میسی و شەهرستانی

بۆچوون / بیروڕا :: 28/06/2016

سەرچاوە: ئەلمەدا
وەرگێڕان: لوقمان محەمەد رەشید

عەلی ئەلكەرعاوی، ئەندامی ئەنجومەنی پارێزگای بەغدا وتی"سەرەكیترین هۆكاری قەیرانی هەمیشەپچڕانی تەزووی كارەبا ئەوەیە كە هێشتا هێڵی كارەبای ئێران نەگەیشتووەتە بەغدا و پاپۆڕە توركیەكانیش كە كارەبامان دەدەنێ‌، لەكار كەوتوون". خەڵكی عێراقیش لە ساڵی 2013 ەوە چاوەڕێی ئەوەن كە عێراق كارەباكەی بە دراوی قورس بفرۆشێت بە دەوڵەتانی لە نموونەی ئێران و توركیا وەك ئەوەی دكتۆر حسێن شەهرستانی (پسپۆری ئەتۆم) ئەوسا مزگێنی ئەوەی داینێ‌.
  
كاتێك هند (ئەبوكەلام)ی وەك سەرۆكێك هەڵبژارد، كۆمێنت و شیكاریەكان تەركیزیان لەسەر ئەوەبوو كە یەكەم سەرۆكێكە سیفەتی زانای ئەتۆمیی هەبێت، ئەبوكەلام زۆر حەزی لە قسەكردن نەبوو، لە وەڵامی پرسیارێكیشدا كە دەربارەی سیفەتەكانی بەرپرسی سەركەوتوو لێیكرا، وتی: بەرپرسی سەركردە دەبێت چەند خەسڵەتێكی تێدا بێت لەوانە: روئیا و تێڕوانی هەبێت، لە بڕیارداندا ئازابێت ، زۆر گرنگیشە شەفاف و تیوار بێت لەبەرچاوی هەمواندا و زۆر بە پاكی و بێگەردییشەوە كار بكات.

رەنگە هەندێك كەس هەبن بڵێن، باشە تۆ دەتەوێت چی بڵێیت لەكاتێكدا هەموو رۆژێك چەند وشەیەكمان پێدەفرۆشیتەوە و بەرپرسەكانیش نایخوێننەوە. منیش وەك نووسەرێك باش دەزانم كە بەرپرسەكانمان (بە زاناكانیشەوە) هیچ ناخوێننەوە تەنیا پێگەكانی (بەختی خۆت بزانە) نەبێت، ئەویش هەر بۆئەوەی بەشە بەختی خۆیان بزانن كە رۆژ دوای رۆژ زیاتر دەبێت.
دوێنێ‌ بینیمان میسی یاریزانی ئەرژەنتینی كە پەناڵتیەكی هەڵبژاردەی وڵاتەكەیی فەوتان، بە چاوی پڕ فرمێسكەوە بڕیاریدا واز لە یارییە نێودەوڵەتیەكان بێنێت. چونكە ئەو یاریزانەی كە قاچی ریسوای دەكات لە بەدیهێنانی سەركەوتن بۆ وڵاتەكەی، لە هەڵبژاردەی نیشتمانیدا جێگەی نابێتەوە. ئا ئەمەیە باجی خۆشەویستیی نیشتمان. نابێت ئەو كەسانە ریسوا بكەیت كە هیوا و ئومێدیان لەسەر هەڵچنیویت.
  
شكستهێنان لە لێدانی پەناڵتیدا بەلای ئەو یاریزانە مەعجیزەیەوە، تاوانێكە دەبێت خۆیی لەسەر سزا بدات. دەی خوێنەری ئازیزم وەرە لەگەڵمدا بەراوردێكی بكە لەگەڵ ئەو كردەوانەی كە زانا ئەیۆمیەكەمان كردوویەتی لە بەهەدەردانی زیاتر لە 30 ملیار پەناڵتی بە دۆلاری ئەمریكی بۆ ئەو كارەبایەی كە  چاوەڕێین لە ئێرانەوە پێمابگات!. 

لەوانەیە خوێنەری ئازیز بڵێت جا كەوایە، ئەی قسەفرۆش تۆ بۆ چاوەڕێ‌ دەكەیت حسێن شەهرستانییەك كە بە دەنگی دەنگدەران كورسیی وەزارەتی وەرگرتووە، بۆچی چاوەڕێی دەكەیت دەست لە پۆستەكەی هەڵبگرێت؟ ئەو هەتا دوا ساتی تەمەنی ئەم وڵاتە هەر دەمێنێتەوە، چونكە ئیستیقالەكردن لە وڵاتی دوو رووباردا پاساوی بۆ نییە و لەبەرئەوەیش كە وڵاتمان هەڵبژاردنی بێگەرد و شەفافی تێدا ئەنجام دەدرێت بۆیە وازهێنان تێیدا بەرپرسیارێتیەكی مەزنە. بۆ نموونە دەكرێت وەزیرێك دەستبەرداری پۆستەكەی ببێت كە ملیارەها دۆلاری لە كارەبای وەهمیدا بەهەدەر داوە و هێشتایش ئێمە چاوەڕێی سۆزی توركیا و بەزەیی ئێرانین. هەروەها دەبێت دەستبكێشێتەوە چونكە گرێبەستی سەیر و غەریبی لە بواری نەوتدا كردووە كە رەچاوی بەرژەوەندیی وڵات و خەڵكی تێدا نەكردووە.

ئایا شەهرستانی ئەم قسەیە دەخوێنێتەوە؟ بێگومان نەخێر، چونكە ئەو سەرقاڵە بە ئەركێكی گەورەترەوە، كە ئەویش گێڕانەوەی خوێندنە بەوپەڕی خێراییەوە بۆ دواوە!.


created by Avesta Group and powered by Microsoft Azure