ئەو ترسەی لەسەر خوێن رایهێناوین

بۆچوون / بیروڕا :: 07/09/2016

سەرچاوە: ئەلمەدا
وەرگێڕان: لوقمان محەمەد رەشید

نازانم، بەرێز سەرەك وەزیران بیری لە كێ‌ دەكردەوە كاتێك دەیگوت:"بابەتەكەی كەڕادە هێشتا لەبەردەم لێكۆڵینەوەدایە بۆ زانینی ئەوەی كە ئاخۆ ئۆتۆمبێلەكە لە كوێوە هاتووە و لە كوێوە داخڵ بووە". ئاخۆ بیری لای تەقینەوەكەی دوو مانگ لەمەوبەر بووە كە تا ئێستایش دەیان تەرمی نەناسراوی لە پزیشكی دادوەریدان؟ یان تەقینەوەكەی مەدینە سەدرە؟ یاخود ئەوانەی گۆڕەپانی عەدەن و ئەعزەمیە و بەغداد جەدیدە و سەیدیە و عامریە و عوبێدی؟ . ئەگەر بیری لای تەقینەوەكەی ئەم دواییە بێت كە پێرێ‌ شەو روویدا، ئەوە دەیان ملیارمان لەسەر (ئاسایشی قەزایی) بۆ بەهەدەرداوە. ئەگەر بیریشی لای بەڵێنەكانی سەركردایەتی ئۆپراسیۆنەكانی بەغدا بێت، ئەوا لەوەدەچێت بەڵێنەكانی قاسم عەتا وتەبێژی پێشووی فەرماندەیی ئەو ئۆپراسیۆنانەی بیرنەمابێت كە ئەو رۆژە پێیگوتین:"عێراقیەكان هەست بە بەرهەمی ئەم سەركردایەتی ئۆپراسیۆنە دەكەن و دەبینن كە چۆن تیرۆریستان رادەماڵن". خۆ ئەگەر ئەم وتە مێژووییە لە ساڵی 2014 دا راگەیەنرابێت ئەوا ئەنجامەكانی دوای چەند ساڵێك روونبوونەتەوە (سەدان هەزار قوربانی، شارگەلی كراوە لەبەردەم چەتەكانی داعشدا، خاڵگەلێكی زاڵگە و پشكنین و كۆنترۆڵ كە بەلای ئەوانەوەی دایاننانەوە بوونی ژنێك لە ئۆتۆمبێلێكی كرێدا مەترسیەكەی بۆ سەر ئەم وڵاتە زیاترە لەو ئۆتۆمبێلی تیرۆریست و چەكدارانەی كە بەوپەڕی ئازادیەوە دێن و دەچن). ئەمە بەرهەمی ئەو پلانە ئەمنییەیە كە قەومی دەوڵەتی قانوون بەڵێنیان دابوو پێمان.  
هیچ شتێكی ئەم كۆماری عێراقی تازەیە وەك وڵاتانی دیكە نییە، سەد پارلەمانتار لە گەشتی حەجكردندان، كەس ناتوانێت وەزارەتی ناوخۆ بەڕێوە ببات بێجگە لە قاسم ئەعرەجی نەبێت، عەواتف نعمە لە بارێكی نەزانراوی تەمومژاویدا ون دەبێـت و دیار نامێنێت، تەحالوفی نیشتمانیی هێشتا لە وەهمی (شكۆد)دا دەژی و نایەوێت رووداوەكان وەك ئەوە ببینێت كە لەچاوی هەموو عێراقیەكاندا دیارە.
شارەكان نوقمی گەندەڵین و دەیانەوێت لە پەشێوی و نائارامیی ئەمنییشدا نغرۆی بكەن و تاقە چەكیشیان دروشمگەلێكی وەك"هەموو شتێك لەژێر كۆنترۆڵدایە" یە. دەیانەوێت ببینە دیلی وتارە ئەمنیەكانیان و دیلی شارە گەمارۆدراوەكان بە تیرۆریستان و چاوەڕێی گریندایزەر-ێك بین رزگاریان بكات یان عەلەمدار-ێك بێتوو خاوەن ئەجێنداكان لەناوبەرێت وەك چۆن ئەو رۆژە پارلەمانتاری (بەدبەخت) مەهدی خەفاجی وتی.
خۆ ئەگەر ئەم كەسە فاشیلانە هەوڵی ئەوە دەدەن كە كۆمەڵگە بەرەو كورەی تیرۆر و پەشێویی ئەمنی بەرن، ئیتر ئەمەیان لای عێراقیەكان خۆیانە، كە ئاخۆ رازین بەوەی كۆمەڵگە بگۆڕدرێت بۆ جەنگەڵ و بكرێتە مەیدانی شەڕەقۆچی رەوە وەحشی دڕندە لە پێناو بەرژەوەندیی قەوارەگەلێكی تائیفیی پڕ لە وەهم و درۆ.
پێویست بە بێنەوبەرەی هۆكاری وێرانكاری و كوشتنی بەخۆڕایی و هەوڵدان بۆ پاككردنەوەی بەغدا لە خەڵكەكەی ناكات، پێشتر بەیاننامەكانی سەركردایەتیی ئۆپراسیۆنەكانی بەغدا دەیگوت"هەموو شتێك لەژێر كۆنترۆڵدایە" و ئێستایش دەڵێت "هێشتا لێكۆڵینەوەكان بەردەوامن".
قوربانیانی تەقینەوەكان دەڕۆن بێ‌ ئەوەی هەست بە ئازار و تووڕەیی بكەن، لەگەڵ خوێندا راهاتین، دەستەمۆ و ترسنۆك بووین.




created by Avesta Group and powered by Microsoft Azure