ژن نیوەی كۆمەڵگەیە .. كەواتە ژیان هەر پیاو ناگرێتەوە

بۆچوون / بیروڕا :: 11/06/2019

نووسینی: نایف عەبوش
سەرچاوە: ئەلحیوار ئەلموتەمەدین
وەرگێڕانی: دواڕۆژ

لە كەلتووری ناوچەكەدا و قسەی باوی ئێستای هەموو جیهان ئەوەیە كە ژن نیوەی كۆمەڵگەیە. كەواتە هەموو تێڕوانینێك لە ژن بە نەرێنی و بچووك سەیركردن و پێشێلكردنی ماف و پەراوێزخستن و تەماشاكردنی وەكو كاڵا پێچەوانەی ئەو دروشم و باوەڕەیە و تێڕوانینی راستەقینەی میللەتانی ناوچەكە نییە بەرامبەر ژن.


چ بوار و بیانوویەك هەیە بۆ نكوڵیكردن لە رۆڵی گەورەی ژن لە هەموو بوارەكانی ژیاندا. ژن پەروەردەكەری نەوەكانە و رۆڵی كاریگەر و چالاكی هەیە لە بوارەكانی سیاسەت و ئابووری و ئەدەب و پەروەردە و پزیشكی و ئەندازیاریی و تێكڕای بوارەكانی دیكە كە بەداخەوە قۆرخ كراوە بۆ كەلتووری رەگەزی نێر.
حاڵی ئێستای زانكۆكانمان لە بوارەكانی پەروەردە و خوێندنی باڵادا زۆر رازاوەیە بە ئامادەیی كاریگەر و بەرچاوی ژن وەك مامۆستا و توێژەری زانستی و پیشەكانی دیكە. لە بواری پیشەسازیشدا بەهەمان شێوە دەبینین ژن لە هەموو جومگە پیشەسازییەكاندا ئامادەیەكی چالاك و بە بەرهەمە. دیارە بوارەكانی پزیشكی و خزمەتگوزاری و پیشەكانی دیكەش بەهەمان شێوە گۆڕەپانی ئاشكرا و بەرجەستەی دەرخستنی تواناكانی ژنانە.
لێرەوە دەردەكەوێت كە ژن بەردەوام هەر سەرچاوەیەك دەبێت بۆ بەخشش و ئیلهامبەخشی نەوەكان سەبارەت بە چۆنێتی مامەڵەكردن لەگەڵ ژیاندا بەجۆرێك كە ئەو وتە بەنرخە دەنەخشێنێتەوە كە دەڵێت لە پشت هەموو پیاوێكی مەزنەوە ژنێك هەیە. ژن و پیاو لە دیالیكتیكێكی خوڵقێنەردا بناغەی بوونی كۆمەڵایەتی پێكدەهێنن.
جا ئەگەر راستییەكە بەوشێوەیە بێت كەواتە جووڵەی ژیان تەنیا هەر بە چالاكییەكانی پیاو نایەتەدی. ژیان رێك و راست نابێت ئەگەر تەنیا ئەقڵی پیاوسالاری و هەژموونی نێر باڵادەست بن. كۆمەڵگە پەكی دەكەوێت ئەگەر ژن بەئەنقەست دوور بخرێتەوە لە رەهەندە گرنگەكانی كۆمەڵگەدا.
رێزگرتنی ژن و یەكسانكردنی بە پیاو و پێبەخشینی پێگەی راست و شیاوی خۆی مەرجێكی گرنگە بۆ تێپەڕاندنی ئەو تێڕوانینە یەكلایەن و هەڵەیەی كە پێیوایە ژیان تەنیا هەر پیاوە.

created by Avesta Group and powered by Microsoft Azure