ئەمیش تێك چوو

بۆچوون / بیروڕا :: 18/08/2016


-چی یە دیسان ساوەرە؟
+  ئا.
-كچێ‌ دە ئاخر شەقم برد.. حەفتا ساڵ ساوەر؟!.
+ ناشكور مەبە.. خوا هەر ئەوەی داوە.
-دە باشە هیچ نەبێ‌ ترش و پیازێكت لەگەڵدا دابنایە.
+ ماشەڵـڵا لە خوا.. فێری داواكاریی قورس بووی، كابرا!!
-ترش و پیاز داواكاریی قورسە؟!!
+ بەڵێ‌ قورسە.. دوعابكە  ساوەرەكەشمان لێ‌ نەسێنێت.
-حكومەت لێمانی ئەسێنێ‌؟!
+ بەڵێ‌.  ئەوە نی یە  بەتەمایە كارەباكەش بدات بە كەرتی تایبەت!!.
-بیرم نەبوو راست ئەكەی. قەراری داوە ئەویش بدات بە مەجموعەیەك قۆنتەراتچی نزیك خۆی.. یاڕەببی مۆزەمبیق خێر لەخۆت نەبینی.
+ مۆزەمبیق؟!!.. مۆزەمبیق بڵێ‌ چی؟!.
-چۆن بڵێ‌ چی؟!.. هەمووی خەتای مۆزەمبیقە. رەببی وەزارەتی شارەوانی زبڵ بتخوات.
+ شارەوانی؟!!.
-ئا ئا شارەوانی...رەببی  صەدام هەر شەوە قەبرێك بچی.
+ ئەوە تۆ شێت بووی یان ئەتەوێ‌ من شێت كەی؟. مۆزەمبیق لە كوێ‌  و صەدام لە كوێ‌  و شارەوانی لە كوێ‌ كابرا؟!!.. من باسی كارەبای خۆمانت بۆ ئەكەم.. كارەبای نیشتمانی.
-بەڵێ‌ نیشتمان خۆشەویستە و لەم رووەوە شاعیری گەورەمان ئەڵێ‌ وەتەن ئەدانە كەس نەدۆش وەزەڕ....
+ بە فەخری عالەم ئەمیش تێك چوو.. هەی ماڵی وێرانم.
-هەر ئەو بوختانە مابوو بۆمانی بكەی.. بۆچی تێك چووم؟!
+ ئەی ئەوە نی یە كارەبای نیشتمانی ئەبەیتەوە بۆ شیعر و شانامە!.
-ئەی بیبەم بۆ كەرتی تایبەت!؟.

created by Avesta Group and powered by Microsoft Azure