تەنیا شەرم

بۆچوون / بیروڕا :: 21/09/2019

نووسینی: حەمید ئەلسەعیدی
سه‌رچاوه‌: ئه‌لحیوار ئه‌لموته‌مه‌دین
وه‌رگێڕانى: دواڕۆژ

غیرەت لە دەمارما نەماوە و ئێستا من جگە لە مرۆڤێكی ترسنۆك هیچی تر نیم، مرۆڤێك كە پاشماوەیەكی كەمی هەستی مرۆڤایەتی تێدا ماوە و غیرەتی ئەوە ناكات رابپەڕێ و هەموو هەڵە و گوناهێك رەد بكاتەوە.. ئێستا ئیتر بە دەنگی بەرز بیرناكەمەوە و ناتوانم لە حزوری سوڵتاندا یەك وشەش بڵێم تەنانەت ئەگەر سوڵتانەكە زاڵمیش نەبێت، چونكە وام لێهاتووە لە غەزەبی هەموو سوڵتانێك سڵ دەكەمەوە، ئەگەرچی بەپێی دەستووریش دەنگی من و كەسوكارەكەم كردبێتیان بە سوڵتان، بەڵام سەرەڕای ئەمەش هەست ئەكەم لەناو پاشماوەكانی ویژدانمدا شتێك لە شەرم و حەیا ماوە هی ئەو سەردەمەی كە گەنج بووم و لە ئەنجامی رەفتار و هەڵوێستەكانم نەدەترسام .

شەرم دامدەگرێت كاتێك كە دەبینم دەسەڵاتی وڵاتەكەم خانووی هەژاران بەسەریاندا دەڕوخێنێت كەچی خۆی گێل دەكات لەو هەموو دەسەڵاتدارەی تر كە موڵك و ماڵ و كۆشك و تەلاری دەوڵەتیان داگیركردووە و كار گەیشتووەتە ئەوەی بە هەمانشێوەی خەیروڵڵا تولفاح دەستبگرن بەسەر قوتابخانە و زانكۆ و دامەزراوەكانی حكومەتدا. ئەمڕۆ لەباتی خەیروڵڵا تولفاحێك سەدان خەیروڵڵا تولفاحمان هەیە، چاوجنۆكییەكەش هەموو سنوورێكی تێپەڕ كردووە تا ئەو رادەیەی كە سەرمایەگوزاری و وەبەرهێنان لە گۆڕستانەكانیشدا دەكرێت.

شەرمەكەم بوو بە فرمێسكی گەرم كاتێك كە چیرۆكی مەرگی كچە منداڵێكی بێ‌ تاوانم بیست كە بودجە چەند ملیارییەكەی دەوڵەت فریای نەكەوت و كاتێكیش كە بە خێری ئەم و ئەو پارەی بۆ كۆكرایەوە بەو هیوایەی بنێردرێت بۆ دەرەوەی وڵات بۆ چارەسەر، دەوڵەت كۆمەڵێك رێگری بۆ دروست كرد و بەوشێوەیە بە تول مرد یان راستتر وایە بڵێین كوژرا و خوێنەكەی لەنێوان سەرۆك و وەزیر و دەسەڵاتی فڕۆكەخانەدا ون بوو، ئەو فڕۆكەخانەیەی كە لێوەی هەزاران كیلۆ دۆلاری قاچاغ رەوانەی دەرەوە كران و هەزاران كیلۆ كریستاڵ و حەشیشەی قاچاغ هێنرانە ناو وڵاتەوه‌، كەچی (بەتوولی) منداڵی پێدا تێنەپەڕی.

زۆر شەرم ئەكەم لە سەرۆكی پەڕلەمانی وڵاتەكەم. ئەوێكی لەدایكبووی باشوور و خۆ بەخزمەتكار زانی ئەو ناوچەیە دەزانێت كەچی بازرگانی دەكات بە خێروبێری خەڵكی باشوورەوه‌و بە ملیار پارە دەنێرێت بۆ چەند سوودمەندێكی كورد نەك بۆ برا كوردەكانم لە كوردستانی خۆشەویست. لەكاتێكدا كە خەڵكی باشوور لەبرسێتیدا دەناڵێنن.

شەرم دامدەگرێت كە دەبینم شۆڤڵ و ئامێرەكانی دیكەی پارێزگاكانی بەسرە و كەربەلا و شوێنەكانی دیكە بەناوی جوانكردنی شار و نەهێشتنی قەرەباڵغی و ترافیكەوە خانووی هەژارە قوربانیدەرەكانی وڵاتەكەم دەڕوخێنن. ئەمانە پاشماوەی كەمێك شەرم و خەجاڵەتین و هیچتر. زۆریش دەترسم بەمزووانە لەدەستی بدەم، چونكە ئەو كەسەی ئازایەتی لەدەست بدات شەرم و حەیاشی لەدەست دەردەچێت و بەدووری مەزانن رۆیشتنیشم بیربچێتەوە و لەمەولا وەكو ئاژەڵ بە چوار پێ‌ بڕۆم. سەرتان سووڕ نەمێنێت منیش تاكێكم لەو مێگەلە گەورەیە.

created by Avesta Group and powered by Microsoft Azure