رێكەوتنی ستراتیجی

بۆچوون / بیروڕا :: 14/08/2016

د. شێركۆ عەبدوڵـڵا

- چـ چـ چـ چـ.. عەجیب.. وەڵڵاهی ئەمە (یەك) شتی وا ببیستم.. یەعنی ئەو وڵاتە لە وەختی شەڕدا عەلەمێكیان هەیەو لە وەختی ئاشتی خانیشا عەلەمێكی تر؟!
+ بەڵێ ئەی چۆن.. فیلیپین دوو نەوع ئاڵای هەیە.. كە لەشەڕدا بێت ئەچێ لەژێر عەلەمێكدا ئەی رەقیب ئەڵێ بەعەكسی ئەو عەلەمەوەی كە لەعانی فێستیڤاڵ‌و ئینتیخاباتا هەڵی ئەواسێ.
-ئاخر بۆچی؟
+ چونكە قوڕبەسەرانە، خەڵكی فیلیپین، نیوەی وەختەكە لە شەڕدا بوون. موعەدەل ‌وڵاتەكەیان داگیركراو بووە.. نەگبەتن.
-بە سەری خۆم ئێمە نەگبەتترین.. بەس نییە ئەوان ئەوروپییە سوروسپییەكان داگیریان كردوون.. ئێمە گوناحین كە ژێردەستەی عەرەبی ناشیرین‌و رەززاگرانین.. ئەرێ‌ بەڕاست بەگم.
+ گیانی بەگت.
-عەرەب بۆچی ئەوەندە ورگن‌و كەتەن؟
+ بڵێم چی.. رەنگە هی ئەوە بێ پارێز ناكەن.
-پارێز ناكەن؟؟.
+ ئم.
-بۆچی پارێز ناكەن؟.
+ پارێز چۆن بكەن كوڕی باوكم؟! زمانی عەرەبی حەرفی (پ)ی نییە ئیتر چۆن ئەتوانن پارێز بكەن.
-ئااااا.. جوانە. كەواتە ئینگلیز بۆیە نازانێ قەزاتمە لێ بنێ چونكە حەرفی (ق)ی نییە.
+ ئەی تەبعەن.
-تومەز هەر ئەمەشە وایكردووە كورد ئاوا سەری بچێتە گۆڕی ئاژدادییەوە.. خەتای ئەوەی حەرفی (گ)مان هەیە.. (گ)ی ناموبارەك
+ بۆچی ناموبارەكە؟.
-چونكە هەرچی شتە خراپەكان هەیە بە (گ) دەستپێدەكات.. مەسەلەن گومرگ، گروپی تیرۆریستی..
+ گۆڵمەزی دراوسێ.
-رەحمەت لە دینت.. گرانی.
+ گۆڵی حیزبەكان.
-فیعلەن گۆڵی حیزبەكان.. گێلكردنی میللەت.
+ ئافەرم گێلكردنی میللەت.. چیتر؟.
-رێكەوتنی ستراتیجی.
+ ئینجا رێكەوتنی ستراتیجی كوا بە (گ) دەستپێدەكات؟
-ئەی ناڵێن رێكەوتنی ستراتیجی بووە بە گونی قۆڕ!

created by Avesta Group and powered by Microsoft Azure

بەپەلە