ناكۆكیەكانی سعودیە و ئێران دەچنە قۆناغێكی ترسناكترەوە

بۆچوون / بیروڕا :: 10/07/2016

دواڕۆژ
سەرچاوە: رەئیلیەوم
وەرگێڕان: لوقمان محەمەد رەشید
سعودیە بەرەیەكی نوێ‌ بۆ رووخانی رژێمی ئێران دەكاتەوە..و وتەكەی ئەمیر توركی فەیسەڵ لە كۆنگرەكەی ئۆپۆزیسیۆن لە پاریس خاڵی دەستپێكە... بۆچی لەمكاتەدا سعودیە ئەم بڕیارە ترسناكەی دا؟ و ئەو ئەنجامانە چین كە رەنگە لێیەوە سەرچاوە بگرن؟ ئەی پەرچەكرداری ئێران چۆن دەبێت؟

 

 رۆژی شەممە رێكەوتی 9ی تەموز، ناكۆكی و ململانێكانی نێوان سعودیە و ئێران چوونە قۆناغێكی تازەوە كاتێك توركی فەیسەڵ سەرۆكی پێشووی دەزگای هەواڵگریی سعودیە وتارێكی لەبەردەم كۆنگرەی ئۆپۆزیسیۆنی ئێران خوێندەوە كە لە پاریس بەڕێوەچوو و پشتیوانییەكی بێ‌ سنووری بۆ ئەو نەیارەی ئێران دەربڕی و رژێمی (خومەینی)ی  بەوە تۆمەتباركرد كە (بێجگە لە وێرانكاری و تائیفیەت و خوێنڕشتن، هیچی دیكەی نەك هەر بۆ ئێران بەڵكو بۆ هەموو وڵاتانی خۆرهەڵاتی ناوەڕاستیش نەهێناوە). هەروەك رایشیگەیاند كە لەگەڵ رووخانی ئەو رژێمەدایە.

ئەمیر توركی فەیسەڵ، وەك وەزیری راستەقینەی دەرەوەی سعودیە وایە و بە پیاوی ئەركە قورسەكان ناودەبرێت. یەكێكیش لە دیارترین ئەو ئەركە قورسانە بریتییە لە گرێدانی پەیوەندی و دیدارەكان لەگەڵ بەرپرسانی ئیسرائیل و كردنەوەی كەناڵە نهێنی و ئاشكراكان لەگەڵیاندا, بەم ئامادەبوونەیشی لە كۆنگرەی ئۆپۆزیسیۆنی ئێران (كە لایەنێكی چەكدارە و تانك و چەكی تازەی هەیە و خاتوو مریەم رەجەوی سەركردایەتی دەكات - موجاهیدینی خەڵق)، هەروەها بە تەئكیدكردنەوەی لەسەر ئەوەی كە ئەم هێزە نەیارەی ئێران سەردەكەوێت لە لەناوبردنی رژێمی وەلی فیقهدا و بەم پشتیوانیەی لەو ئەركەدا، هەموو ئەمانە مانای وایە كە بازنەی چالاكیەكانی خۆیی فراوانتر كردووە و لە رۆژانی داهاتوودا دۆسیەی ئەم هێزە ئۆپۆزیسیۆنە و پشتگیریكردنی دارایی و سەربازییان دەگرێتەدەست.

دەسەڵاتدارانی سعودیە خۆیان بێبەری دەكەن لە چالاكی و جموجووڵەكانی ئەمیر فەیسەڵ و پەیوەندییەكانی لەگەڵ ئیسرائلییەكاندا، بەو پاساوەی كە كابرا هیچ پۆستێكی فەرمیی لە دەوڵەتەكەیاندا نییە، بەڵام ئەوانەی ئەم پاساوەیان قبووڵە و بڕوای پێدەكەن زۆر كەمن چونكە ئەمیری ناوبراو كە دوای ئەوەی وازی لە پۆستی سەرۆكایەتی دەزگای هەواڵگریی هێنا، دوو گرنگترین پۆستی لە وەزارەتی دەرەوەی سعودیەدا بەڕێوەبردووە (سەرۆكایەتی هەردوو باڵیۆزخانەی وڵاتەكەی لە لەندەن و واشنتۆن) بۆ ماوەی نزیكەی 10 ساڵ، ناكرێت پیاوێكی هەروا ئاسایی بێت و هەروەك نایشبێت هەر لەخۆیەوە مل بنێت بۆ ئەم جۆرە ئەركانە بەبێ‌ ئەوەی لەلایەن دامەزراوەی دەسەڵاتدار و تەنانەت خودی پاشایشەوە رانەسپێردرێت.
ئەوەی جێی سەرنجە، كەناڵی (الاخباریە)ی فەرمیی سعودی  وتەكەی ئەمیر فەیسەڵی پەخش كرد و رۆژنامە نیمچەفەرمیەكانیش خستیانە پێشەوەی لاپەڕەی یەكەمیان. ئەمەیش مانای ئەوەیە كە (پەیامێك) هەیە و سەركردایەتی سعودیە دەیەوێت ئاراستەی هاوتا ئێرانیەكانی بكات و سەرەكیترین ناونیشانی پەیامەكەیشیان ئەوەیە كە قۆناغی داهاتوو قۆناغی شكاندن و بەزاندنی هەموو هێڵە سوورەكان و دەستوەردانی راستەخۆیە لە كاروباری ناوخۆی ئێران لە هەموو بوارەكاندا.

