سەردەمی ئاوابوون

بۆچوون / بیروڕا :: پێش 3 هەفتە

نووسینی: دواڕۆژ


چل رۆژێك لەمەوبەر كەسایەتییەكی گەورەی ژیانی ئەدەبیی و رۆشنبیریی كورد، پڕۆفیسۆر عیزەدین مستەفا رەسوڵ كۆچی دوایی كرد. ئەمە رەنگە سەرەتای كۆتاییهاتنی قۆناغێكی زێڕین بێت كە سیمبولە دیارەكانی بریتیی بوون لە كۆمەڵێك ئەكادیمیست و رۆشنبیری تێكەڵ بە كۆمەڵگا و ژیانی رۆژانەی خەڵكەوە لە رەهەندە ئابووریی و كۆمەڵایەتی و سیاسییەكاندا.


ئەم نەوەیەی كە بە ئاوابوونی خۆری تەمەنی دكتۆر عیزەدین رووی لە كوژاندنەوە كردووە پێویستە هەڵوێستەیەكی گەورەی لەسەر بكرێت، كە بۆچی ئەم جۆرە كەسایەتییانە شوێنیان بە ئاسانی پڕناكرێتەوە. راستە مێژوو كاروانێكی بەردەوامە و رۆڵی تاكەكەس تیایدا سنووردارە بەڵام سروشتی قۆناغی ژیان و بەخششی دكتۆر عیزەدینەكان وەك پێداویستی بابەتی بۆ كورد هێشتا هەر كۆتایی نەهاتووە و میللەتەكەمان تا ئایندەیەكی دووری دیكەش زۆر سیمبولی وەك دكتۆر عیزەدینی پێویستە، كە بەداخەوە ئێستا تاك و تەرایەكیشیان نابینرێن.


ژینگەی دروستبوون و هەڵكەوتنی ئەو جۆرە كەسایەتییانە ژینگەیەكی بەپیت و یارمەتیدەر بووە بەڵام خۆیشیان كەسانێك بوون بەڕاستی ئازا و رێچكەشكێن و بەرژەوەند نەەیست و لەخۆبووردوو بوون. كە بیرمان دەكەوێتەوە كەسێكی وەكو پیرەمێردی نەمر ژیانێكی زۆر سادەی هەڵبژاردووە و تەنانەت ناچار بووە خانووەكەی لەپێناوی بەردەوامبوونی رۆژنامەكەیدا بخاتە رەهنەوە، ئەو پرسیارەمان لەلا دروست دەبێت كە ئایا چەند رۆشنبیر و رۆژنامەنووسی ئێستا ئامادەی ئەو فیداكاریی و خۆنەویستییەن.


دكتۆر عیزەدینەكان لەسەردەمێكدا ژیاون كە بەدەستهێنانی سەرچاوەوی زانیاریی و دەرفەتی دەربڕینی بیروڕا بە ئازادیی زۆر كەمتر و تەسكتر بوون لەم زەمینەیەی ئێستا، كەچی توانیویەتی لە هەموو مەیدانەكاندا بنووسێت و زیاتر لە (90) كتێب بڵاو بكاتەوە، كە بەشێكی زۆری ئەو كتێبانە سەرچاوەی زانستین بۆ كۆلیجەكانی زمان و ئەدەب. كەچی لەم رۆژگارەی ئێستاماندا كە زانكۆكان هاتوونەتە كۆڵانەكانی خۆمانەوە و تەنها بە كلیك كردنێك سەدان سەرچاوەی گرنگمان دەست دەكەوێت بە دەگمەن كەسێك دەبینین تاقەتی هەبێت یان ئامادەیی تێدا بێت نامیلكەیەكی بچكۆلە بەڵام بەئەرزش لە بواری توێژینەوە و ساغكردنەوەی ئەدەبیی و زمانەوانیدا بنووسێت. بەڕاستی ئەم سەردەمە سەردەمی ئاوابوونی ئەستێرە پرشنگدارەكانە.

created by Avesta Group and powered by Microsoft Azure