موبالەغە

بۆچوون / بیروڕا :: 01/09/2016

موبالەغەكردن، وەك ئەڵێن، ترش و خوێ‌ ی قسەیە، قسەیش یەكێكە لەو بابەتە بەلاشانەی كە ئێمەی كورد، بە قیادە و قەواعیدەوە، بەشی كەسمان تێدا نەهێشتۆتەوە. فەلەبەرئەوە ئەگەر لە رۆژێكدا چوارسەد فەرمایشتمان هەبێت سێصەد و حەفتایان زیادە. زیادڕەویی وایان تیایە كە هیچ درۆزنێكی موحتەریف ناتوانێ‌ سوێندی لەسەر بخوات مەگەر ئەڵـڵاهومە وەعدی پۆستێكی باشی بدەیتێ‌..
قسەكانیش لەم بابەتانەن:
1-موحاسیبێكی بۆ ناردوین بەقەد ئاوی شەو پاكە.
2-نەخەڵەتابی بڕوا بە قسەكانی بكەی، بەقەد وەزارەتی سامانە سروشتی یەكان درۆ ئەكات.
3-كە كۆمپیوتەرەكەمان بەستەوە، بەقەد سەیارەكەی سەناعە برغوی زیادەی لێ‌ مایەوە.
4-ماڵی باپیرم بەقەد ئیسعافەكەی تەواری زەلامی تیا مردووە.
5-كچی چی هەتیو؟! بەقەد سەباح شووی كردووە.
6-زۆر داماوە. بەقەد كورد غەدری لێ‌ كراوە.
7-شەریف؟! ئەهـ قوڕی دنیا بەسەرم. نەگبەتی كوڕی نەگبەت بەقەد دەڵاڵێك شوققە و باخی دیوە.
8-تەحلیلی چی پێ‌ ئەكەی كوڕی ئاسمان؟! بەقەد كەرێكی لێ‌ نازانێ‌.

created by Avesta Group and powered by Microsoft Azure