بەحری خەیاڵ

بۆچوون / بیروڕا :: 01/08/2016

 

 + عەرەبیش قەومێكی سەیرن بەگم. تەماشا ئەكەی كابرا لەدەست داعش رائەكا بۆ ئەوروپا، كەچی لەوێ‌ ناهێڵی كچەكەی بچێ‌ بۆ مەكتەب.
-بەسەری خۆم ئێمە عەجیبترین رۆڵە. لە داخی سەدام راپەڕینمان كرد كەچی هاتین ئەنواع و ئەشكاڵ سەداممان دروست كرد.
+ بە رەئی من گەورەم ئەو جوملەیە دیلیت بكەی باشترە.
-دیلیت؟
+ ئا.. یەعنی بیكوژێنەرەوە. با دوایی كوڕی باشێك نەیكا بە ماڵ بە سەرتەوە و بڵێ‌ دڵت بۆ خاڵە باوكە لێ‌ ئەدات.
-كوڕە چی ئەڵێن با بیڵێن. تازە من لەڕێ‌ ی چیا ماوم!!
+ رێ‌ ی هات و نەهات، قوربان.
-ئەی رەحمەت لەو شیرەی كە بایەعەكەت لێ‌ ی شاردیتەوە. ئەشهەدوبیلـلا چاكت پێكا. رێ ی هات و نەهات.. ئافەرم ... ئەزانی تۆش بەعزە جارێك زیرەكیت!؟
+ كوڕە بە قورعان لە خۆمەوە وتم.. هەر ناشزانم یەعنی چی..
-چی نازانی یەعنی چی؟
+ ئەم هات و نەهاتەی كە عەرزم كردی.
-یەعنی نازانی كێ‌ هات و كێ‌ نەهات؟
+ نەبەخوا. لە كوێوە بیزانم، خۆ من لە پرسگەی مەتار نیم.
-تۆ سەیری ئەم قەلەمونە ناكەی.. رۆڵە گیان خۆ شەرت نی یە لە مەتارەوە بێن.
+ ئەی لە گەراجەوە؟
-قیسمێكیان بەڵێ‌. بەڵام قیسمێكی تریان لە گەراجیشەوە نایەن.
+ لە مەتارەوە نەیەن و لە گەراجیشەوە نەیەن، كەواتە مەگەر لە بەحرەوە بێن.
-بەحری چی هەتیو؟
+ بەحری خەیاڵ.
-خەیاڵی چی ؟
+ خەیاڵی یەكڕیزیی كورد. 

created by Avesta Group and powered by Microsoft Azure