لەسەرەتای دەستپێكردنی (عاصفە الحزم)ی سعودیەدا، چاودێران و بەرپرسانی سعودی و كەنداوییەكان لە شاشەی چەندین تەلەفزیۆنەوە دەردەچوون و بە گەشبینییەوە باسیان لە (عقیدە سلمان) دەكرد، هەروەها گواستنەوەی سەركردایەتی سعودیە بەرەو قۆناغی جیاواز كە ناونیشانەكەی رووبەڕووبوونەوەی سەربازییانەی ئێران بوو وەك پەرچەكردارێك دژی دەستوەردانەكانی ئێران لە كاروباری سعودیە بەتایبەت لە قۆڵی یەمەنەوە. هەندێك لەو كەسانە هەڕەشەی پشتیوانیكردنی ئۆپۆزیسیۆنی سوننەی ئێرانییان دەكرد (سوننە 30%ی گەلی ئێران پێكدێنن) هەروەها كەمە نەژادیەكانیش (عەرەبی ئەهواز لە خۆرئاوا و بلوج لە خۆرهەڵات و ئازەرییەكانیش لە باكور) بە پشتیوانیی دارایی و پڕچەككردنیان بۆ تێكدانی باری ئارامی ئێران و رژێمەكەی. 

ئەم گوتارە (هەڵۆئاسا)ییەی سعودیە، پاشەكشەی كرد و تا ئاستی ون بوون رۆیشتووە، لەدوای شكستی (گەردەلوولی پێداگری)یەكەی دوای ساڵێك و سێ‌ مانگ لە دەستپێكردنی و بێتوانایی فڕۆكەكانی لە سەپاندنی خۆبەدەستەوەدانی هاوپەیمانێتیەكەی حوسی و ساڵحیەكان و گرتنەوەی سەنعا و شارەكانی تریان و رادەستكردنەوەی چەكە قورسەكان و گەڕانەوەی دەسەڵاتی شەرعی و هەموو ئەمانە، ئیتر نازانین ئێستا بۆچی گوتارەكەیان تازە دەكەنەوە؟ و بۆچی سەركردایەتی سعودیە ئەم هەڵكشانە دەگەیەنێتە ئەم پلەیە لە دژی ئێران و بە ئاشكرا و بە نوێژی نیوەڕۆ ئامادەیی دەردەبڕێت كە ئۆپۆزیسیۆنی چەكداری ئێرانی لە ئامێز بگرێت؟.

بێگومان پشتگیریی سیاسی و دارایی و چەكداریی سعودیە بۆ بزووتنەوەی (موجاهیدینی خەڵق) كە لەلایەن ئەمریكا و ئەوروپایشەوە پشتیوانی دەكرێت، زیانێكی زۆر بە دەسەڵاتدارانی ئێرن دەگەیەنێت. ئەویش دوای ئەوەی كە بزووتنەوەكە و هێز و چالاكییەكانی تووشی پاشەكشە بوو لە دوای هێرشە سەربازیەكانی ئەمریكا كە رژێمەكەی سەرۆك سەدام حسێنی رووخاند كە پشتیوانێكی سەرەكییان بوو، بەڵام باوەڕ ناكرێت لەبەرامبەردا دەسەڵاتدارانی ئێرانیش بە گوڵ تێگرتن وەڵامی سعودیە بدەنەوە، چونكە كارتی زۆری گوشاریان هەیە، لەوانە بزووتنەوە شیعە نەیارەكانی ناو سعودیە و وڵاتەكانی دیكەی كەنداو و شانە نووستووەكان كە لەهەر ساتێكدا بێت دەتوانرێت بەئاگا بهێنرێنەوە و كارا و چالاك بكرێنەوە. كەواتە ماڵەكەی سعودیەیش هەر لەشووشەیە.  
جەنگی لەبری یاخود لە جیاتی، لە نێوان ئێران و سعودیەدا كە بە درێژایی پێنج ساڵی رابردوو لە یەمەن و سوریادا چڕكرابووەوە، ئێستا گەیشتووەتە كەناری فراوانبوون بەرەو قووڵایی ئێران و سعودیە و رەنگە بگۆڕێت بۆ رووبەڕووبوونەوەی راستەوخۆی خوێناوی. مەترسیەكەیش ئالێرەدایە.

نازانین سەركردایەتی سعودیە بە شێوەیەكی ورد حسابی وردی بۆخۆی كردووە پێش ئەوەی ئەم هەنگاوە هەڵكشاوە بنێت یاخود نا؟. ئاخۆ هەموو ئەگەرەكان و پەرچەكردارە چاوەڕوانكراوەكانی هەڵسەنگاندووە؟. بەڵام دەزانین كە كردنەوەی بەرەیەكی دیكە بێ‌ ئەوەی هەردوو بەرەكەی یەمەن و سوریای یەكلا كردبێتەوە، لە زانستە سیاسیی و سەربازیەكاندا هەنگاوێكی حەكیمانە نییە. ئێمە بڕوامان وایە و ئەمە بۆ ئێرانیش هەر راستە.


created by Avesta Group and powered by Microsoft Azure