كۆمیدیای كۆنگرە باڵاكان

بۆچوون / بیروڕا :: 26/07/2016

نووسینی: عەلا حەسەن
سەرچاوە: ئەلمەدا
وەرگێڕان: لوقمان محەمەد رەشید

لەو كاتەوەی دامەزراوە، لە چلەكانی سەدەی رابردوودا، كۆمكاری وڵاتە عەرەبیەكان بەتوندیی دەستیگرتووە بە داكۆكیكردنی لە رژێمەكان, دیارترین كارەكانی ئەم كۆمكارە رێكخستنی كۆنگرەی باڵا (لوتكە)ی ساڵانەیەتی كە لە یەكێك لە پایتەختەكاندا دەیبەستێت و ئەجێندا- خشتەی نەگۆڕی كارێكی هەیە و هیچ گۆڕانكارییەكی تێدا ناكرێت مەگەر لە حاڵەتی دەگمەندان نەبێت.
لە پێداچوونەوەیەكی خێرای هەموو كۆنگرەكانی پێشوویدا، دەردەكەوێت كە لەچوارچێوە گشتیەكەی دەرنەچووە، ئەویش باسكردن و گفتوگۆكردنی تەحەدیەكان و بڕیار وەرگرتنە لەسەر یەكخستنی ریزی عەرەب لەدژی دوژمنانی نەتەوە، هەروەها پابەندكردنی وڵاتانی ئەندام لەسەر پێشكەشكردنی پشتگیریی دارایی بۆ دەسەڵاتی فەلەستینی.

دوای هەڵكردنی رەشەبای بەهاری عەرەبی، هەندێك لە سەرۆكەكان ئامادەی كۆنگرە باڵاكان نەبوون، ئیتر یان چوونەتە ریزی كۆڕبەندی لەسەركارلابراوەكانەوە یاخود رۆڵیان تەواوبووە و چاوەڕێی دەرچوونی حوكمەكانیانن، یان چوونەتە دنیاكەی ترەوە، بەمەیش كۆبوونەوە باڵاكان نمایشی دیمەنە كۆمیدیەكانیان لەدەستداوە. قارەمانی ئەم دیمەنە كۆمیدیانەیش خوالێخۆشبوو موعەمەر قەزافی سەرۆكی لیبیا بوو كە هەڵوێستی زۆر سەیروسەمەرە و گاڵتەجاڕیی هەبوو. ئەم خاوەنی كتێبی سەوز-ە، یەكەم سەركردەی عەرەب بوو كە رەخنە لەكۆنگرە لوتكەكانی عەرەب بگرێت. ئەو ئارەزووی بەدیهێنانی یەكێتیەكی ئەفریقایی هەبوو چونكە گەیشتبووە ئەو قەناعەتەی كە دابەشكاری و جیاوازیەكانی نێوان عەرەب هەتا رۆژی قیامەت هەر دەمێننەوە و كۆتاییان نایەت.
كۆنگرە باڵاكان هیچیان لە زیهنی عەرەبدا جێنەهێشتووە تەنیا رووداوە سەیرەكانیان نەبێت. هەرچی بڕیارەكانیان و رێنماییەكانیانە ئەوە كۆپیكراوی خولی پێشتر بووە و هیچیتر، بۆیە نابنە جێی بایەخ و گرنگیپێدانی شەقام، چونكە هێندە لێی دوورن كە گوزارشت لە بیر و خواستەكانیان ناكات یان لانیكەم نایانپارێزێت لە دەسەڵاتە چەوسێنەرەكانیان. بەڵام شتە سەیرو سەمەرەكانیان زۆرن، لە كۆنگرە باڵاكەی ساڵی 1978ی بەغدادا، یەكێك لە سەرۆكەكان بۆ نانی بەیانی داوای شیری حوشتری كردووە. یەكێكی دیكەیان بە پەلە گەیەنراوەتەوە هۆبەی چاودێریی وردی تەندروستی چونكە بە خواردنی قۆزیی چەور ئینتەلای كردووە، ناچار پزیشكە عێراقیەكان بەدیاریەوە شەونخونی و ئێشكگرییان كردووە هەتا گەدەی بە تەواوی باش ببێتەوە و بتوانێت ئامادەی دانیشتە فەرمیەكەی لوتكەكە بێت بۆئەوەی لەگەڵ هەموو خاوەن جەلالە و فەخامەتەكانی دیكەدا پێكەوە دەنگبدەن لەسەر بڕیاری ناڕەزایی دژی ئەنوەر سادات سەرۆكی كۆچكردووی میسر، چونكە لەگەڵ سەرەك وەزیرانی ئیسرائیلدا و بە چاودێریی ئەمریكا، واژۆی رێككەوتننامەی كامپ دەیڤیدی كردووە. هەمان ئەو سەرۆكە لە كۆنگرەیەكی باڵای دیكەدا و هەر لە بەغدا لە ساڵی 1990، فڕۆكەیەكی سەرۆكایەتیی عێراقی دەستكەوت، كەچی دوایی لە تونس فرۆشتی لەبەرئەوەی لە وڵاتەكەیدا ئەو جۆرە فڕۆكەخانانەی تێدا نییە كە فڕۆكەی مەدەنی بتوانن تێیدا بنیشنەوە.

عەبدولهادی مهۆدر-ی میدیاكار، لە تۆڕی كۆمەڵایەتی، دەربارەی بیست و حەوتەمین كۆپیی كۆنگرەی باڵا كە لە مۆریتانیا رێكخرا، زانیاریی ئەوە دەدات كە (وڵاتی برا) هەزار و 500 حوشتری ئامادەكردوە لەگەڵ خەڵكێكی زۆر بە جلوبەرگی میلـلییەوە بۆ پێشوازیكردن لە میوانەكانی كۆنگرە هەر لە فڕۆكەخانەوە هەتا شوێنی حەوانەوەیان. 

هەر لە چوارچێوەی ئامادەكاریەكانی حكومەتی مۆریتانیا بۆ لە ئامێزگرتنی كۆنگرە باڵاكە، شەقامێكی تازە كراوەتەوە و ناونراوە شێخ زاید بن سوڵتان ئالنەهیان كە فڕۆكەخانەی پایتەخت دەبەستێتەوە بە شوێنی بەستنی كۆنگرەكە و بارەگای مانەوەی میوانەكانەوە. هەروەها شەقامێكی تریش ناونراوە ئەلقودس وەك هێمایەك بۆ شانازیكردنی مۆریتانیا بە حكومەت و گەلەكەیەوە، بە دۆزی سەرەكیی عەرەبەوە. هەرچی ئامادەكردن و بەكارهێنانی حوشترەكانیشە بۆ پێشوازیكردنی میوانەكان، ئەمەیان رەنگە دیمەنێكی تازەی كۆمیدی بێت كە كۆنگرە باڵا عەربیەكانی چەند ساڵی كەمی رابردوو نەیانبووە لەبەر سەرقاڵیی سەركردەكانی عەرەب بە شەڕە ناوخۆییەكان و ململانێ ئیقلمیەكانەوە. لە كۆتاییشدا دەڵێین هەموو كۆنگرەیەك، عەرەب بەخێر و خۆشی، و حوشترەكانیش لە خزمەتی سەرۆكەكاندان.

created by Avesta Group and powered by Microsoft Azure