سەرەك وەزیران نیگەرانە

بۆچوون / بیروڕا :: 17/08/2016

سەرچاوە: ئەلمەدا
وەرگێڕان: لوقمان محەمەد رەشید

لەم رۆژانەدا قسەوباسێكی زۆر لەسەر یاسای لێبوردنی گشتی دەكرێت. حكومەت یەكەم لایەن بوو كە لەسەر زاری حەیدەر عەبادی لە ساڵی 2014 دا باسی كرد و دواتر لە كۆبوونەوەكەی رۆژی 16/5/2015 دا پەسەندی كرد. ئێستا سەرەك وەزیرانی بەڕێز باس لەو مەترسیانە دەكات كە لە جێبەجێكردنی یاساكەدا هەیەتی، وەك ئەوەی رەشنووسی ئەم یاسایە لەلایەن حكومەتی بۆركینا فاسۆ-وە پێشكەش بە پارلەمانی عێراق كرابێت. 

گوێ‌ مەدەرێ‌ مادام باس لەوەدەكەین كە لەم وڵاتەدا روودەدات، چونكە زۆرن ئەو موفاجەئانەی كە بە تێپەڕوونی كات دەبنە نوكتەی قورس. وەك ئەوەی دوێنێ‌ رێزدار حەیدەر عەبادی وتی:"زۆرباش گەندەڵكارەكان دەناسین". پێش ئەوەیش لێی بپرسن كە مادام دەیانناسیت، ئەی بۆچی دەستگیر ناكرێن و لێپرسینەوەیان لەگەڵدا ناكرێت؟ بە ئاسوودەییەكی بەڵێنپێدانەوە وەڵام دەداتەوە كە بۆیە ناگیرێن و لێپرسینەوەیان لەگەڵ ناكرێت چونكە دەیەوێت "لە نیگەرانی و دڵەڕاوكێدا بژین". ئەمە ئەو دوودڵی و نیگەرانییەیە كە رەنگە بیەوێت مونافەسەی (نیگەرانی)ی بان كی مۆن-ی پێ بكات، چونكە ماوەیەكە هەوڵدەدات مونافەسەی بەڕێز عەدنان ئەسەدی-ی راوێژكاری ئەمنیی سەرەك وەزیران بكات، چونكە ئەویش نیگەرانیی خۆیی لە یاسا دەربڕیوە. وەك بیرم بێت ئەمە یەكەمجارە جەنابی راوێژكار نیگەران بێت. بە درێژایی ساڵان دۆسیەی ئەمنیی لای ئەو بوو نەماندی رۆژێك نیگەران بێت كە بەچاوی خۆی ئۆتۆمبێلە مینڕێژكراوەكانی دەبینی بە شەقامەكانی پایتەختدا دەهاتن و دەچوون بۆ دروێنەكردنی گیانی سەدان كەس. هیچ نیگەران نەبوو كاتێك دەیان ملیار بۆ (ئەمنی فەزایی) خەرج كرا. لەوەیش گرنگتر بەوەیش نیگەران نەبوو كە هەموو بەیانییەك چەندین راكردنی سەركردە تیرۆریستەكانی دەیخوێندەوە و خەڵكیش رۆژانە دەیپرسی: ئەرێ‌ ئەو كەسانەی كە گلاونەتە دەربازكردن و بەقاچاخدەركردنی تیرۆریستەكانەوە،  بۆ سزا نادرێن؟ ئەو بەرپرسە بۆچی بە ئاسوودەیی دەژی كە پارەی دەوڵەت دەبات و دەیكاتە سامانی خودی خۆی؟ بۆچی ئەو گەندەڵكارانەی كە پۆستەكانیان كردوونی بەژێر پارە و خۆشگوزەرانییەوە، بۆچی بە ئارامی و بە دڵنیایی دەژین؟. پرسیارگەلێك كە رۆژانە خەڵكی دەیكەن و كەچی هیچ وەڵامێكیان دەستناكەوێت بێجگە لەوەی كە دەڵێن:"دڵنیابن كە ئێمە هەست بە نیگەرانی دەكەین".
هەموو ئەوەی ئەمڕۆ دەیبینین، گەڕانەوەیە بۆ ئەو نیگەرانییەی كە رۆژێك بەڕێز نوری مالیكی تووشی بووە، نیگەرانیی دەسڵات و تاكڕەوی و سڕینەوەی ئەوی دی و پارچەپارچەكردنی وڵات و پێشكەشكردنی بە هاوڕێ‌ و ئەحبابەكان و گۆڕینی دامەزراوەكانی دەوڵەت بە حزبە تاڵاتچییەكان و یاسایش بە لۆژیكی تایەفە و خێڵ.
زوڵم و ستەم زۆر بەئازارە هەرچەندە بە یاسایش پەردەپۆش كرابێت. من خۆم ئومێدەوار بووم كە لە سەردەمی بە هێزیی یاسادا بژیین لە دەوڵەتێكدا كە دروشمی سنگفراوانیی لە بیروڕا و توندوتۆڵی لە ئاسایش و رووبەڕووبوونەوەی تیرۆر و تاوان و گەندەڵی و وێرانكاریدا بژیاینایە.
دروشم و دروشمبازیی درۆ و گوتاری تۆڵەسەندنەوە، رێگەی پێشكەوتن و سەقامگیریی لە عێراقدا داخست. لەبری دڵنیایی ترس تەشەنەی سەند. خەڵكی كران بەگژ یەكتریدا. یاسا گۆڕدرا بۆ دادگایكردنی بەدرۆ و ئاستی خوێندن و تەندروستی و خزمەتگوزاریەكان دابەزین و ئەمن و ئاسایش نەما.
دەوڵەتانی خاوەن یاسای راستەقینە، ئەمڕۆ بەرهەمی جێبەجێكردنی عەدالەت بەیەكسانی بەسەر هاووڵاتیەكانیاندا دابەش دەكەن. لەبەرامبەردا ئێمەیش، ساڵانێكی دوور و درێژی نائومێدی و قەیرانمان لەگەڵ گروپی (دەوڵەتی یاسا)دا تێپەڕاند لە وڵاتێكدا كە نەخۆشیەكانی بەرتیل و ساختە و هەلپەرستی و خزمخزمێنە و حزبحزبێنە و تایفەگەری تەنیویەتی و دایڕزاندووە.




 

created by Avesta Group and powered by Microsoft Azure