوەی نهێنیی سیاسەتی بریتانیا بزانێت، دەزانێت كە كارەساتە). رەنگە كەمترینیان لێدوانەكەی سەرەك وەزیرانی ژاپۆن بێت كە دوو رۆژ لەمەوبەر لە میانەی لوتكەی ئابوریی گروپی بیستدا وتی ژاپۆن كۆمپانیا تایبەتە ئۆتۆمبێلسازەكانی (نیسان و توەیتا و ئەوانی تریش) لە بریتانیا دەكێشێتەوە وەك سزادانێكی بە كشانەوەی لە (یەكێتی ئەورپا). ئێستا رێژەی بێكاریی لە بریتانیا لە 5 ملیۆن كەس زیاترە و ئەگەر فرۆشتنی چەكیش بە سعودیە و وڵاتانی دیكە رابگرێت ئەوا زیاتر لە 50 هەزار بریتانی لەكار دەردەكات كە لە كارگەكانی چەكدا كاردەكەن. من دڵنیام پارلەمانتارە بریتانیەكان ئەمەیان لا شاراوە نییە. بەڵام وەك وتمان مەبەستی داواكەیان، زیاد لە هەر شتێكی تر، بۆ سووككردنی گوشارەكانی گەلە لەسەر حكومەت.
چەكفرۆشتن بازرگانییەكی برەودارە و ناچێتە ئەو ئیعتیبارەی كە ئەم دەوڵەتە دەستدرێژكارە و ئەو دەوڵەتە دەستدرێیی كراوەتەسەر، یان ئەم دەوڵەت رەچاوی مافەكانی مرۆڤ دەكات و ئەویان نایكات. بازرگانیی چەكفرۆشتن بەشێكە لە فەلسەفەیەكی سیاسیی وەحشیگەرایی لەسەر میتۆدی (ئامانج پاساوی هۆكارە). هەروەها بێ‌ رەچاوكردنی ئەخلاقیات پەیڕەوی یەكتربڕینی بەرژەوەندیەكان دەكات. 
بەریتانیەكان تەنیا لە پێناو ئەو (ئازادیی هاتوچۆ) یە لە (یەكێتی ئەوروپا) چوونە دەرەوە كە یەكێتیەكە بەسەر وڵاتانی ئەندامدا دەیسەپێنێت و هاووڵاتیانی بریتانیا زۆر لێی زەرەرمەندبوون، چونكە پۆڵەندیەكان و رۆمانیەكان و یۆنانیەكان و ئەوانی تریش لە هاووڵاتیانی وڵاتە هەژارە ئەندامەكانی (یەكێتی ئەوروپا) بریتانیایان پڕ كردووە لە دەستی كاری هەرزان. دوای كشانەوەی كۆمپانیا ژاپۆنیەكان لەبریتانیا، زیاتر لە بیست هەزار بریتانی زەرەرمەند دەبن، ئەمە بێجگە لەو دە هەزار بریتانیەی كە زیانیان پێگەیشت بەهۆی فرۆشتنی كارگەكانی ئاسن لەلایەن كۆمپانیای تاتای هیندیەوە لەبریتانیا بە كارگەی (پۆرت تاڵپۆت)یشەوە، تەنانەت پێش دەرچوونی بریتانیایش لە (یەكێتی ئەوروپا). كێشەی ئێستا لە بریتانیا ئەوەیە كە بریتانیەكان تووشی كۆتوبەندی جوڵەی وەزیفی بوون ئەگەرچی (ئازادیی هاتوچۆ)ی كرێكارە ئەوروپاییەكان ئێستا نەماوە چونكە وڵاتەكەیان لە (یەكێتی ئەوروپا) كشاوەتەوە. كەواتە، چۆن دەكرێت بریتانیا واز لە چەك فرۆشتن بێنێت؟.




created by Avesta Group and powered by Microsoft Azure