كێ‌ چۆن ماتماتیك شەرح دەكات؟

بۆچوون / بیروڕا :: 30/05/2016

دكتۆر : ئەگەر رۆژی سێ‌ سەعات خۆم لە دەوام بدزمەوە، تا سەری مانگ هەمووی ئەكاتە چەند سەعات دەوام؟


باوكی تووڕە : سەگباب ئەگەر ئێستا دە جووت شەقت تێ‌ هەڵدەم و سبەینێ‌ پانزە جووتت تێ‌ هەڵدەم، هەمووی كردی یە چەند جووت شەق؟


پۆلیسی چالاكی یە مەدەنی یەكان : گریمان ئەمڕۆ شەش دائیرە مانیان گرت و سبەینێ‌ حەوت دائیرە مانیان گرت و دوو سبەی چوار دائیرە مانیان گرت، تێكڕای مانگرتنی دائیرەكان چەندە؟


كچە فەیسبوكەوان : ئەگەر بۆ هەر رەسمێك سەد و پەنجا لایكم بۆ بێت و هەتا دەوام تەواو ئەبێ‌ شانزە رەسم دابنێم، كۆی گشتی لایكەكانم دەكاتە چەند؟ مێرسی.


رۆژنامەنوسی حیزبی : ئەگەر بۆ هەر جنێوە مەقالەیەك سەد و بیست دۆلار موكافەئەم بۆ بنوسن و حەفتانە چوار هێلكەی ئاوا بكەم، ئیشەڵڵا لە مانگێكدا چەند دۆلارم بۆ ئەخەنە زەرفەوە؟


قونسوڵی ئەمریكا : ئەگەر ئێمە شەممە و یەك شەممە و دووشەممە بڵێین یەكێتی خاكی عێراق دەپارێزین، سێ‌ شەممە و چوار شەممە و پێنج شەممە و جومعەیش بڵێین دەستكاریكردنی سنورەكان بڤەیە، ئایا دەوڵەتی كوردی رۆژی چەند شەممە دادەمەزرێت؟


وەزیری كارەبا : ئەگەر ئێمە نیوەڕوان چوار سەعات و شەوان سێ‌ سەعات و  بەیانیان پێنج سەعات كارەباتان لێ‌ ببڕین، ئایا لەمانگێكدا خۆت و ماڵی خەزورت چەند سەعات كارەبای وەتەنچیتان هەیە؟

created by Avesta Group and powered by Microsoft Azure