هەڵكێشانی رەگی توندڕەوی

بۆچوون / بیروڕا :: 05/07/2016

سەرچاوە: شەرقولئەوسەت
وەرگێڕان: لوقمان محەمەد رەشید
كاتێك لە كۆتایی دووەمین جەنگی جیهانیدا نازیەت رووخا و ئەدۆڵف هیتلەر بەزی، ئەڵمانیا راپەڕی، راپەڕینێكی تەواو و بڕیاریدا بەخۆیدا بچێتەوە، بەخۆداچوونەوەیەكی تەواو و زۆر قووڵ.
تەماشایەكی ناوخۆیی كرد، تەماشاكردنێكی قووڵ و بابەتیانە و بێ‌ هەڵاوێری و بەوپەڕی جدییەوە، سەرەنجام گەیشتە ئەوەی كە یەكەمینی (چارەسەرەكان)ی كێشەكە دیاریكردنی نەخۆشیەكەیە و بۆیان دەركەوت كە هەردەبێت بیری نازی لە رەگوڕیشەوە ریشەكێش بكەن.
بۆیە هەڵمەتێكی توندوتیژیان دەستدایە بۆ سڕینەوە و هەڵكێشانی هەموو شوێنەوارێكی بیری نازیی (راستەوخۆ و ناڕاستەوخۆی) لە هەرچییەكدا كە پەیوەندییەكی بە كەلەپور و كەلتور و بیر و سیاسەت و هونەری ئەو فیكرەوە هەبێت. دەستیانكرد بە هەڵدانەوە و كنەكردن لە بیری گۆتە و نیچە و كانت و پێداچوونەوەی قووڵ و ورد بە هەموو بەرهەمەكانیاندا، لەترسی ئەوەی كە نەك یەكێك بووبن لە هۆكارەكانی كاریگەریی دروستكردن لەسەر دانانی میتۆدی توندڕەوی و پاشان نازیزم. جگە لەمانەیش سنووری میراتیی مۆسیقایشیان بەزاند و تەنانەت گوێگرتن لە مۆسیقای مۆسقاژەنی بەناوبانگی ئەڵمانی فاگنەر- یان قەدەغەكرد چونكە ئەدۆڵف هیتلەر هەمیشە و بەردەوام گوێی لێدەگرت. بۆیە مۆسیقا و گوێگرتن لە مۆسیقایان قەدەغەكرد لە ترسی ئەوەی كە نەوەك یەكێك بێت لە رەگەزە كاریگەرە فیكرییەكانی سەر خەڵك بەرە و توندڕەوییان.  
ئەڵمانیا دركی بەوەكرد كە لەبەردەم رووبەڕووبوونەوەیەكی چارەنووسسازدایە، رووبەڕووبوونەوەیەك كە ناچاری دەكات بڕیارێكی جدیی بدات لەوەی كە هەبێت یان نەبێت, لەبەردەم ترسناكی و قورسایی ئەم مەسەلەیەدایە، هەردەبوو رووبەڕووی ئەم مەسەلە زەحمەت و ئاڵۆزە ببێتەوە و بە مستێكی پۆلایین و بەبێ‌ هیچ موجامەلەیەك بە رووی نازییەتدا بوەستێتەوە. ئائەمە ئەو تەنگژەیەیە كە ئەمڕۆ رووبەڕووی جیهانی ئیسلامی بووەتەوە كە توانایەتی بۆ رووبەڕووبوونەوەی ئەو توندڕەوی و تەندوتیژییەی لەناو لاپەڕەكانی ژمارەیەك كتێب و دانراودایە و توندڕەوەكان بەكاریاندێنن بۆ شەرعیەتدان و نەگۆڕیی هەڵوێست و كاروكردەوەكانیان و پاشان تاوانەكانیان.  
ئەمڕۆ دیمەنەكانی كوشتن و كردەوە تیرۆریستیەكان دووبارە دەبنەوە لەسەر دەستی رێكخراوەكانی خوێن و مەرگ لە نموونەكانی قاعیدە و حزبوڵڵا و داعش كە بەردەوام دەكوژن و وێران دەكەن. ئەم كارانەیشیان لەسەر بنەمای فەتوا و بیروڕای غەریب و نامۆ دەكەن. هەتا لێدان و رووبەڕووبوونەوەی ئەمانەیش بە دەستكێشی ئاوریشمەوە بێت، ئەنجامەكانی هەرگیز جدیی و سوودمەند و كاریگەر نابن.
دەبێت بزانین و دركی پێبكەین كە پێویستە هەنگاوی جیاواز بگرینەبەر بۆ ریشەكێشكردنی بیری تیرۆریستی لە رەگ و ریشەیەوە، ئەم رێگەیە قورس و زەحمەتە و گرنگە ئەمڕۆ ئەو قەناعەتەمان لا دروست بێت كە ئەمە بۆ رازیكردنی خۆرئاوا و غەیری هۆرئاوا نییە بەڵكو لە پێناو پاراستنی خودی ئایین و كۆمەڵگەی موسڵماناندایە لەم مەترسیانەی كە روویان تێكردووە، چونكە زۆرترین زیانی پێدەگات و زۆرترین قوربانیی دەدات.
مەسەلەكە لەوپەڕی گرنگیی و ترسناكیدایە، وا مانگی رەمەزانیش رۆیشت و كردەوەكانی گروپە تیرۆریستیەكان نەوەستان، خوێن لە نزیكەی هەموو وڵاتێكی ئیسلامیدا چۆڕاوگەی بەستووە. دەبێت بنەماكانی توندڕەوی بپاڵێوین و پاكیان بكەینەوە، خۆ ئەگەر وانەكەین ئەوا زۆر بەداخەوە ئەم خوێنڕێژییە دوایی نایەت.
جەژن لێمان نزیكبووەتەوە و دڵەكان دەلەرزن و چاوەكان بەدیار دیمەنەكانی كوشتن و خوێنەوە ئەسرین دەڕێژن.


created by Avesta Group and powered by Microsoft Azure