كاتێك دەوڵەت بوونی نابێت

بۆچوون / بیروڕا :: 03/09/2016

سەرچاوە: ئەلمەدا
وەرگێڕان: لوقمان محەمەد رەشید

كە دەوڵەت نەبوو، ئەندامێكی ئەنجومەنی پارێزگا، شاری نەجەف دەكاتە گۆڕەپانی جەنگ و بەهۆیەوە دەیان كەس بریندار دەبن، بەهۆكارێكی سادەیش، جۆرێك لە رێزگرتن بۆ باوكە مردووەكەی. كە دەوڵەت نەبوو، دەبیستین دەڵێن كە هێزمان هاوشانی هەموو تواناكانی هێزەكانی سوپا و پۆلیسی عێراقە. كە دەوڵەت نەبوو ناگەڕێن بە دوای ئەوانەدا كە دەستیان هەبووە لە داڕووخانی دەیان ماڵدا بەهۆی شاردنەوەی مووشەك و بۆمبەوە لە ناوچە نیشتەجێبووەكاندا، دەبێت بێدەنگ بیت چونكە كەسانێك هەن پێت دەڵێن: ئەگەر ئەو مووشەكانە نەبوونایە تۆ دەرفەتی ئەوەت بۆ نەدەڕەخسا لە فەیسبووكدا بنووسیت. كە دەوڵەت نەبوو، كۆمەڵە پارلەمانتارێك گاڵتەمان پێدەكەن و سووردەبن لەسەر ئەوەی خالید ئەلعوبێدی-ی وەزیری بەرگری بگۆڕن  بە بەدر ئەلفەحل-ی ئەندامی لجنەی ئەوقافی پارلەمان، ئەو ئەلفەحل-ەی پێش چەند رۆژێك هۆشداریی ئەوەی داینێ‌ كە ئەگەر پابەندی ئامۆژگاریەكانی (ئیخوان موسلمین) نەبین ئەوا هەموومان دەچینە ئاگرەوە. كە دەوڵەت نەبوو، كەس ناپرسێت ئەرێ‌ پاڵەوانی ئەو شەش ملیار دۆلارە كێیە كە بە بەرگوێ‌ و چاوی دەزگا حكومیەكانەوە رایكرد بۆ ئوردن.

رەنگە هەندێك بڵێن، بۆچی لەسەر ئەو سیاسیانە دەنووسیت كە ناخوێننەوە؟ ئەی چی بكەم بەڕێزان؟ ئایا خۆم بەدەستەبدەم؟ دەتانەوێت تەمەنمان بە سەرشۆڕی بەسەربەرین؟ وەك غەریب و نامۆكان ئاوڕ بدەینەوە؟. منیش وەك ئێوە ئازار دەچێژم بەوەی كە هاووڵاتیی وڵاتێكم سیاسیەكانی نایانەوێت سوپایەكی بەهێزی هەبێت، زۆربەی پارلەمانتارەكانی لە بۆنە نیشتمانیەكانیاندا وێنەی سەرانی وڵاتەكانی دراوسێی بەرزدەكەنەوە. بەڵام ئەوانەی (فۆبیای سوپا) كۆنترۆڵی كردوون، سەرەڕای ئەو هەموو قوربانیەی كە ئەم سوپایە دەیدات، ئەوە لەبیری خۆیان دەبەنەوە كە لەو ئێرانەی كردویانەتە بەرنامە و رێبازی خۆیان، هەر كەسێكی  سیاسی زیان بە سومعەی سوپا بگەیەنێت و هەوڵبدات گاڵتەی پێبكات، تاوانبارە.

بەرپرسەكانمان حەز ناكەن باسی ژمارەی قوربانیانی مووشەكەكانی ئەلعوبێدی بكەن. ئەوان حەزیان لە هیچ ژماردنێك نییە تەنیا ژمارەی پشتگیریكارەكانیان نەبێت، هەروەها ژمارەی بانكەكان و دەستبەسەرداگرتنی پرۆژەكان و بەڵێندەرایەتیەكان... ئیتر هەموو ژمارەكانی تر رەتكراوە و بێزراون، چونكە بەشێكن لە پیلانە نێودەوڵەتیەكان لەسەر ئەزموونی دیموكراتی لە عێراقدا. هەربۆیە وەك پیشەی خۆم دوێنێیش بەناو زۆربەی لاپەڕەی موجاهیدەكاندا گەڕام. بە حەنان ئەلفەتلاوی دەستم پێكرد بۆ هەیسەم ئەلجبوری و محەمەد ئەلكەربولی تا دەگاتە عالیە نوصەیف و مەحمود ئەلحەسەن، سوپاس بۆ خوا هیچكامیان لە بیریان نەچووبوو كە دەستەواژەی (هەینیی موبارەك) دابنێت. ئیتر ئەو خەڵكەیش كە ماڵی رووخێنرا و ئەو بریندارانەی لە نەجەف پێكران، خوایان هەیە ئاگای لێیانبێت. 
 
ئایا خەڵكی عێراق شایانی ئەم هەموو مردنەیە؟ ئایا خەڵەتاندن و  دزینی سامانەكەی بەس نییە؟ نموونەیەكی شەرمهێنمان داوەتە جیهان كە تێیدا نەفسنزمەكان دەستیانگرتووە بەسەر موقەدەراتی وڵاتدا. دڵسۆزیی دەرەكیی ناپاكی نییە. پێوەرە تایەفی و هەلپەرستیەكان شوورەیی نین و لەبری بانگەواز و داوای یارمەتیی نیشتمانی، سەلیم ئەلجبوری-ی سەرۆكی پارلەمان بانگەواز و داوای یارمەتیی دەرەكی دەكات و جارێك دڵسۆزیی بۆ تاران دەردەبڕێت و جارێكی تر چاوەڕێی بەرەكەی سوڵتان ئەردۆغانە.


created by Avesta Group and powered by Microsoft Azure