ئەمەیە چین

بۆچوون / بیروڕا :: پێش 2 هەفتە

نووسینی: یەلینا ریزۆنینكۆ
سەرچاوە: ئەلحیوار ئەلموتەمەدین
ئامادەكردن و وەرگێڕانی لە عەرەبییەوە: د. شێركۆ عەبدوڵڵا

لەم رۆژانەدا كە وڵاتی چین سەرگەرمی ئاهەنگ گێڕانە بە بۆنەی یادی 70 ساڵەی دامەزراندنی كۆماریی چینی میللیی و 70 ساڵەی دەسەڵاتی پارتی كۆمۆنیستی چین، كە رابەرایەتی وڵات و گەلی چینی كرد بەرەو لوتكەكانی گەشەكردن و خوڵقادنی موعجیزەكان، بە مێژووی هەموو مرۆڤایەتیدا دەگەڕێین و بۆمان دەردەكەوێت كە تەنیا چینییەكانن بە پیتەكانی ئاگر و رووناكی پێشكەوتنی خێرا و سەرسووڕهێنیان تۆمار كردووە بە جۆرێكی وا كە لە ساتەوەختی خوڵقادنی مرۆڤەوە هەتا ئێستا بێ‌ وێنەیە.

سەرسام بوون بەتەنیا بەس نییە. زاناكان و فەیلەسوفەكانی جیهان و مشتومڕی نێوان بیرمەند و كەسایەتییە هەڵكەوتووەكانی جیهان هەموو بە واق وڕماوییەوە شایەتی دەدەن بۆ موعجیزە گەورەكەی چین كە هیچ كامیان لە خۆشەویسترین خەونیشیاندا چاوەڕێیان نەكردووە.

چین سەلماندی كە ئابووریی داڕێژراو و كۆمەڵگای نوێی ئاڕاستەكراو بە ئازادییە سەرەكییەكان و دەستبەربوونە رۆحیی و ماددییەكان دەتوانن رێگرە هەرە سەختەكان نەهێڵن.

ئەو ئابوورییە نەخشەكێشراوە و كەرەستە بە مرۆڤ كراوەكانی دەتوانن بەردی رەق بكەنە زێڕ، خۆڵ بگۆڕن بۆ ئەڵماسێكی بریقەدار.

لە رووی مێژووییەوە سەركردە جیهانی و ئینتەرناسیۆنالیستەكە (ماوتسی تۆنگ) - رزگاركەری چین و خوڵقێنەری ئەو وڵاتە لە هیچەوە و بنیادنەرەكەی پاش راماڵینی داگیركەری ئیستعیماریی و نۆكەرەكانی لەسەر خاكی وڵات دڵنیابوو كە وڵاتی چین دەبێتە دەوڵەتێكی بەهێز و خاوەن ئیرادەی وا كە هەمووان خۆزگەی پێ‌ بخوازن.

زۆر كەس كاتی خۆی ئەو قسانەی سەرۆك ماویان هەر بە خەونێكی خۆش دەزانی، چونكە لەوكاتەدا چین لە بارودۆخێكی سەختدا بوو، بەڵام سەرۆك ماو بە دووربینییەكەی خۆی شتێكی تری دەبینی. ئەو لە چەندین بەرەدا دەجەنگی و بەشێوەیەكی بێ‌ وێنە نەخشەی بۆ گەشەكردن داڕشت و وای لە نەتەوەی چین كرد بە دڵنیاییەوە باوەڕی بە داهاتوو هەبێت و هەموو شتێكی چاك و بەكەڵك لە مێژووی وڵات و گەل و فەلسەفە دێرینەكەیدا بخاتە كار و چەمكی پێكەوەیی و هاوكاریی بچەسپێنێت لەنێوان هەموو نەتەوە و زمانە جۆراوجۆرەكانی وڵاتدا و بیروباوەڕی نیشتمانیی و یەكپارچەیی چین و چینییەكان بچەسپێنێت.

ئەم سەركردەیە داوای كرد هەموو هاووڵاتییەك لە شوێنی خۆیدا خۆی بە سەركردە بزانێت و بەرپرسیاریەتییە گەورە و چارەنووسییەكان لەئەستۆ بگرێت. ئەم بیروباوەڕ و تێڕوانینە مەزنە لەسەر دەستی سەركردەی مەزن و بیرمەندی گەورە (چی جین بینگ) گەشەی كرد و بەرفراوانتر بوو، چونكە خاوەنی فكرێكی قووڵ و ئایدۆلۆجیایەكی تۆكمە و شارەزاییەكی گەورەی لە هەموو بوارەكاندا هەبوو.

ئەم سەركردە گەورەیە سەلماندی كە هیچ شتێك مەحاڵ نییە و هیچ رێگر و كۆسپ و تەگەرەیەك ناتوانێت كۆڵ بە مرۆڤ بدات ئەگەر هوشیار و باوەڕدار و پابەندی بیروباوەڕەكانی بێت. ئەگەر هەركەسێك لە شوێنی خۆیدا بەوجۆرە رەفتار بكات ئەوا دەرئەنجامێكی بەكۆمەڵ دەستەبەر دەبێت.

سەرۆك چی جەخت دەكاتە سەر هزری سەرۆك ماو و لە دوایین گوتاریدا لە یادی 70 ساڵەی دامەزراندنی دەوڵەتی چین وتی: دامەزراندنی كۆماری چینی میللی چارەنووسی رەشی چینی بە تەواوی گۆڕی، كە زیاتر لە 100 ساڵ بوو بە دەست لاوازیی و هەژاریی و تۆقاندن و سوكایەتی پێكردنەوە دەیناڵاند.

ئەمە گەورەیی چین دەرئەخات كە سەركردەكانی ئێستای بە تەواوی رێز دەگرن لە پێشینانی دامەزرێنەری وڵات. ئێستا چین تەنانەت لەگەڵ ركابەرەكانیشدا هاوكار و یارمەتیدەرە و بە پێویستی دەزانێت قەیرانە نێودەوڵەتییەكان سارد بكاتەوە و بوار نەڕەخسێنێت لایەنگرانی جەنگ بگەنە ئامانجەكانیان كە بە كوشتدانی مرۆڤ و لەدەستدانی سامان و موڵك و ماڵە.

كۆمۆنیستەكانی چین لە ماوەی 70 ساڵی رابوردوودا مەزنترین و قووڵترین گۆڕانكاریی كۆمەڵایەتیان بەدی هێناوە لە هەموو مێژووی چیندا. بناغەی هەموو گەشەكردن و پێشكەوتنێكیان داڕشت. ئێستا چینی سۆشیالیست لە خۆرهەڵاتی جیهاندا دەدرەوشێتەوە و هیچ هێزێكی گەردوونی نییە بتوانێت پێگەكەی بلەرزێنێت یان پێشكەوتنی نەتەوەیی چین بوەستێنێت. چینی ئایندە بە دڵنیاییەوە چاكتر و بەهێزتر دەبێت.

سەرۆك چی لە وتارەكەیدا جەختی كردەوە لەسەر پابەندبوون بە رێبازی سۆشیالیزمەوە بەپێی تایبەتمەندییەكانی چین و زۆر بە پێویستی زانی درێژە بە كاروانە سیاسییە بنەڕەتییەكەی حیزب بدرێت و لەهەمان كاتدا ژیانێكی باشتر و پڕ لە دەستكەوتی مێژوویی تازە بۆ خەڵكی چین بهێنێتە دی.

created by Avesta Group and powered by Microsoft Azure