شیكاركردنی سیاسی بەپێی ڕێبازی شێركۆ عەبدوڵڵا

بۆچوون / بیروڕا :: 04/09/2016

سەرەتا ئەمەوێت ئەوە بڵێم كە من لە نزیكەوە بەڕێز د. شێركۆ عبدلله ناناسم، ناسینی من بۆ ئەو بەڕێزە  تەنها لە ڕێی خوێندنەوە و بەدواداچونی ئەو نوسینە تەنزئامێزانەوەیە  كە بەڕێزیان لە ستون و گۆشەی ڕۆژنامە و گۆڤار و سایتەكاندا ئەیاننوسێت ، هەڵبەت جێی دەستی ئەم پزیشكە بەڕێزەش لەو شێوە نوسینانە بە تەواوەتی دیارە كە توانیویەتی ڕێچكەیەكی تایبەت بە خۆی بگرێتە بەر و خوێنەرێكی زۆری بەدوای خۆیدا هێناوە ، وسەردەمانێكیش لەم هەرێمەدا لە سایەی نەبونی هێزی ئۆپۆزسیۆن و فەوزای ئەم وڵاتەدا ، نوسینەكانی شێركۆ عبداالله ڕۆڵێكی زۆر گەورەیان گێڕاوە بۆ شیكاركردنی ئەو گاڵتە جاڕییەی كە بەناوی سیاسەتكردنەوە لەم هەرێمەدا ئەنجام ئەدرێت... بە زمانێكی هێجگار سادە وسانا كە هەمومان لێی تێدەگەیشتین، نوسینێك پڕاوپڕ بەقەد باڵای گاڵتە جارییەكان.. هەر بۆیە ئەم چەشنە نوسینانەی بەڕێزیان هەر لەسەردەمی سیخورمەوە بیگرە، وە تا ئێستاش خوێنەرێكی باشی بەدوای خۆیدا هێناوە و خەڵكی بە جۆرێك لە جۆرەكان ئەم چەشنە نوسینە تەنز ئامێزانەی وەك دەروازەیەك سەیر ئەكات بۆ بەتاڵكردنەوەی توڕەیی و بێ ئومێدی و ڕەشبینی لە دۆخی فەوزای هەرێم .. بێگومان منیش یەكێك بووم لەو كەسانەی كە بە ئێستاشەوە بەدوای نوسینەكانی د. شێركۆ عەبدوڵڵاوەم.. ئەمە لە كاتێكدا لەناخی خۆمدا كاتێك لە دۆخی سیاسی هەرێمم ئەڕوانی، بەچاوێكی دی سەیری پرۆسەی سیاسیم ئەكرد، بە ئاراستەیەك لە پرۆسەی سیاسیم ئەڕوانی، كە زۆر جیاواز بوو لەو ڕێچكەیەی شێركۆ عبدالله گرتبوی، بڕوام وابوو كە ئەو تا ئەوپەڕی ڕادە پراگماتی بووە لە شیكردنەوەی دۆخی سیاسی هەرێم، ئەو بە شێوەیەكی سادەو ساكار ئەوە ئەنوسێت كە هەیە، بەڵام من هەمیشە لەگەڵ سەرسامیم بە شێوازی نوسین شێوازی شیكاركردن و گوزارشتكردنی  بە شێكی زۆری نوسینەكانی، دژی ئەو ئاڕاستەیە بووم كە  بەو جۆرە وێنای سیاسەت بكرێت ، هەمیشە شیكارم بۆ ئەوە كردووە كە  پێویستە بكرێت یان ببێت، نەك تەنها ئەوە بخوێنمەوە یان لەوە بڕوانم كە هەیە ..هەر بۆیە شیكاركردنێكمدا ، هەمیشە مێشكم بۆ ئەوە چووە كە پێویستە ببێت ، مێشكم چووە بۆ شیكاری مەسەلەكان تا ئەوپەڕی ڕاددە جیددی ، گێڕانەوەی بابەتەكە بۆ ڕەگ و ڕیشە زانستیەكەی .. هەرگیز نەمویستوە بابەتەكان وەك وڕێنەیەك لێیان بڕوانم كە لەلایەن فەریكە سیاسیەكانی ئەم وڵاتەوە وەك بایەك دەرئەدران ... بەڵام هەرچەند سەیری ئەم دۆخە ئەكەم و لێی ئەڕوانم ، هەرچەند دیقەتی  ئەو ئاقارە ئەدەم كە ئەم هەرێمە پێی ئەگات، دروستی شێوازی شێركۆ عبدالله و هەلەی شێوازی خۆمم بیر دێتەوە .. هەر كاتێكیش ئەمەوێت شیكارێكی دروست بكەم بۆ ئەوەی كە ئەگوزەرێت تا بگەمە قۆناغی پێشبینیكردنی چەند دەرئەنجامێك، ڕاستەوخۆ  شانۆنامەكەی  نوسەری ناوداری عەرەب ( یوسف ئیدریس )م دێتەوە پێش چاو كە بە ناوی ( شانۆنامەی گاڵتەجاری زەویە – المهزلە اڵارچیە)... لەم شانۆنامەیەدا لە یەكێك لە دیمەنەكانی شانۆكەدا  شێتێك ئەبەنە  لای دكتۆرێك بە مەبەستی چارەسەر كردنی .. وە لە ناو ژووی دكتۆرەكەدا ئەم گفتوگۆیە لە نێوانیاندا ڕوو ئەدات
- دكتۆر : ئەتوانی پێم بڵێی ئەمڕۆ چەند شەممەیە
- شێت : قوربان ئەمڕۆ شەممەیە
- دكتۆر : ئەی دوێنێ چەند شەممە بوو 
- شێت : دوێنێش هەر شەممە بوو
- دكتۆر : ئەی بەیانی چەند شەممەیە
- شێت : بەیانیش هەر شەممەیە
- دكتۆر : ئەی كەواتە (یەك شەممە) كەی دێت
- شێت : قوربان : ئەو كاتەی هەستمان كرد ئەمڕۆ لە دوێنێ باشترە ، ئەوكاتەی هەستمان كردن دونیا هەنگاوێك چۆتە پێشەوە، هەر كاتێك دادپەروەری ئەمڕۆ لە دادپەروەری دوێنێ باشتر بوو، هەر كاتێك هەستمان كرد ستەمی ئەمڕۆ لە ستەمی دوێنێ كەمترە، هەر كاتێك كە توانیمان لێپرسینەوە لە (بەرپرس) بكەین كە كاتێك هیشتا ئەو (بەرپرسە) ، ئەو كات بە دڵنیاییەوە یەك شەممەش دێت جەنابی دكتۆر . ( گفتوگۆكە تەواو)

