دروستكردنی كۆمەڵگای تاوانكار

بۆچوون / بیروڕا :: 09/06/2019

نووسینی: هادی جەلۆ مرعی
وەرگێڕانی: دواڕۆژ

هەندێك كۆمەڵگا دەگۆڕێت و دەبێت بە شتێك هاوشێوەی رێكخراوی تاوانكار كە كوشتن و دزی و فێڵ و تۆقاندن و كۆنترۆڵكردنی ئابووری دەكاتە پیشە. 

لەگەڵ زۆربوونی ژمارەی دانیشتواندا خەریكە عێراق دەبێتە جۆرێك لەم جۆرە رێكخراوانە. بەتایبەت كە سیستمی خوێندن و پەروەردەی كۆمەڵگا بەرەو هەرەسی كۆتایی دەچێت و گەندەڵی و بێ‌كاریی و دروستبوونی مافیاكان لە هەڵكشاندان لەژێر سایەی چەند تاقمێكی حوكمدار و بەدەسەڵات كە هەر بەدوای بەرژەوەندییەكانی خۆیانەوەن و بەها پەروەردەیی و رەوشتییەكانیان فەرامۆش كردووە و لاوان سەرگەردان و بێ‌ ئایندە كەوتوون بە دوو شێوەی ترسناك، شێوەیەكیان ئەوەیە كە كوێرانە و ساویلكانە روودەكەنە ئایین بێ‌ بیركردنەوە و زانین و تێگەیشتن لە هۆكاری شڵەژاندنی گۆڕەپانی كۆمەڵگا. 
ئەو هۆكارەی كە وڵاتی بەرەو داڕمان بردووە و هیچ پڕۆژەیەكی مرۆڤانەی پێ‌نییە پشتبەستوو بێت بە ئەقڵ و رەوشتی ساغ و بووەتە مایەی پێكداهەڵپژان و توندوتیژی و دواكەوتنێكی هزری وا كە بە هیچ شێوەیەك متمانەی پێ‌ناكرێت. شێوازی دووهەمیش بە پێچەوانەوە رووی كردووەتە خۆ بێ‌بەریكردن لە بەها ئایینی و رەوشتییەكان و سروشت و داب و نەریتی سەیر و سەمەرە پەیڕەو دەكات. پەیڕەوانی ئەم ئاڕاستەیە تەنیا بەدوای چێژدا دەگەڕێن بێ‌ گوێدانە یاساكان و لەگەڵیدا دیاردەكانی كوشتن و دزین و بێ‌ڕەوشتی و خۆكوشتن زیاد دەبن و نەوەیەك خەریكە سەرهەڵدەدات كە پێكهاتووە لە گەنج و هەرزەكاری لادەر كە هیچ بایەخێك دانانێن بۆ بەها پەروەردەیی و ئاینییەكان.
عێراق وڵاتی دیكتاتۆری و ستەمكارییە، وڵاتی ئابڵوقە و مەرگ و برسییەتی و نەخۆشی، وڵاتی جەنگە بێ‌كۆتاییەكان، وڵاتی گەندەڵیی و مافیاكانی وێرانكاریی و سەرلێشێوان و پابەندبوون بەو حیزب و ئاینزایانەوە كە تەنیا هەر بەدوای پۆست و پارەدا دەگەڕێن و بەهاكانی رەوشت و دین و زانستیان خستووەتە ژێر پێوە.
ئایا ئێمە دەبینە ئەندام لەم كۆمەڵگا تاوانبارەدا كە بەرەو خەرەندی دواكەوتنی هزری و شارستانی مل دەنێت و بە جۆش و خرۆشەوە بووەتە لایەنگری خەرافات و دەمارگیرییە نەتەوەیی و مەزهەبی و ناوچەییەكان، ئەو دەمارگیرییەی كە مرۆڤ دەكاتە ئامێرێكی بێ‌ ئەقڵ و هۆش بەدەست سیستمە تاوانكارەكەوە. لەبەرامبەر ئەمەدا عێراق خاوەنی كەلەپوورێكی شارستانی مەزنە، خاوەنی كۆمەڵێك بەهای بەهێز و فاكتەری پێگەیشتووی وشیارە كە دەتوانن مەسەلەكانی بخەنەوە شوێنی خۆیان و كۆمەڵگایەكی ئازاد و رۆشنگەر و خولیای ژیانێكی باشتر دابمەزرێنێت، كۆمەڵگایەك كە بتوانێت لەگەڵ گۆڕانكاریی و رابوونە شارستانییە جیهانییەكەدا كارلێك دروستبكات و تەنیا هەر یاریكەرێكی لاوەكی و بەكاربەرێكی ئەو شتانە نەبێت كە گەلانی دیكە دروستیان دەكەن.

created by Avesta Group and powered by Microsoft Azure