وەزیرێكی ئیماندار و گەلێكی گومڕا

بۆچوون / بیروڕا :: 15/06/2016

سەرچاوە: ئەلمەدا
وەرگێڕان: لوقمان محەمەد رەشید


تێگەیشتنی عێراقی بۆ دیموكراتی لە رێوشوێنەكانی وەزارەتی ناوخۆدا رووندەبێتەوە كە هەڵكوتانەسەر و پەلامارە"ئیمانداریەكەی"حاجی خەیروڵڵا توڵفاح-مان بیردێنێتەوە و ئەم وەزارەتە لەسەردەمی بەڕێز محەمەد سالم ئەلغبان-دا خستویەتیە دیمەنێكی بەداخ و خەمهێنەوە. دایكێكی عێراقی لافیتەیەكی بەرزكردووەتەوە و تێیدا داوا لە حكومەت دەكات دوو كچە منداڵەكەی ئازاد بكات، یەكەمیان تەمەنی دە ساڵە و دووەمیشیان هەشت ساڵانە. خەیاڵتان بۆ ئەوە نەچێت و وابیرنەكەنەوە كە ئەم دوو كیژۆڵە منداڵە لە رێكخراوێكی تیرۆریستیدا كاردەكەن یان كارئاسانییان كردبێت بۆ ئەوەی ئۆتۆمبێلی مینڕێژكراو بێننە ناوچە نیشتەجێبووەكانەوە یاخود سیخوڕیی بەسەر پۆلیسە (قارەمانەكانمامەوە) بكەن. نەخێر بەڕێزان، ئەم دوو كیژۆڵەیە تاوانێكی زۆر لەوە گەورەتر و ترسناكتریان ئەنجامداوە، ئەمانە هاتوون لەم مانگی رەمەزانەدا ئاویان لەسەر شەقامەكان فرۆشتووە. لەبەرئەوەیش كە لەسایەی دەوڵەتە (ئیمانداریەكەی) بەڕێز ئەلغبان-دا ئەوەی روویداوە كارێكی ئابڕووبەرانەیە و شایستەی توندترین سزایە، ئیتر یان زیندانیكردنیان هەتا دوای جەژن، یاخود سزایەكی دارایی دووسەد هەزار دیناریی بۆ هەر یەكەیان.

لەم دیموكراتیەتەی عێراقدا ئەوە گرنگ نییە كە پارەی خەڵكی بدزیت، هەروەك ئەوەیش هەر گرنگ نییە كە ئامێری ئێكسپایەربوو بۆ دۆزینەوەی بۆمبڕێژكراوەكان هاوردە بكەیت، وەزارەتی ناوخۆ گوێ‌ بە ئۆتۆمبێلە مینڕێژكراوەكان نادات كە بەوپەڕی ئازادییەوە بە بەغدادا دێن و دەڕۆن، بەڵكو ئەوەی بەلایەوە گرنگە جێبەجێكردنی یاسای هەڵمەتی ئیماندارییە.

ساڵانێكە دەربارەی وێرانكاریەكان و ئەو هەڵانە دەنووسین كە دەرهەق بە نیشتمان و هاونیشتمانی دەكرێن، دەربارەی ئەو خەڵكەی كە پشتگوێخستنی ئەمنی دەیكوژێت، یەكسەر حكومەت روودەكاتە هاووڵاتیان و وەڵامێكی حازربەدەستیان دەداتەوە: بۆچی پابەندنابن بە یاساكانی حاجی خەیروڵڵا توڵفاح-ەوە؟.

بەڕێزان، كاتێك عێراقیەكان ئێوەیان هەڵبژارد، وایاندەزانی كە نموونەیەكی باشی حوكمڕانیی دەوڵەتی سەدەی بیست و یەكیان بۆدێنن نەك دەوڵەتێكی سەدەی یەكەمی كۆچی. وایاندەزانی كە سیاسیەكان گوێ لە خاوەن مەعریفە و شارەزایان دەگرن نەك خاوەن لافیتەكانی (حیجاب و تێزاب).

دوێنێ‌ هاووڵاتییەكی مەسیحیی عێراقی، لە نووسینێكدا سكاڵای ئەوە دەكات كە لەلایەن سەرۆككارەكەیەوە سووكایەتی پێكراوە چونكە چاوی لێبووە كە ئەم لە شوێنێكی دابڕاودا جگەرەی كێشاوە. ئەو بەڕێوەبەرەی كە بە واسیتە و خزمخزمێنە و بەرتیلخۆری ناسراوە، لەوە دەترسێت ئایینەكەی شوختێكی تێكەوێت چونكە هاووڵاتییەكی مەسیحی ویستوویەتی جگەرەیەك بكێشێت. لەو كاتەدا كە سكاڵاكەی ئەم هاووڵاتییە داماوەم دەخوێندەوە، ئاژانسەكانی دەنگوباس هەواڵی پۆلیسێكی پاكستانییان بڵاودەكردەوە كە دەیویست بە زۆر هاووڵاتییەكی هیندۆسی ناچار بكات بەڕۆژوو بێت. توندوتیژیی بەرامبەر دەنواند. ئەمە ناڕەزاییەكی زۆری لە تۆڕە كۆمەڵایەتییەكاندا وروژاند. چالاكوانە پاكستانیەكان لە تویتەرەوە نووسیان"ئایین مانای ئەوەنییە كە خەڵك ناچاربكەیت بەڕۆژوو بێت و ئایین تیرۆركردنی كەسانی بێدەسەڵات نییە". ئەمەیش وەزیری ناوخۆی پاكستانی ناچاركرد كە بە ئاژانسی دەنگوباسی فرانس پرێس رابگەیەنێت: پۆلیسەكە دەستگیركراوە و رێوشوێنی توندی لەبەرامبەردا پەیڕەو دەكرێت.
 رەنگە هەندێك كەس بە سپڵە و بێباك تۆمەتبارم بكەن، بەڵام ئاخۆ عەقڵ دەیگرێت داوا لە وەزیری (ئیماندار) بكەین كە داوای لێبوردن لە رەعیەتە گومڕاكە بكات؟



created by Avesta Group and powered by Microsoft Azure