گەمەی گەورەكان

بۆچوون / بیروڕا :: 12/10/2019

سەرچاوە: ئەلحیوار ئەلموتەمەدین
نووسینی: ئەلهیمۆت عەبدولسەلا
وەرگێڕانی: د. شێركۆ عەبدوڵڵا
خاوەن بانقە گەورەكان راگەیاندكارە بەناوبانگەكان و سیاسییە ناودارەكان پەیوەندییەكی هەمیشەیی و پتەویان پێكەوە هەیە، چونكە هەرلایەكی ئەم سێگۆشەیە بڕوخێت سیستمەكە بەتەواوی لەناودەچێت. لەبەرئەوە رێگە نادرێت هیچ شتێك ئەم دۆستایەتییە تێكبدات تەنانەت ئەگەر پیاوانی دەوڵەت و راگەیاندكارەكانیش بگۆڕێن. ئەو دەوڵەتەی كە كۆنترۆڵی راگەیاندن دەكات راگەیاندن دەیڕوخێنێت.
وامەزانە راگەیاندكارانی دۆستی رژێم هەرگیز هەست بە ئازاری ویژدان بكەن. بە پێچەوانەوە خۆیان زۆر بە نیشتمانپەروەر دەزانن و لەو راستییە تێگەیشتوون دەستێكن لە دەستە بەهێزەكانی دەوڵەت ئەگەر نەڵێین بەهێزترین دەستیەتی. 
رێگە بە بڵاوكردنەوەی هیچ هەواڵ و رستەیەك نادرێت بە دڵی حكومەت نەبێت، خۆ ئەگەر هەر رەخنەیەك لە پیلكەی ئەو كەناڵە دەرچوو كە رەخنە لە حكومەت بگرێت یان سووكایەتی بە كارەكانی بكات ئەوا راگەیاندكارەكە دەستبەجێ‌ دەردەكرێت بە فەرمانی خاوەن كەناڵەكە. چونكە ئەو خاوەنی كەناڵە هاوڕێ‌ی حكومەتە.
خاوەن بانقەكان لە لوتكەدان و پاش ئەوان دەوڵەتە و ئینجا راگەیاندكاران. تەنیا رێگە بەم ریزبەندییە دەدرێت. ئەگەر دەوڵەت بیەوێت كۆنترۆڵی بانقەكان بكات و خۆی بگاتە لوتكە ئەوا خاوەن بانقەكان دەیڕوخێنن. ئەو دەوڵەتەش كە كۆنترۆڵكردنی راگەیاندن فەرامۆش بكات ئەوا راگەیاندن دەیڕوخێنێت. ئەمە ئێستا سیستمێكی جیهانییە. ئەم سێ‌ زەبەلاحە قوڕمساغە هاوڕێ‌ی یەكترین، ئەگەر یەكێكیان چاك ببێت ئەوانی تر دەیخۆن.
زۆرجار دەبینین هەندێك كەناڵی راگەیاندن دیدار لەگەڵ هاوڵاتیاندا دەكەن و لەبارەی شتێكی دیاریكراوەوە پرسیاریان لێ‌ دەكەن. دڵنیابە مەترسییەك لەگۆڕێیە. دڵنیابە ئەم دیدارانە دروستكراون و حكومەت خۆی رەوانەی دەكات بۆ كەناڵەكان و لەبەرامبەریدا پارەیەكی زۆریان دەداتێ‌ بۆ بڵاوكردنەوەی ئەو راپۆرتانە. لەژێر هەر ناو و ناونیشان و پسپۆڕییەكدا بێت، تێكڕای قسەكەران لەسەر بابەتەكە تەنیا ئەو شتانە دەڵێن كە لەگەڵ ئاڕاستەی حكومەتدا دەگونجێن.
نەك هەر ئەوە بەڵكو كۆمەڵێك كۆمپانیای جیهانی هەیە، بۆ نموونە كۆمپانیای (مۆرسۆن باستلەر) كە كارەساتی جیهانی دروست دەكات و لە 35 وڵاتدا لقی هەیە. ئەم جۆرە كۆمپانیایانە تیمی تەواویان هەیە كە پێكهاتوون لە ئەكتەر و رۆژنامەنووس و راوێژكار و بەرهەمهێن، وا لە وەرگر دەكەن بڕوا بەو كارەساتە دروستكراوە بكەن كە ئەسڵ و ئەساسی نییە. مەبەستیش گۆڕینی بیروبۆچوونی خەڵكە و ئاڕاستەكردنیانە بەو جۆرەی كە بە دڵی سیاسەتە جیهانییەكان بێت.
تەكتیكێكی ئیعلامی باو هەیە كە بەكاری دەهێنن .. زاراوەی ئاڵۆز و تەمومژاوی تێكەڵی هەواڵەكانیان دەكەن. بۆ نموونە دەڵێن سەرچاوەی ئاگادار وای وت. ئەمە مانای وایە بیروبۆچوونی حكومەتت پێ‌ دەڵێن یان ئەو لایەنەی كە زۆر بەخشندانە پارەیان دەدەنێ‌. ئەركی ئەم جۆرە كۆمپانیا تایبەتانە خۆشكردنی زەمینەی دەركردنی بڕیارێكە یاخود لەبەرچاوخستنی كەسایەتییەكە یان گۆڕینی قەناعەتی میللەتە. هەر دوور نەڕۆین روخاندنی پەیكەرەكەی سەدام لە عێراقدا كارێكی رێكخراو بوو. تیمێكی دەروونناسی سەر بە مارێنزی ئەمریكی بەئەنجامی گەیاند كە پسپۆڕی هەیە لە كردەوە دەروونییەكاندا. هەموو پڕۆسەكە ساختە بوو، بەشدارەكان هەموویان ئەكتەر بوون. ئەو سەربازەی كە سەركەوت بەسەر پەیكەرەكەدا و ئاڵای ئەمریكای پیادا هەڵواسی و پەیكەرەكەی بە تەور شكاند هەمووی پێشتر بیری لێ‌ كرابووەوە بۆ هەناردەكردنی وێنەیەكی دەروونی بۆ جیهان كە گوایا عێراقییەكان دەیانەوێت ئەمریكا رزگاریان بكات و زۆر دڵخۆشن.
بەدڵنیاییەوە مەبەست لەم وتارە ئەوە نییە كە وابزانین هەموو رووداوە خوێناوییەكان ساختە و دروستكراون. بەڵام رێژەیەكی زۆریان بەوجۆرەن و دەكەوێتە سەر هوشیاری خۆت چۆن راست و درۆ لەیەكتری جیادەكەیتەوە.

created by Avesta Group and powered by Microsoft Azure