خۆ ئەگەر ئێمەش بە وردی دیقەتی ئەم دۆخەی ئێستای ئەم هەرێمە بدەین، بە تایبەتیش لەم زۆنەی كە پێی ئەوترێت ( زۆنی سەوز)،  ئەوا بە دڵنیاییەوە ، بە ئاشكرا هەست بەو گاڵتە جارییە ئەكەین كە لەم زەوییەی ئێمەدا هەیە ، گاڵتەجاڕییەك بە جۆرێك ئەوگەیەنێتە ئەو بڕوایەی كە هەرگیز یەك شەممە نایەت .. بەڵام خۆ كێشەكەی ئێمە تەنها  لەوەدا نیە كە یەكشەممە نایەت، بەڵكو كێشەكە لەوەدایە كە تەنها شێتەكانی ئەم وڵاتە ئەزانن كە چیتر یەك شەممە نایەتن وە بۆچی نایەت ... ئەمە لە كاتێكدا بەناو عاقڵەكانیش هەر دەهۆڵی (چاوەڕێی ڕۆژێكی باشتر) لێ ئەدەن .. ئاخر ڕۆژێكی باشتر چۆن دێت كاتێك كەس متمانەی بە كەس نەبێت، چۆن چاوەڕێی ئەوەبین یەك شەممە بێت ئەگەر ستەمی ئەمڕۆ لە ستەمی دوێنێ زیاتر بێت، ئاخر لە كۆێی دنیادا بووە هاوڵاتی هەرێمەكەی خۆت تێبگلێنیت لە ململانێی ناوخۆیی و حیزبیەكانی خۆتەوە و مژدەی ڕۆژێكی باشتریان پێ بدەیت .  شەڕ بكرێت لەسەر دابەشكردنی پارە و پۆست لە نێوان چەند سەركردیەكی یەك حیزبدا،  و ژیان و ئاسایش و ئارامی گشتی و میزاجی گشتی بشێوێنیت .. هەرێمێك سەركردە باڵاكانی ناو یەك حیزب هێندە بێ متمانەن بەرامبەر یەكتر، تەنانەت بە گومانن لە ئەنجامدانی هەڵبژاردنێكی ناوخۆیی حیزبی بچوك كە پاك و بێگەرد بێت و خەوش و ساختەی تیا نەبێت، كەچی مژدەی دیموكراسی و هەڵبژاردن بدەیت بە خەڵك . ئێ خۆ ئێمە هەموومان باش ئەزانین كاتێك دوو بەرەی بازرگانخواز،  ئەكەونە شەڕ و ململانێ ، شەر لەسەر چی ئەكەن ؟ خۆ ناشێ بڵێن ئێمە شەڕی قوتی خەڵك ئەكەین ؟ ئەوان بە ئاشكرا شەڕی قازانج و قورخ ئەكەن، وە لە دەرئەنجامیشدا ئاشكرایە كە هەردوو بەرە قازانج ئەكەن، بەڵام  لەسەر حیسابی دۆڕاندنی خەڵك .  ئەم شەڕە سیاسیە لۆكاڵیەی بەرۆكی ئەم زەوییەی گرتوە  هیچ گومانم نیە بە زیانی خەڵكی بەشمەینەتی ئەم زۆنە  و قازانجی خودی سەركردەكان ئەشكێتەوە .. چونكە خۆ ئەمان شەڕی ئەوە ناكەن گەندەڵ و دز و جەردەكانیان بدەنە دادگا تا وڵات پاك بكرێتەوە لە گەندەڵ و گەندەڵكاری، ..بەڵكو هەموو شەڕ و ململانێكە شەڕی بەشداریكردن و هاوپشكییە لە بردنی  هەموو شتێكی ئەم وڵاتەدا .. 
جا بۆیە من لێرەوە وێڕای دەستخۆشیم بۆ بەڕێز د. شێركۆ عبدلله  بۆ نوسینە تەنز ئامێزەكانی و شیكاركردنەكانی ئەم دۆخە، دڵنیای ئەكەم كە  تەنها شێوازی شیكاركردنەكانی ئەو ڕاستن .. ئەم دۆخەی هەرێم بەرگەی شیكاری زانستی و ئەكادیمی و خۆماندوو كردنی ئەوتۆ  ناگرێت ( سەرەڕای سوپاسگوزاریم بۆ ماندوبونەكانی شێركۆ عبدلله) ، هەر بۆیە ئەم دۆخە تەنها پێویستی بە نوسین و شیكردنەوە  تەنز ئامێزەكانی تۆیە .. با هیچ نەبێت ئاهێك بەدڵی ئەو كەسانەدا بێت كە دڵنیان یەك شەممە نایەت.

created by Avesta Group and powered by Microsoft Azure