بە مەرجێك

بۆچوون / بیروڕا :: 22/12/2019

نووسینی: حەمدی عەبدولعەزیز
ئامادەكردن و وەرگێڕانی: دواڕۆژ
ئەگەر ئەزهەر تەنیا ئەم پێنج كارەی خوارەوە بكات ئەوا بەڵێن بێت من بە گرنگترین منارەی رۆشنبیریی گەورەی خۆرهەڵاتی دادەنێم و هاوار دەكەم دەڵێم ئەم سەنتەرە بەناوبانگە یەكێكە لە لایەنە هەرە گرنگەكانی هێزە نەرمەكانی دەوڵەتی میسر:
یەكەم: بەڕاشكاوی بڕیار بدات كە وەهابییەت مەزهەبێكی وێرانكەرە، تۆوی تیرۆریی ئایینی هاوچەرخ لە خۆرهەڵاتی ناوەڕاستدا دەچێنێت.
دووهەم: دەربڕینی رق و سووكایەتیكردن بە هەموو ئایین و بیروباوەڕە ئاینییە نائیسلامییەكان بەجۆرێك لە خۆبەزلزانینی ئاینیی و مەزهەبی لەقەڵەم بدات و بەپێچەوانەی ئامانج و مەبەستە خێرخواز و بەسۆزانەی بزانێت كە رێز لە مرۆڤایەتی دەگرن لەسەر ئاستێكی گشتگیر.
سێهەم: بە ئاشكرا بڵێت كە ئەركی ئەزهەر ئەوە نییە فتوا بدات بۆ كافركردنی كەسێك و لایەنێك، یاخود ئیمانداریی كەس و لایەنێكی دیاریكراو بسەلمێنێت چونكە مەسەلەی كفر و باوەڕی دینیی مەسەلەیەكە تایبەتە بە پەیوەندی نێوان مرۆڤ و ئەو خودایەی كە دەیپەرستێ‌ و ئەو ئاینەی كە باوەڕی پێیەتی.
چوارەم: نرخ و ماف و رێز بگێڕێتەوە بۆ ئیبن روشد و فەرەج فۆدە و نەسر حامد ئەبوزێد و تێكڕای ئەو بیرمەندانەی كە خەباتیان كرد لەپێناوی ئازادیی ئەقڵی ئیسلامیدا و لە ئەنجامدا كەوتنە بەر هێرش و پەلاماری ناڕەوای كۆنەپەرستان تا ئەندازەی كوشتن و حەڵاڵكردنی خوێنیان. هەروەها ددان بنێت بە رەشەكوژیی و تاوانە گەورەكانی دەوڵەتی خەلافەتی عوسمانیی، كە دوایینیان بریتی بوو لە كوشتاری ئەرمەنییەكان. پێویستە سەركۆنەی ئەو تاوانە گەورەیە بكات و بڵێت ئەمە زوڵمێكە لە باوەڕی راستەقینەی ئیسلام كراوە چونكە تاوانە دەرهەق بە مرۆڤایەتی.
پێنجەم: شۆڕشێك بەرپا بكات بەسەر پەیكەرەكانی ئێستایدا لەڕێی داڕشتنی ئەرك و بەرپرسیارێتی تازەوە بێ‌ ئەوەی هیچ دەسەڵاتێكی كەهەنووتی هەبێت بەسەر خەڵكیدا. هەوڵ نەدات بۆ چەسپاندنی هیچ دەسەڵاتێكی ئایینی و نائایینی، هەوڵیش بدات و ئامانجیشی بریتی بێت لە بڵاوكردنەوە و قووڵكردنەوەی لایەنە شارستانییە مرۆڤدۆستییەكان كە شانبەشانی ئایینەكانی دیكە ئیسلامیش بۆ ئەوە هاتووە جەخت لە مرۆڤبوونی مرۆڤ بكاتەوە و پێویستە مرۆڤی موسوڵمان بەشداریی بكات لە بەخششە شارستانییە مرۆییەكاندا لەڕێی بەرزڕاگرتنی پێگەی ئەقڵ و زانست و داهێنانی مرۆڤایەتی و هەر شتێكی دیكە كە گرنگ بێت بۆ پێشكەوتنی مرۆڤ و چەسپاندنی دروشمەكانی ئازادیی و برایەتی.

created by Avesta Group and powered by Microsoft Azure