بێ‌ سەروبەری لە جیهانی ئینتەرنێتدا

بۆچوون / بیروڕا :: پێش 3 هەفتە

سەرچاوە: ئەلعەرەبی ئەلجەدید
ئامادەكردن و وەرگێڕانی: دواڕۆژ


گومانی تێدا نییە تەكنەلۆجیای پەیوەندی نوێ‌ رۆڵێكی گەورەی هەیە لە هەموو رەهەندەكانی ژیاندا بەجۆرێك كە كۆمەڵگای تۆڕە كۆمەڵایەتییەكان بووەتە ناونیشانی پێكهاتەیەكی كۆمەڵایەتی نوێ‌ و بەشدارییەكی گەورەی هەیە لە ئاڕاستەی رای گشتیدا.


ئەو تۆڕە ئەلیكترۆنیانەی كە دادەنرێن بۆ پێكهێنان و دامەزراندنی مەسەلە گەورەكان زۆر كاریگەرن لە فراوانكردنی بەشداری سیاسیدا، بەجۆرێك كە هەڵسوڕاوی نوێ‌ ئامادە و تەرخان دەكات بە شێوازی جۆراوجۆر بۆ جێگرتن لە دیمەنە سیاسییەكەدا.

بەڵام دەبێت ئەوەمان لەبیر نەچێت كە ئەو فراوانكردنە لە بوارە گشتییە گریمانەیەكەدایە، ئەمەش وامان لێ‌ دەكات بپرسین ئایا جیهانی ئەلیكترۆنی چ پەیوەندییەكی هەیە بە بواری سیاسی راستەقینە و دامەزراوەكانییەوە؟.


بایەخی ئەم پرسیارە لەوەدایە كە زۆر كەس لەوانەی چوونەتە قوڵایی جیهانە گریمانە ئەلیكترۆنییەكەوە وا رادەگەیەنن كە هیچ پەیوەندییەك نایانبەستێتەوە بە بوارە گشتییە راستەقینەكەوە، واتە بە حیزب و سەندیكا و رێكخراوە مەدەنییەكانەوە و زۆر رەخنە لەو دامەزراوانە دەگرن و دەڵێن" ئەمانە چیتر سوودیان نەماوە بۆ رووبەڕووبوونەوەی گۆڕانكارییەكان لە بواری سیاسییدا". لەبەرامبەر ئەمەدا دامەزراوە حیزبییەكانیش هەریەكە و بۆ خۆی بوارێكی گریمانەیی دامەزراندووە و خزمەتی دەكات و لە هەوڵی بەهێزكردنیدایە. ئەنجامەكەشی دروستبوونی مشتومڕی گەرمی بێ‌ ئەنجامە لەناو جیهانە گریمانەییەكەدا.


ئێستا كاریگەریی بوارە گریمانەییەكە بەوە دەپێورێت تا چەند پەیوەندی هەیە بە بوارە گشتییە راستەقینەكەوە. كەواتە ناتوانین بڵێین" سەربەخۆییەكی رەها هەیە لە ئارادا كە بوارە گریمانەییەكە جیادەكاتەوە لە بوارە گشتییە راستەقینەكەدا" و پەیوەندییەكە بەجۆرێكە كە ئەرك و ئامانجی هەردوولای ئاڵۆزتر كردووە.


ئەو بێ‌ سەروبەریی و چەلەحانێ‌ زۆرەی كە تۆڕە كۆمەڵایەتییەكانیان پڕكردووە ناچارمان دەكەن لە پلەی یەكەمدا بیر لەوە بكەینەوە چۆن شێوازی بەشداریكردنەكەی ئێستا و رێكاریی ناڕەزایی دەربڕینەكان بە دامەزراوەیی بكەین و هەوڵ بدەین شێوازی باشتری گفتوگۆ و هاوئاهەنگی و كردار بدۆزینەوە؟

هەروەها پێویستە بپرسین چۆن بتوانرێت سوود لە چالاكییەكانی بواری واقیعیی گشتیی وەربگیرێت و تێكەڵ بكرێت لەگەڵ پێشەنگەكانی تۆڕە كۆمەڵایەتییەكاندا بۆ ئەوەی بە هەردوولا رێگەیەك بدۆزرێتەوە كە تێڕوانین و رایەڵەی نێوان هەڵسوڕاوانی هەردوو بواردا یەكبخات.

created by Avesta Group and powered by Microsoft Azure