هەمیشە و بەردەوام مەدەنییەت

بۆچوون / بیروڕا :: 25/06/2016

دواڕۆژ

نووسینی: عەدنان حسێن
سەرچاوە: ئەلمەدا
وەرگێڕان: لوقمان محەمەد رەشید
دوای نزیكەی دوو سەعات لە دەركەوتنی ئەنجامی كۆتایی راپرسیەكەی ئەندامێتیی بریتانیا لە یەكێتی ئەوروپا، بە مانەوەی یان دەستبەرداربوون لێی، دەیڤید كامیرۆن سەرەك وەزیرانی بریتانیا بە یاوەریی سامانتای هاوسەری چوونە دەرەوە و لەبەردەم داوننگ ستریت بارەگای سەرۆكایەتی حكومەتدا، چووە رووی رۆژنامەنووسان كە دەیانیان لێ‌ كۆبووبوونەوە.


دوای پێشەكیەكی كورت لە بەیاننامە كورتەكەی، كامیرۆن سێ‌ رستەی زۆر گرنگی وت، یەكەم: بە گوزارشتێكی بەهێز و بە دەق وتی"دەبێت رێز لەوە بگیرێت كە گەل گەرەكیەتی". گەلی شانشینە یەكگرتووەكە بە رێژەی كەمتر %53، دەرچوونی لەو یەكێتیە هەڵبژارد كە 43 ساڵە وڵاتەكەیان ئەندامێتی. رستەی گرنگی دووەمیش ئەوەبوو رایگەیاند لە مانگی تشرینی یەكەمی داهاتوودا كە كۆنگرەی ساڵانەی پارتەكەیی تێدا ئەنجام دەدرێت،  دەستبەرداری هەردوو پۆستی سەرۆكایەتی حكومەت و سەرۆكایەتی پارتی موحافزینیش دەبێت. لەو بارەیەوە كامیرۆن وتی"بریتانیا پێویستی بە حكومەتێكی نوێ‌ هەیە" پارتەكەیشی "سەركردەیەكی نوێی پێویستە". سێیەم رستەی گرنگی كامیرۆن، بەڵێنێكی بەهێزی بوو بۆ جێبەجێكردنی بژاردە و ویستی گەلەكەی، ئەگەرچی خۆی بژاردەیەكی تەواو جیاوازی هەبوو"هەرچیی لە توانانمدابێت دەیكەم بۆ هاوكاریی جێبەجێكردنی رێكارەكانی پرۆسەی دەرچوونی بریتانیا لە یەكێتی ئەوروپا، وەك خزمەتێك بۆ ئەم وڵاتە مەزنە".
كامیرۆن پەرۆشی مانەوەی بریتانیا بوو لە یەكێتی ئەوروپادا و لەو پێناوەیشدا هەتا دوا ساتەكانی پێش دەستپێكردنی راپرسیەكە، هەوڵی بۆدا. 

كامیرۆن سەرۆكایەتی حكومەتی ئێستای شانشینی یەكگرتوو دەكات، چونكە سەرۆكی پارتی موحافزینە كە زۆرینەیەكی تەواوی لە پارلەمانی بریتانیادا هەیە، وەك دەرەنجامەكانی ئەو هەڵبژاردنانەی كە هیچ گزی و ساختەیەكی تێدانەكرا، پێچەوانەی ئەوەی لە هەموو هەڵبژاردنێكی لای خۆماندا دەكرێت. كەچی كامیرۆن ئەوەی نەكرد كە عادەتەن سەرۆك حكومەتەكان و سەركردەی پارتەكان و پارلەمانتارەكان و وەزیرەكانی لای خۆمان دەیكەن، نەك هەر ئەمانە بەڵكو كەسانی دیكەیش لای خۆمان دەیكەن. نە زۆرینەی پارلەمانی و نە شایستەیی هەڵبژاردنەكان و نە هیچیانی كردە بیانوو و قسەی پڕوپووچ كە سیاسییە فاشیلەكانی خۆمان خۆیان پێوە هەڵواسیوە و ئەوپەڕی شكستیشیان لە هەموو شتێكدا هێناوە، بۆ ئەوەی لە دەسەڵاتدا بمێننەوە و درێژەی پێبدەن. ئەمە خولی دووەمی سەرۆكایەتیەكەیەتی ئەو خولەی كە تەنیا ساڵێك لەمەوبەر  بەدەستیهێناوەتەوە.
  
جارێكی تریش، ئەمە ئەو مەدەنیەتە دیموكراسییەیە كە قسە پڕوپووچ و پێكەنیناویەكانی وەك (قائیدی زەروورە) و (تەكلیفی شەرعی) و جۆرەكانی دیكەی وەك ئەم كەرەستە بەسەرچووانەی تر، كە سیاسەتمەدارە گەندەڵەكانمان دروستی دەكەن و بە زۆریش بەهۆی عەمامەبەسەرە گەندەڵەكانەوە رەواجی پێدەدەن.

دەیڤید كامیرۆن واز لە پۆستەكانی سەرۆكایەتی حكومەتی بریتانی و سەركردایەتی پارتی موحافزین دێنێت، چونكە دەزانێت دەنگدان دژی ئەو بژاردەیەی كە ئەم ویستوویەتی و بانگەشەی بۆكردووە، دەنگدانە دژی خۆی و دژی سیاسەتەكانی، بەمەیش تێگەیشتووە كە پێویست دەكات وازبێنێت چونكە لە سیستمی مەدەنیی دیموكراسیدا گەل ئەوە ناكات كە حكومەت دەیەوێت بەڵكو ئەوە حكومەتە ئەوە دەكات كە گەل دەیەوێت.

 بەتایبەتیش لەبەر ئەم هۆكارەیە كە ئیسلامیەكان و هەموو خاوەن بیرۆكە شمولییەكان ئەم سیستمەیان ناوێت، ئا ئەمەیش نەگبەتیەكەی ئێمەیە لەگەڵیاندا لەم وڵاتە و باقی ئەو وڵاتانەی دیكەی كە حوكمیان دەكەن یان هەوڵ دەدەن بۆ ئەوەی حوكمی بكەن. ئەمانە خۆیان بەو پڕوپووچێتیەوە دەنووێنن (بادەدەن) ئیتر ئەگەر دەرەنجامەكەی تیاچوونی سەدان هەزار و ئاوارەبوونی ملیۆنەها كەس و وێرانبوونی شارەكانیش بێت، وەك ئەوەی لێرە لەعێراقدا هەیە،  هەروەها لە دراوسێكەی خۆرئاوایشمان سوریا، و لە لیبیایش و... ئەوانی دیكەیش.

created by Avesta Group and powered by Microsoft Azure